پەرلەمانتارێكی هەدەپە: توركیا كەوتووەتە دۆخێکەوە هاووڵاتییان ناتوانن بژیوی خۆیان دابین بکەن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

پەرلەمانتارێكی هەدەپە: توركیا كەوتووەتە دۆخێکەوە هاووڵاتییان ناتوانن بژیوی خۆیان دابین بکەن

گارۆ پایلان، پەرلەمانتاری پارتی دیموكراتی گەلان (HDP)، لە وتارێكدا لەناو پەرلەمانی توركیا، باسی لە خراپیی رەوشی ئابووریی توركیا كرد و، رەخنەشی لە حكوومەت گرت بەوەی باجی لەسەر هەموو شتێك زیاد كردووە و ئاماژەی بۆ ئەوەش كردووە توركیا كەوتووەتە دۆخێكەوە هاووڵاتیان ناتوانن سكی خۆیان تێر بكەن.

پایلان گوتیشی: "حكوومەت باجی لەسەر بەنزین، كەلوپەل، خۆراك، كارەبا و گازی سروشتی زیاد كردووە، كە ئەمە گەورەترین زیانە بۆ هەژاران، چونكە هەژاران بەردەوام پێویستیان بەو شتانەیە، بەڵام باج لەسەر دەوڵەمەندەكان زیاد ناكات، ناكرێت و بێویژدانییە دەوڵەمەند باجی لەسەر زیاد نەكرێت و كۆمپانیاكان باجیان لەسەر زیاد نەكرێت، بەڵام لەسەر هەژاران زیاد بكرێت و پارەی ئەو باجەش بدەیت بەو میدیاكارەی سەر بە خۆتن".

ئەو پەرلەمانتارەی هەدەپە ئاماژەی بەوەش كرد: "رەجەب تەیب ئەردۆغان سەركۆماری توركیا داوای (گەردن ئازایی) لە هاووڵاتییان كردووە، پێم بڵێن بەو شێوەیە داوای گەردن ئازایی دەكەیت؟ هەژارەكان چۆن گەردنت ئازا دەكەن؟"

گارۆ پایلان گوتیشی: "توركیا كەوتووەتە دۆخێكەوە، كە هاووڵاتییانی ناتوانن سكی خۆیان تێر بكەن و بژیو و ڕەوشی ژیانیان رۆژ بە رۆژ بەرەو خراپی دەچێت".

ماوەی چەند ساڵێکە تورکیا تووشی قەیرانێکی قووڵی ئابووری بووە و خەڵکێکی زۆر بێکار بوون و ئەم دۆخە پاش سەرهەڵدانی پەتای کۆرۆنا خراپتر بووە و ئەمەش وای کردووە ڕەوشی ژیانی خەڵک لەو وڵاتە خراپتر ببێت و ئۆپۆزسیۆنی تورکیاش پێیان وایە حکوومەت بۆ چارەسەرکردنی قەیرانی ئابووری و دۆخی ژیانی خەڵک هەنگاوی کردەیی هەڵنەگرتووە.