گوتەبێژی هێزەكانی هاوپەیمانان باسی هێرشە مووشەكیەكەی ئەمڕۆی ئەنبار دەكات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

گوتەبێژی هێزەكانی هاوپەیمانان باسی هێرشە مووشەكیەكەی ئەمڕۆی ئەنبار دەكات

گوتەبێژ بە ناوی هێزەكانی هاوپەیمانان لە عێراق باسی لەو هێرشە مووشەكییە كرد كە ئەمڕۆ كرایە سەر بنكەی سەربازیی ئاسمانیی عەین ئەسەد لە سنووری پارێزگای ئەنبار و رای گەیاند مووشەكەكە لە ناوچەی بەغدادیەوە ئاراستە كراوە و هێزە ئەمنییە ناوخۆییەكان دەستیان بە لێكۆڵینەوە كردووە بۆ دۆزینەوەی ئەنجامدەری هێرشەكە.

ئێوارەی ئەمڕۆ یەكشەممە واین مارۆتۆ گوتەبێژی هێزەكانی هاوپەیمانان لە عێراق لە هەژماری خۆیدا لە تۆڕی كۆمەڵایەتیی "تویتەر" باسی لەو هێرشەی ئەمڕۆ كرد كە كرایە سەر بنكەیەكی سەربازیی هاوپەیمانان لە عێراق و نووسیویەتی هێزە عێراقییەكان لێكۆڵینەوە لە هێرشە مووشەكییەكە دەكەن كە كرایە سەر بنكەی عەین ئەسەد و بریتی بوو لە یەك مووشەك و نەتەقیەوە.

نیوەڕۆی ئەمڕۆ یەكشەممە مووشەکێک ئاراستەی هێزەکانی ئەمریکا لە بنکەی سەربازیی عەین ئەسەد لە سنووری شارەدێی بەغدادی سەر بە شارۆچکەی هیت لە پارێزگای ئەنبار کرا.

میدیا عێراقییەکان ئاماژەیان بەوە كردبوو کە تا ئێستا جۆری مووشەکەکە نەزانراوە و رووداوەکەش هیچ زیانێکی مرۆیی لێ نەکەوتووەتەوە، چونكە مووشەكەكە نەتەقیوەتەوە.

گرووپ و میلیشیا عێراقییەکان بەردەوام بنکە سەربازییەکان و بەرژەوەندییەکانی ئەمریکا بە مووشەک و فڕۆکەی بێفڕۆکەوانی بۆمبڕێژکراو دەکەنە ئامانج و ئەمریکاش میلیشیاکانی حەشدی شەعبیی نزیک لە ئێران، بەو هێرشانە تاوانبار دەکات.