كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×
هەرمن ئەحمەد 24/05/2021

مەترسیی گەورە، نەمانی ئیرادە و لەباربردنی خەونی سەركەوتنە

خاتوو جێنین پلاسخارت نوێنه‌ری تایبه‌تی سكرتێری گشتیی نه‌ته‌وه‌یه‌كگرتووه‌كان لە عێراق، لە دیبەیتی (یەكڕیزی و دەستوور)دا، گوتەیەكی پێشكەش كرد و لەنێو قسەكانیدا داوای یەكڕیزی و پێشخستنی رەوشی هەرێمی كوردستانی كرد و گوتیشی: ”وای مەبینن ئەم قەوارەی هەرێمی كوردستانە بە گرەنتی هەر وا دەمێنێتەوە“، لەو رۆژەوە، زۆر پەرلەمانتار و میدیاكار و چاودێر و نووسەری كورد، نان و پیاز بەو قسەیەوە دەخۆن و دنیایان لێ كردووین بە چەرمە چۆلەكە، چونكە ئەوان لەوپەڕی بێئیرادەیی و لاوازی و رەشبینییەوە، ئەو قسانەی بلاسخارت شی دەكەنەوە.

شرۆڤەی ئەو نووسەر و سیاسەتمەدارانە بۆ قسەكەی بلاسخارت، بە شێوەیەكە كە دەیانەوێ بە خەڵك بڵێن، ئێستا نا دەمێكی تر قەوارەی سیاسیی هەرێمی كوردستان دادەڕمێت! من نازانم ئەوان خۆیان رەشبین و ئیرادە لاواز و بێهێزن، یان دەیانەوێ خەڵكی كوردستان بگەیەننە دۆخی ئەوپەڕی رەشبینی! بەداخەوە ئەوانە بە شێوەیەك دەئاخڤن و دەنووسن، هەر دەڵێی بێ ئاگان هەم لە مێژووی كورد و كوردستان و هەم لە هاوكێشە نێودەوڵەتیەكانی ئەم ناوچەیە و هەم لە مێژووی ٣٠ ساڵەی قەوارەی سیاسیی هەرێمی كوردستان، كە لە دوای پەسەندكردنی دەستووری هەمیشەیی عێراق (ساڵ ٢٠٠٥)ەوە، بووە بە هەرێمێكی سیاسیی یاسایی و دەستووری و دانپێدانراو لەسەر ئاستی عێراق و هەموو دونیاش.

ئەو كێشانەی هەرێمی كوردستان كە خاتوو بلاسخارت لەو وتەكەیدا دركاندنی، هیچیان شتی تازە نەبوون پێوەند بە هەرێمی كوردستان، دەیان جاریش شاندی بیانی و دۆستانی كورد و كوردستان ئەم قسانەیان بە گوێی ئێمەدا داوە، پێشیان گوتووین كە ئەگەر فڵانە هەنگاو نەهاوێژن، ئەزموونەكەتان لە مەترسیدایە.

بێگومان خۆشمان دەزانین كە لە سەرەتا ساڵی ١٩٩٢ەوە كاتێ كە هەرێمی كوردستان وەك قەوارەیەكی سیاسی دروست بوو و بووە خاوەنی حكوومەت و پەرلەمانی خۆی، تا ئێستاش هەر لە مەترسیدا بووە، گیرانی چواردەوری هەرێمی كوردستان بە چوار وڵاتی داگیركەری كوردستان، مەترسیەكە كە تا ئەو چوار دەوڵەتە هەبن و بەهێز بن، هەر دەمێنێ و هەرگیزیشی تەواو نابێت، هەروەها كێشەی ناوخۆییشمان هەبووە و هەیە، دەشزانین ناتەبایی، دووئیدارەیی، تەنانەت شەڕی نەگریسی ناوخۆ، كەمئەزموونی لە بەڕێوەبردندا، گەندەڵی، ئابووریی لاواز، نەبوونی یەك هێزی یەكگرتووی نیشتمانیی پێشمەرگە و..هتد، هەموو ئەمانەش مەترسی و تەحەدیاتن دەبێ هەوڵ بدەین نەیانهێڵین.

سوپاس بۆ خوا و بۆ دڵسۆزان و خەمخۆران، هەرێمی كوردستان، وێڕای هەموو ئەو مەترسی و هەڕەشە دەرەكی و ناوخۆییانە، توانیویەتی ٣٠ ساڵ بەردەوام بێت، ئێمە قۆناغی زۆر لە ئێستا سەختترمان بڕی، شەڕی ناوخۆ كە هێشتا مەترسییەكانی ماوە، بەڵام قۆناغێكی سەخت بوو تێمانپەڕاند و ئێستا شەڕەكە زیاتر میدیاییە، هەڵمەتێكی باشی ئاوەدانكاری سەرەڕای هەموو كەموكوڕییەكانی، لە ماوەی ئەم ٣٠ ساڵەدا بەڕێوە چوو و ئێستا شارەكانی هەرێمی كوردستان بەراورد بە شارەكانی باشوور و ناوەڕاستی عێراق، لە هەموو روویێكەوە بەهەشتی سەر زەوین، هەوڵی باش هەیە بەتایبەتی لەم دوو سێ ساڵەی دواییدا بۆ یەكگرتنی هێزی پێشمەرگە، تەناهی و ئەمنیەت تا رادەیەكی باش بەرقەرارە، هەروەها دوو ساڵە دەبینین رووبەڕووبوونەوەیەكی باش و بەپلان لە دژی گەندەڵی لەئارادایە.

بەڵام گەر بپرسین: گەندەڵی ماوە؟ بەڵێ بەداخەوە ماوە، ئاسەواری دووئیدارەیی هێشتا بە سەختی ماوە؟ بەڵێ ماوە، كێشەی ئابووری و ئیدارەدانمان ماوە؟ بەڵی ماوە، ئەی ئەمانە مەترسیی گەورە نین لەسەر هەرێمی كوردستان؟ بەڵێ مەترسیی زۆر جدیین و دەبێ بەسەریاندا زاڵ بین، لێ قسەی من لەسەر ئەوەیە، كە ئەم نووسەر و میدیاكار و سیاسی و پەرلەمانتارانە كاتێ گوێیان لە قسەكەی بلاسخارت بوو، دەتگوت هەنگوینیان لە دارا دۆزیوەتەوە، یاخود دەڵێی، هەرگیز قسەی وایان نەبیستووە! یان دەڵێی ئێمە ئاگامان لە هیچ یەكێك لەو كێشە و مەترسییانە نەبووە و نیە و چاوەڕێ بووین خاتوو بلاسخارت ئاگادارمان بكاتەوە!

لە راستیدا ئەگەر من بە پوختی و بە كورتی، رای خۆم دەربڕم، لەسەر دید و بۆچوونەكانی ئەو نووسەر و رۆژنامەوان و ئەكادیمی و پەرلەمانتار و چاودێر و سیاسییە كوردانەی كە قسەكانی خاتوو بلاسخارت بە (زەنگێكی زۆر مەترسیدار و سەرەتای رووخانی قەوارەی سیاسیی هەرێمی كوردستان) لێك دەدەنەوە بۆ خەڵك، دەڵێم: بوونی وڵاتانی داگیركەر و بەهێز لە چواردەورمان مەترسییەكی گەورەیە بە هەمیشەیی، بوونی ناتەبایی و ئاسەواری دووئیدارەیی مەترسییەكی گەورەیە، بوونی سیاسیی خائین و ناپاك و وڵاتفرۆش لەنێو نەتەوەكەمدا مەترسییەكی گەورەیە، بوونی دیاردەی گەندەڵی مەترسییەكی گەورەیە، یەكنەگرتنی هێزی پێشمەرگە مەترسییەكی گەورەیە، بەڵام:

لە سەروو هەموو ئەو مەترسییانەوە و لە هەموو ئەو مەترسییانە خەتەرتر بۆ هەرێمی كوردستان، ئەوەیە كە خەڵكی هەرێمی كوردستان ئیرادە و خواست و خەیاڵی سەركەوتن و زاڵبوون لەدەست بدات، ئەوەیە كە خەڵكی كوردستان بێئومێد و بێهیوا بكرێ، ئەوەیە كە ماشێنێكی میدیایی بە زمانی كوردی لە دژی خەون و هەنگاوی سەربەخۆیی كوردستان خرابێتە گەڕ، ئەوەیە كە سەدان میدیای كوردی و سۆشیال میدیای كوردی، لە دژی بەها باڵاكانی كوردستان لە دژی ئاڵای كوردستان و زمان و كولتوور و مێژووی كورد كار بكات، ئەوەیە كە بە سەدان بەناو نووسەر و میدیاكار و پەرلەمانتاری ناپاك لە میدیاكانەوە بە نەتەوەی خۆیان دەڵێن: تۆ شایانی سەربەخۆیی نیت شایانی دەوڵەت نیت تۆ بوودەڵە و هیچوپووچیت و بەكەڵكی هیچ نایەیت! ئەوەیە كە خەڵك لە دژی خیانەت و فرۆشتنی سەدا ٥١ی خاكی كوردستان و مووشەكبارانكردنی پایتەختەكەی، بێهەڵوێست بێت كەچی لێرەوە هاوخەمی بۆ بزووتنەوەی حەماسی فەڵەستین دەربڕێت... لە راستیدا ئەمانە مەترسیی گەورەن.

خوشك و برایان، تكایە مێژووی كورد و كوردستان بخوێننەوە، بزانن لە سێ چوار هەزار ساڵ پێش زایینەوە تا مووشەكبارانكردنی هەولێر لەلایەن میلیشیاییەكانی حەشدی شەعبیەوە لە ساڵی ٢٠٢١ی زایینیدا، چی بەسەر كورد و كوردستاندا نەهاتووە؟ بزانن چی لە دژی كورد و كوردستان نەكراوە؟ بزانن چەند هەزار جار خیانەتی گەورە بۆ لەباربردنی خەونی كوردان كراوە؟ ئنجا لە خۆتان بپرسن: ئەی كورد و زمانی كوردی چۆن ماون؟

هەرێمی كوردستان بەرهەمی نزیكەی شەش هەزار ساڵ هەوڵی بێوچانی مانەوە و بوونی نەتەوەیەكە، خوانەكردە ئەگەر ئەم جارەش بایەكە لە بەرژەوەندیی نەیارانی كورد هەڵبكات، دۆزی نزیكەی ٥٠ ملیۆن مرۆڤی بێدەوڵەت بەوە كۆتایی نایەت ئێمە روو بكەینەوە چیاكان، دڵنیا بن، یان دەبێ نەتەوەی كوردیش خاوەن دەوڵەتی سەربەخۆی خۆی بێت، یان هیچ نەتەوەیەك و وڵاتێكی ئەم ناوچەیە، ئارامی بە خۆیەوە نابینێت، بۆیە تكایە ئەگەر خۆتان ئیرادەتان لەدەست داوە كێشە نیە، بەڵام خەڵكی كوردستان بێئیرادە مەكەن.