26 سال ل سه‌ر وه‌غه‌را هونه‌رمه‌ند ته‌حسین تەها ده‌رباز بوون
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

26 سال ل سه‌ر وه‌غه‌را هونه‌رمه‌ند ته‌حسین تەها ده‌رباز بوون

26 سال ل سه‌ر وه‌غه‌را دوماهیێ یا هونه‌رمه‌ندێ ناڤدارێ كورد و به‌رنیاسێ ده‌ڤه‌را به‌هدینان، خودێ ژێ رازى(ته‌حسین تەها)ى ده‌رباز بون، لێ هێشتا ستران و هونه‌رێ وى ل جادده‌یا ھونەری و ناخێ خه‌لكى دا زێندى یه‌ و نه‌هاتیه‌ ژبیر كرن.

ئه‌ڤین حسێن، سه‌رۆكا سه‌ندیكا هونه‌رمه‌ندێن كوردستانێ لقا دهۆكێ لدور وه‌غه‌را هونه‌رمه‌ندێ ناڤبرى بو (باسنیوز) دا دیاركر: "هونه‌رمه‌ندێ خودێ ژێ رازى (ته‌حسین تەها) ئه‌و ستێرا هونه‌رێ كوردى ئه‌وێ تا نوكه‌ مایه‌ زێندى و ساخ ل رێكه‌فتى 25/5/1941 ل سنورێ ناحیا(بێبو) هاتیه‌ سه‌ر دونیایێ و ژ بنه‌ماله‌كا كورد په‌روه‌ر و خودان خزمه‌ت بویه‌، و ل سالا(1955) ل دهۆكێ ده‌ست ب خاندنا خو یا قوناغا ئاماده‌یى كریه‌ و ل سالا(1958) ئێكه‌م سترانا وى ب ناڤێ(ئاشكرا ناكه‌م) هاتیه‌ توماركرن".

سه‌رۆكا سه‌ندیكا هونه‌رمه‌ندێن كوردستانێ لقا دهۆكێ بو (باسنیوز) ئاماژه‌ ب وێ چه‌ندێ ژى دا: ل سالا (1961) هونه‌رمه‌ندێ خودێ ژێ رازى(ته‌حسین تەھا) گه‌هشتیه‌ ناڤا رێزێن شوره‌شێن كوردى و دگه‌ل خالێ خو ب ناڤێ(عومه‌ر) پشكدارى د شوره‌شێن كوردى دا كریه‌ و دیسان ل سالا (1963) جاره‌ك دى ژ پێخه‌مه‌ت باوه‌رنامێ، د ڤه‌دگه‌ریته‌ باژێرێ (به‌غدا) بو ته‌مامكرنا خاندنا په‌یمانگه‌هێ.

ئەڤین حسێن سه‌رۆكا سه‌ندیكا هونه‌رمه‌ندێن كوردستانێ لقا دهۆكێ بو (باسنیوز) ئاماژه‌ ب وێ چه‌ندێ ژى دا: "هونه‌رمه‌ند ته‌حسین تەها ل (ئێزگه‌هێ كوردستان) خزمه‌ته‌كا مه‌زن یا پێشكێشى هونه‌رێ كوردى كریە و ل سالا (1983) ئێكه‌مین كاسیتا (ڤیدیو) یا خودێ ژێ رازى هاتیه‌ دروستكرن و ل سالا (1991) دگه‌ل هاتنا نه‌خوشى و ئاواره‌بونێ، دگه‌ل كه‌س و كار و ملله‌تێ خو ئاواره‌ى وه‌لاتێ ئیرانێ دبیت".

سه‌رۆكا سه‌ندیكا هونه‌رمه‌ندێن كوردستانێ لقا دهۆكێ ئاماژه‌ ب وێ چه‌ندێ ژى دا: "ژبلى گوتنا سترانان، شاره‌زایه‌كا باش د ژه‌نینا ئامیرێ(عودێ) دا هه‌بویه‌ و د هه‌مان ده‌م دا به‌رده‌وام بویه‌ ل سه‌ر گوتن و توماركرنا سترانان تا وى ئاستى مالا وى وه‌كه‌ ناڤه‌نده‌كا هونه‌رى هاتیه‌ نیاسین و خزمه‌ته‌كا مه‌زن ل ناڤا مالا وى دا پێشكێشى هونه‌رێ بویە خۆدێ ژێ رازی هژماره‌كا زور یا سترانان تومار كرینه‌ و به‌لاڤ بوینه‌ و ژ سترانێن وى ب ناڤێ(تو خه‌ون بوى خه‌مى گاڤا، دایێ وه‌لات شرینه‌، نه‌ورۆز، من خه‌م ده‌ریایه‌كا كویره‌) ئه‌و ستران بونه‌ كو ل سه‌ر زمانێ هه‌ر كه‌سه‌كێ دهێنه‌ گوتن و زێده‌بارى كو سترانێن (ئه‌ڤینى، نه‌ته‌وه‌ى، خه‌ریبیى) و هژماره‌كا دیتر یا سترانان تومار كرینه‌ و گوت ژى: ل سالا1994 قه‌ستا وه‌لاتێ(هوله‌ندا) دكه‌ت و ل رێكه‌فتى 28/5/1995 رۆژه‌كا وه‌كه‌ ئه‌ڤرۆ وه‌غه‌را دوماهیێ دكه‌ت و ل رێكه‌فتى 4/6/1995 ته‌رمێ وى گه‌هشتیه‌ هه‌رێما كوردستانێ ول گورستانا (ئامێدیێ) هاتیه‌ ڤه‌شارتن".

دوماهى ئاخفتنا خو دا، سه‌رۆكا سه‌ندیكا هونه‌رمه‌ندێن كوردستانێ لقا دهۆكێ ب رێكا (باسنیوز) ئه‌و چه‌نده‌ نه‌ڤه‌شارت: "وه‌كه‌ كاره‌كێ بچویك به‌رامبه‌ر خزمه‌تا مه‌زن یا خودێ ژێ رازى، ل سه‌نته‌رێ باژێرێ دهۆكێ (پاركه‌كا گشتى) ل تاخێ زه‌رى لاند هاتیه‌ دروستكرن و په‌یكه‌رێ هونه‌رمه‌ند ته‌حسین تەھا ناڤ پاركێ دا ب باشترین شێوه‌ هاتیه‌ دروستكرن و ناڤێ پاركێ ژلایێ خه‌لكى ڤه‌ وه‌كه‌(پاركا ته‌حسین تەها)ی، هاتیه‌ نیاسین و راسته‌ به‌رى(٢٦ ) سالان ته‌حسینى وغه‌ر كریه‌، لێ تا نها هونه‌ر و ده‌نگێ وى ل ناخێ خه‌لكێ كوردستانێ دا زێندى مایه‌ و دێ زێندى مینیت".