دكتۆرە باخان و كەمپینچیانی شار
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 13/06/2021

دكتۆرە باخان و كەمپینچیانی شار

زۆر لەمێژە هاوار دەكەم، هەرچی كەمپین و مەمپین و هاتوهاواری زۆربەی چالاكوانانی زۆنی سەوز و نیلیە، نە جووڵەی خۆڕسكانەیە، نە ناڕەزایی دەربڕینە لەئاست ستەم، نە دەنگی ئازادە لەئاست گەندەڵی و كەموكوڕی، بەڵكوو زۆربەی هەرە زۆریان بە یەك چەقەنە یان یەك فیكە لە یەك شوێنی گوماناویەوە دەجووڵێنرێن، ئامانجەكەش دژایەتیی زۆنەكەی ترە، دژایەتیی ئەوەیە كە لە هەولێر دەگوزەرێ، بەكورتی و بە كوردی دژایەتیی پارتیە، ئەگەر بڕواش ناكەن، فەرموون بە كەمێك ویژدان و مسقاڵێك عەقڵەوە، لە كەیسەكەی دكتۆرە باخان و دایكە بەتەمەنەكەی و ئەندامانی ماڵباتەكەی بڕوانن و بیرێك لە هەڵوێستی ئەو كەمپینچیانەی شار بكەنەوە.

خانمە پزیشكێك، بەناوی دكتۆرە باخان، لە هەڵەبجەی شەهیدەوە، بوێرانە دەستی لە ژیانی خۆی شوشت و بە كۆمەڵێك فایل و بەڵگەوە، هاتە بەردەم مایكەكان و لەئاست گەندەڵیەكانی كەرتی تەندروستیی پارێزگای هەڵەبجە دەنگی هەڵبڕی، دەزگا ئەمنیەكانی سلێمانی كە سەر بە یەكێتیی نیشتمانیی كوردستانن و لەنێو یەكێتییشدا سەر بە تاقمی خیانەتی ١٦ی ئۆكتۆبەرن، بەعسئاسا هەڕەشەی كوشتنیان لێ كرد، دكتۆرە باخان هاتەوە بەردەم مایكەكان و گوتی: ”خەڵكینە، لەپای ئاشكراكردنی كەیسی گەورەی گەندەڵی، هەڕەشەی كوشتنی خۆم و منداڵەكانمم لێ دەكرێت“، كەچی نقە لە بەردەوە هات و ورتە لە كەمپینچییە دووڕوو و درۆزنەكانی زۆنی سەوزەوە نەهات.

پاشان هێزێكی ئەمنیی سەر بە یەكێتی، بە چەندین ئۆتۆمبێلی سەربازی و بە هێزێكی زۆر و كامیل عەتادەوە، هەڵیانكوتایە سەر ماڵی دكتۆرە باخان و دەستگیریان كرد و دەستیان بەسەر مۆبایل و ئامێرەكانی پەیوەندییدا گرت، ئەو خانمە پزیشكە ماوەیەكی لەنێو زینداندا بردە سەر، كەس هەڵوێستی نەبوو! ئنجا پاش ئەوەی بە بڕیاری دادوەر ئازاد كرا، دیسان دكتۆرە باخان هاتەوە بەر مایكەكان و هاواری كرد: ”خەڵكینە، لەپای ئاشكراكردنی چەندین كەیسی گەندەڵی كە پارەی ئێوەیە و خوراوە، دەزگا ئەمنیەكانی سەر بە یەكێتی بە ناشرینترین شێوە هەڵیانكوتایە سەرم و لە زیندانیان ئاخنیم و ستەمێكی گەورەیان لێ كردم“، ئەو جارەشیان حەرام! دەنگ لە دار و بەردەوە هات و دەنگ لە كەمپینچیەكانەوە نەهات، نە لە هەڵەبجە و نە لە سلێمانی و نە لە گەرمیان و نە لە دەڤەری راپەڕین!

دكتۆرە باخان بۆ ئەوەی ژیانی خۆی و فایل و بەڵگەگەلی كەیسەكانی گەندەڵی پارێزراو بن، بەنهێنی خۆی گەیاندە هەولێر و لە هەولێریش دیسان هاتەوە بەر مایكەكان و هەموو بەڵگەكانی بێمەنتانە خستەوە روو و هاواری كرد بۆ هەموان: ”خەڵكینە ژیانی خۆم و ماڵباتم لە مەترسیدایە، تكایە خەمێك لەم كەیسە و لەو هەموو ملیۆن دۆلارە دزراوە و لە ژیانی خۆم و ئەندامانی ماڵباتەكەم بخۆن“، خۆشبەختانە لە هەولێرەوە لیژنەی لێكۆڵینەوە لەو كەیسە دروست كرا، ئەمما خوا هەڵناگرێ ئەمجارەشیان دەنگ لە دیوارەوە هات و دەنگ و هەڵوێستمان لەو كەمپینچییانەی زۆنی سەوز نەبیست و نەبینی!

ئنجا دەزگا ئەمنیەكانی سلێمانیی سەر بە یەكێتی، بە هەمان هێز و جبەخانە و عەتادەوە هەڵیانكوتایە سەر ماڵی دایكی دكتۆرە باخان لە زۆنی سەوز و گەورەترین سووكایەتیان بە خۆی و بە خوشكەكەی دكتۆرە باخان كرد، هۆكارەكەش تەنیا ئەوە بوو، كە دكتۆرە باخانی كچی ئەو ماڵباتە، باسی گەندەڵیەكانی كەرتی تەندروستیی كردووە، دایكی دكتۆرە باخان، ژنێكی تا بڵێی رۆحسووكی بەتەمەنە كە دەیان ساڵ وەك پەرستارێكی میهرەبان و هێژا و سەربەرز، لە نەخۆشخانەكانی زۆنی سەوزدا خزمەتی خەڵكی كردووە، بە گۆچانێكەوە هاتە بەر مایكەكان و هاواری بۆ خەڵك و بۆ هەموو دنیا كرد: ”ئەی هاوار ئێمە تاوانمان چیە؟ بۆچی هێزی ئەمنی دێتە سەرمان و سووكایەتیمان پێدەكات و هەڕەشەمان لێدەكات، خۆ سەردەمی بەعس نیە! من چیم كردووە جگە لە خزمەتكردنی خەڵك و ئەم وڵاتە؟“ سەیرە! ئەمجارەش، كەمپینچییانی زۆنی سەوز (صم بكم عمي) واتە كەڕ و لاڵ و كوێر بوون!

پرسیارێك: ئەرێ لەئاست كەیسی دكتۆرە باخان و دایكی و ماڵباتەكەی و ئەو گەندەڵی و ستەمە گەورەیەدا، كوان ئەوانەی لەسەر رووداوێكی هاتوچۆ لە هەولێر، لە سلێمانیەوە هەڵوێستیان دەردەبڕی؟ كوان ئەوانەی لە شاشەكانەوە سنگیان دەردەپەڕاند و هاواریان دەكرد: ”نا بۆ ستەم و گەندەڵی!“ كوان ئەوانەی هەر رووداوێكی زۆر بچووكیش لە هەولێر و دهۆك رووی دەدا، پەنجا لاپەڕەی ئەی فۆڕیان بە دروشمەوە لەسەر سنگیان رادەگرت و هاواریان دەكرد: ”نا بۆ زوڵم و ستەم“؟ كوان ئەوانەی لە ئاست گریان منداڵانی شەهیدی پێشمەرگە بزەی پێكەنینیان دەهات و لە هەمان كاتدا، فرمێسكی درۆیینەیان بۆ منداڵێكی یەكێك لە دەستگیركراوەكانی بادینان دەڕشت؟ ئەرێ زوڵم و گەندەڵی لەوەی دكتۆرە باخان زیاتر و دیارتر و نزیكتر هەیە؟

ئەرێ لە كەیسی دكتۆرە باخان و دایكی و ماڵباتەكەیدا، كوان ئەوانەی لەئاست فرۆشتنی كەركووك و خورماتوو و خانەقین و خیانەتی ١٦ی ئۆكتۆبەر بێدەنگ بوون، كەچی هاواریان لەدژی لابردنی پارێزبەندی لەسەر پەرلەمانتارێكی ئیسلامی دەكرد؟ كوان ئەوانەی لەئاست كۆمەڵكوژكردنی خێزانی میدیاكار ئامانج بابانی و تەسلیمكردنی مستەفا سەلیمی بێدەنگ بوون و هاواریان لەدژی حوكمێكی ئاسایی دادگای هەولێر دەكرد؟ لە هەمووی سەیرتر، كوان ئەو پزیشك و كارمەندە تەندروستییانەی زۆنی سەوز، كە لە دژی دواكەوتنی چەند رۆژێكی مووچە، مانیان دەگرت و نەخۆشخانەكانیان بەجێ دەهێشت؟ بەڕاست دكتۆرە باخان خانمە پزیشكێكی هاوڕێ و هاوكاری ئێوە نیە؟ دایكی دكتۆرە باخان دە هێندەی ئێوە لە نەخۆشخانەكاندا خزمەتی نەكردووە؟ ئەی كوا هەڵوێستی ئێوە؟ كوا مانگرتن و خۆپیشاندان و كەمپینتان؟

بۆیە ئەی كەمپینچییانی شار و زۆنی سەوز، تكایە ئیتر كەستان بەو قسەیە قەڵس مەبن كە دەڵێین: كەمپین و مەمپینی ئێوە، بە یەك چەقەنە و یەك فیكە، لە شوێنێكی ترەوە دەجووڵێنرێت و فڕی بەسەر ماف و ئازادیەوە نیە، ئێوە پشتتان لە هەموو گەندەڵی و زوڵم و تاوانەكانی زۆنەكەی خۆتان كردووە و رووتان لە هەولێر و لە پارتیە، زۆنی سەوزیش كە ئێوەی لێ دەژین، خراپترین زۆنی نەك هەر كوردستان بەڵكوو هەموو عێراقیشە لەڕووی نەبوونی ئازادیی رادەربڕین و بوونی تاوان و دزی و گەندەڵی و قاچاخچێتیەوە، خۆشبەخت و عاقڵ ئەو كەسەیە كە هەر لە سەرەتاوە بڕوای بە هیچ كەمپین و مەمپین و جووڵە و دروشمێكی ئێوە نەكردووە و هەمیشە فشەی پێیان هاتووە.