كتێبی شیعر و ئەزموونكاری چاپ و بڵاو كرایەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كتێبی شیعر و ئەزموونكاری چاپ و بڵاو كرایەوە

كتێبی "شیعر و ئەزموونكاری" نوێترین كتێبی نووسەر و توێژەرە "ئارام سدیق"ـە، کە وتاری ڕەخنەیی و شیکارییە لەسەر چەند شاعیرێكی نەوەی نوێ و لە دوتوێی 194 لاپەڕەدا لە ناوەندی ڕەهەند لە سلێمانی چاپ و بڵاو كراوەتەوە.

ئارام سدیق نووسەری كتێبتی "شیعر و ئەزموونكاری" بە (باسنیوز)ی ڕاگەیاند:  "كتێبی شیعر و ئەزموونكاریی؛ وتاری شیکاری و ڕەخنەییە لەسەر شیعری نەوەی نوێ و من لەم كتێبەدا هەوڵم داوە كار لەسەر بەرهەمی بەشێك لە شاعیرانی نەوەی نوێ بكەم، بەتایبەت ئەو شاعیرانەی لە دوای ساڵی ٢٠٠٠وە دەستیان بە شیعرنووسین و بڵاوكردنەوەی بەرهەمەكانیان كردووە و ئەو شاعیرانەی لەم كتێبەدا ئاماژەیان پێدراوە خاوەنی كۆمەڵێك ئەزموونی جیاجیان و تێیاندایە خاوەنی چەند كتێبێكی شیعرییە و تیاشیاندایە تەنها چەند شیعرێكی كەمی هەیە."

ئارام سدیق ئەوەشی خستە ڕوو: "كتێبەكە وەڵامێكە بۆ ئەو پرسیارەی ئایا ئەم نەوە نوێیەی شیعر دەنووسێت، نەوەیەكە تا ئێستا ونە و نەیتوانیوە بوونی خۆی بسەلمێنێت، یان نەوەیەكی ئەزموونكارە؟ بێگومان خوێنەر لە كۆی كتێبەكەدا وەڵامی ئەم پرسیارەی بۆ دەردەكەوێت."

ئەو نووسەرە ئاماژەی بۆ ئەوەش كرد: "كە لە كۆی كتێبەدا بە شێوەیەكی چڕ هەوڵم  داوە چەند لایەنێكی نێو دەقە شیعرییەكان بخوێنمەوە و لەوێوە هەوڵی دەرخستی تایبەتمەندییەكانی هەر شاعیرێك بدرێت و لە قەبارەی خۆییدا بخرێتە ڕوو كە لەڕێی كەمترین وشە و ڕستەوە، زانیاریی زۆر لەسەر هەر شاعیرێك بە ڕوونی و دوور لە تەمومژ و بارگاویكردنی نووسینەكە بە چەمكی قەبە كە پێویست نین، بخرێتە ڕوو".

گوتیشی: "ئەم كتیبە دیزاینی بەرگی لە لایەن "ئیبراهیم ساڵح"ەوە بۆ ئەكراوە، دیزاینی ناوەوەشی لە لایەن رەنجدەر جەبارەوە بۆ كراوە و بە تیژاژی 500دانە و لە 194 لاپەڕەدا بڵاو کراوەتەوە.