هاوپەیمانییەکەی سەدر: هەڵبژاردنی پێشوەختە هەرگیز دواناخرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

هاوپەیمانییەکەی سەدر: هەڵبژاردنی پێشوەختە هەرگیز دواناخرێت

ئەندامێکی هاوپەیمانیی سائیرون، کە موقتەدا سەدری رێبەری رەوتی سەدر رێبەرایەتیی ئەو هاوپەیمانییە دەکات، رایدەگەیەنێت، هەڵبژاردنی پێشوەختەی پەرلەمانی عێراق هەرگیز دواناخرێت.

مەحمود زەجراوی، ئەندامی هاوپەیمانییەکە رایگەیاندووە: بەشێک لە لایەنەکان و سیاسەتمەداران ترسی شکستهێنانیان لە هەڵبژاردنی پێشوەختە هەیە، چونکە ”بە درێژایی ساڵانی رابردوو شکستیان خواردووە و شەقامی عێراقی رەتی کردوونەتەوە“.

مەحمود زەجراوی لە لێدوانێکدا بۆ ماڵپەڕی (شەفەق نیوز)، ئاماژەی بەوە کردووە، کە ئەو لایەن و سیاسەتمەدارە شکستخواردووانە بە هەموو رێگایەک هەوڵی دواخستنی هەڵبژاردنی پێشوەختە دەدەن بۆ ئەوەی دەسەڵاتیان بەردەوام بێت.

ئەو ئەندامەی هاوپەیمانیی سەدر پێی وایە تانەدان لە یاسای هەڵبژاردن بەشێکە لە هەوڵی ئەو شکستخواردووانە بۆ دواخستنی هەڵبژاردنی پێشوەختە، کە ”هەرگیز دواناخرێت“، چونکە کۆدەنگییەکی سیاسی و میللی لەسەر پێویستیی هەڵبژاردنەکە هەیە.

مەحمود زەجراوی جەختی لەوە کردووەتەوە، کە تەنەنات ئەگەر دادگای باڵای فیدراڵی تانەکانی پەسەند کرد، تەنیا چەند بڕگەیەکی یاساکە دەگرێتەوە و پەرلەمان ”بە کاتێکی کەم“ ئەو بڕگانە هەموار دەکاتەوە.

پێشتر بەهار مەحمود، ئەندامی لێژنەی یاسایی لە پەرلەمانی عێراق رایگەیاندبوو: بەشێک لە لایەنە سیاسییەکان لە دادگای فیدراڵی تانەیان لە یاسای نوێی هەڵبژاردن، بە تایبەت بڕگەی فرەبازنەیی هەڵبژاردنەکە، داوە و بەهۆی تانەی ئەو هێز و لایەنە سیاسییانە، هەڵبژاردنی پێشوەختە جارێکی دیکە دوادەخرێت.

مستەفا کازمیی سەرۆک وەزیرانی عێراق بە گوشاری خۆپیشاندەران و لەسەر رێنمایی ئایەتوڵڵا عەلی سیستانی، رۆژی 6-6-2021ـی بۆ ئەنجامدانی هەڵبژاردنی پێشوەختەی پەرلەمان دیاری کرد.

دواتر ئەنجوومەنی وەزیرانی عێراق لەسەر داوای کۆمسیۆنی باڵای سەربەخۆی هەڵبژاردنەکان، وادەکەی بۆ رۆژی 10-10-2021، دواخست.