كەركووك.. لە كۆڕێكدا كتێبی هونەریی (چۆڵە چرا)ی دەناسێندرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كەركووك.. لە كۆڕێكدا كتێبی هونەریی (چۆڵە چرا)ی دەناسێندرێت

بڕیارە سبەی یەکشەممە لە شاری کەرکووک، لەلایەن سەندیکای هونەرمەندانی کوردستان /لقی کەرکووکەوە کۆڕێکی تایبەت بۆ ناساندنی كتێبی (چۆڵە چرا)ی هونەرمەندی كورد كاوە فەقێ‌زادە ڕێک بخرێت.

 پاشان خەڵات دابەشی سەر چوار كەسایەتی هونەری شارەكە دەكرێت.

ئەمڕۆ شەممە 29/5/2021، سیروان عومەر، سەرۆكی لقی كەركووكی سەندیكای هونەرمەندانی كوردستان بە (باسنیوز)ی ڕاگەیاند: "كاتژمێر 4ی ئێوارەی سبەی یەكشەممە 30/5/2021، لە هۆڵی شەهید سیروان تاڵەبانی لە شاری كەركووك چالاكییەكمان دەبێت كە بریتییە لە ناساندنی كتێبی (چۆڵە چرا)ی میوزیكژەن و ئاوازدانەری كوردی خەڵکی مەهاباد، كاوە فەقێ زادە".

گوتیشی: "ناوەڕۆكی كتێبەكە زیاتر شیكارییەكی میوزیكی ناوچەی موكریانە و باسی بەیت، حەیران، لاوک، هۆرە و شێوازەكانی دیکەی هونەری مۆسیقای ناوچەكەکانی کوردستان دەكات و كتێبێكی دەگمەنە و سیڤییەكیشی لەگەڵە، ئێمە وەكوو لقی كەركووكی سەندیكای هونەرمەندانی كوردستان پێمان باش بوو ئەو كتێبە بناسێنین، بەتایبەت بە هونەرمەندان و لە چالاكییەكەی ئێوارەی سبەی مامۆستا چالاك بەڕێوەبەری پەیمانگەی هونەرە جوانەكانی كەركووك قسە لەسەر كتێبەكە دەكات و لە كۆتاییدا چوار خەڵات دەبەخشرێت بە چوار كەسایەتیی هونەری لە هەر چوار بەشەكەی سەندیكا".

کاوە فەقێ‌زادە، هونەرمەندی ئاوازدانەر، میوزیکژەن و پسپۆڕی بواری مۆسیقا، خەڵکی مەهابادە و بەرپرسی ئۆرکێسترای سەمفۆنیکی موکریانە و هەتا ئێستا چەندین بەرهەمی بەپێزی لە بواری مۆسیقای کوردیدا پێشکەش کردووە و زیاتر کار لەسەر بەیتە کوردییەکان دەکات.