لیژنەی دارایی له‌گه‌ڵ وه‌زیرى دارایى و سکرتێری لیژنەی باڵای چاکسازی كۆبووه‌وه‌
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

لیژنەی دارایی له‌گه‌ڵ وه‌زیرى دارایى و سکرتێری لیژنەی باڵای چاکسازی كۆبووه‌وه‌

 بۆ پرسی مووچە و یاسای چاکسازی و بایۆمەتری، لیژنەی دارایی لەگەڵ وەزیری دارایی وسکرتێری لیژنەی باڵای چاکسازى كۆبوونەوە.

بە پێی ڕاگەیاندراوێکی  پەرلەمانی  کوردستن، ئەمڕۆ دووشەممە 2021/6/14، لیژنەی دارایی و کاروباری ئابووری، بە سەرپەرشتیی زیاد جەبار، سەرۆکی لیژنە و ئاماده‌بوونی جێگری سەرۆكى لیژنە و ئەندامان و ڕاوێژکارانی لیژنەكه‌، له ‌هۆڵی لیژنه‌ له ‌ته‌لارى په‌رله‌مان، له‌گه‌ڵ ئاوات شێخ جەناب، وەزیری دارایی و كاروبارى ئابوورى و د.عەبدولحەکیم خەسرۆ، سکرتێری لیژنەی باڵای چاکسازى كۆبووه‌وه‌.

ئاماژە بەوە کراوە، کۆبوونەوەکە تایبەت بوو بە تاوتوێکردنی ڕاپۆرتی دووەمی لیژنەی باڵای چاکسازی لە مووچە و خانه‌نشینى و دەڕماڵە و بەخشین و ئیمتیازاتەکان له‌ هه‌رێمی كوردستان، هاتووە "لە دەستپێکی كۆبوونه‌وه‌كه‌دا ئاوات شێخ جەناب، وه‌زیرى دارایى، کۆمەڵێك زانیاری و وردەکاریی پێشکەش بە ئەندامانی لیژنە کرد، سەبارەت بە ڕاپۆرتی دووەمی لیژنەی چاکسازی و دواتر بابەتی کلێشەی بایۆمەتریی خستە ڕوو".

وەزیری دارایی بە ئەندامانی لیژنەکەی ڕاگەیاند: "کلێشەی بایۆمەتری لەلایەن وەزارەتی دارایی نێردراوە بۆ وەزارەت و فەرمانگەکان بە مەبەستی دڵنیابوونەوە".

ڕاگەیاندراوەکەی پەرلەمان  باسی  لەوەش کردووە لە بەشێکی دیكه‌ی کۆبوونەوەکەدا د.عەبدولحەکیم خەسرۆ، سکرتێری لیژنەی باڵای چاکسازی درێژەی بابه‌تی راپۆرتی دووەمی چاکسازی دا و تیشکی خستەسەر پرسی پێداچوونەوەی دەڕماڵەی فەرمانبەران.

ئەوەش خراوەتەڕوو لەلایەن سه‌رۆك و جێگر و ئەندامانی لیژنەی دارایی پەرلەمان کۆمەڵێك پرسیارو تێبینی سەبارەت به‌ ڕاپۆرتی دووەمی چاکسازی ئاراستەی وەزیری دارایی و سکرتێری لیژنەی باڵای چاکسازی کرا.

جەخت لەسەر ئەوەش کراوەتەوە، بڕیار وایە لە ڕۆژانی داھاتوودا کۆبوونەوەکانی لیژنەكه‌ بەردەوام بن بۆ ئەم مەبەستە.

ئه‌رشه‌د لۆلانی، ئه‌ندامی لیژنه‌ی دارایی له‌ په‌رله‌مانی كوردستان، به‌ (باسنیوز)ی راگه‌یاند: "تەوەرەکانی کۆبوونەوەکە، له‌سه‌ر مووچه‌ی فه‌رمانبه‌ران و وردەکاری  زۆر بوو لە بارەی راپۆرتی دووه‌می چاكسازی، کۆبوونەوەیەکی باش و بەسوود بوو".

No description available.