گەشتوگوزاری چۆمان: بۆ پرۆژەیەکی گەشتیاری گۆمی فێڵاو بە مەرج دەدرێتە وەبەرهێنەر
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

گەشتوگوزاری چۆمان: بۆ پرۆژەیەکی گەشتیاری گۆمی فێڵاو بە مەرج دەدرێتە وەبەرهێنەر

 بەڕێوەبەری گەشتوگوزاری چۆمان دەڵێت بۆ جێبەجێکردنی پڕۆژەیەكی گەشتیاری لە گۆمی فێڵاو، قسەیان لەگەڵ وەبەرهێنەر كردووە، بەڵام بۆ جێبەجێکردنی پرۆژەکە مەرجیان داناوە.

 هەڵگورد محەمەد ناوەندەی، بەڕێوەبەری گەشتوگوزاری قەزای چۆمان بە (باسنیوز)ی راگەیاند: "بەهۆی سەرنجڕاكێشیی و بوونی كەشوهەوایەكی پاك و فێنك، رۆژانە ژمارەیەكی زۆری گەشتیار و هاووڵاتییانی شار و شارۆچكەكانی كوردستان روو لە گۆمی فێڵاو دەكەن، بۆیە بە پێویستی دەزانین كە چەند پڕۆژەیەكی گەشتیاری لە رێگەی وەبەرهێنەرەوە لە شوێنە جێبەجێ بکەین، كە ببێتە هۆكاری ئەوەی گەشتیاران و هاووڵاتییان زیاتر رووی تێ بكەن و خزمەتگوزارییان بۆ فەراهەم بكرێت، لە هەمان كاتیشدا پڕۆژەكە بە دێزاینێكی وابێت كە سیمایەكی جوان و سەردەمیانە ببەخشێت".

 گووتیشی: "بۆ جێبەجێکردنی پڕۆژەی گەشتیاری لە گۆمی فێڵاو، وەبەرهێنەران پەیوەندییان پێوە كردووین، بەڵام یەكێك لە مەرجەكانی ئێمە ئەوە بووە، كە لەم پڕۆژەیەدا بە هیچ شێوەیەك نابێ بلۆك و چیمەنتۆ بەكار بهێندرێت، بۆ ئەوەی شوێنەكە سیمای سروشتی و جوانی خۆی لەدەست نەدات، هەروەها داواكاریی وەبەرهێنەرانیش ئەوە بووە، تۆڕی كارەبای نیشتمانی بگەیەندرێتە گۆمەكە، بە هیواین لە ئایندەدا دەست بە جێبەجێکردنی پڕۆژەكە بكرێت".

 گۆمی فێلاو لە دەڤەری باڵەكایەتیی سنووری قەزای چۆمان، بە دووریی نزیكەی 160 كیلۆمەتر لە باكووری رۆژهەڵاتی هەولێر هەڵكەوتووە، یەكێكە لە شوێنە سەرنجڕاكێشەكانی هەرێمی كوردستان، لە هەموو وەرزەكانی ساڵدا هاووڵاتییان و  گرووپە گەشتیارییەكان ڕووی تێدەكەن.