من دوژمنی جووم یان دوژمنی موسڵمانانم!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
جەبار جەمال غەریب 24/05/2021

من دوژمنی جووم یان دوژمنی موسڵمانانم!

- من كوردم، لە دڵەوە بە ڕەچەڵەكی خۆم دڵخۆشم، با بڵێن ”كوردبوون موسیبەت“، با بڵێن ”تەنیا ئەوەی كە كوردیت، دەردەسەرییە“، لەگەڵ هەموو ئەوانەشدا هەر كوردم و هەر دەنگ بەسەر هەموو نەیارێكمدا بەرز دەكەمەوە.

- من كوردێكی موسڵمانم و ئەوەندەی ژمارەی ئەستێرەكانی ئاسمان نوێژم كردووە و ڕۆژووم گرتووە، كولتووری ئیسلامی، كە بووەتە بەشێك لە كولتووری كوردی، بەشێكیشە لە كولتووری من و ناتوانم ڕێزی نەگرم و دڵسۆز نەبم بۆی. ڕۆژانە نوێژ و ركاتەكانی دایكم دەژمێرم و دڵنیام بەشێك لە سەركەوتن و بوونم، پەیوەندیی بەو نزا نەبڕاوانەوە هەیە كە ئەو لە كاتی هەموو نوێژێكدا بۆمی دەنێرێ.

- خزم و دۆستەكانم بەشێكیان عیلمانی و نەتەوەیی و ماركسین و دەیانەوێ ئایین بگەڕێتەوە ناو چوارچێوەی مزگەوت و پیاوانی ئایینی هەرگیز تێكەڵی سیاسەت نەبن، دەیانەوێ بڵندگۆی مزگەوتەكان دەنگیان بەرز نەبێت و مەراسیمی ئایینی هەموو پانتایی كۆمەڵایەتی و فەزای گشتی داگیر نەكات، ژن ئازاد بێت و نەریتە كۆمەڵایەتییەكان بشكێنرێن و مەدەنییەت باڵ بەسەر هەموو شوێنێكدا بكێشێ. چالاكیی پیاوانی ئایینی و مەلا و بانگخوازان لە سنووری ماڵەكانیان و مزگەتەكانیاندا بێت.

- بەشێكی دیكە لە خزم و دۆستەكانم، ئیسلامیی عەیار بیست و چوارن، بانگخواز و وتاردەرن، ئەوان دەیانەوێ ڕەگی هەموو شتێك بەرنەوە سەر تەفسیری ئایینی و كۆمەڵگە لە ڕێگای یاساكانی ئیسلامەوە، جارێكی دیكە ڕێك بخەنەوە و سەلەفیی توندن و ریشیان لەسەر ناوكیانە، بە ڕەوای دەزانن هەموو هەلێك و موناسەبەیەك بۆ وتاری ئایینی و چالاكییەكی دینی بقۆزنەوە و ئازادیی ژن لە حیجاب و ناوماڵ و بە گوێڕایەڵیی مێردەكانیان دەبیننەوە.

مەبەستی ئەم وتارە
كورد بە هەموو ئەو ڕەنگانەوە كوردە، كۆمەڵگە بە هەموو ئەو گرووپانەوە كۆمەڵگەیە، بەڵام كێشەكە ئەوەیە، كورد كاریگەریی لەسەر سیاسەتی دنیادا چییە؟ ئایا ئەمریكا لە بڕیارەكانیدا پشت بە بیروڕای كورد دەبەستێ؟ ئایا دەوڵەتی ئیسرائیل ئاگای لە جنێو و پەسنەكانی كورد هەیە بۆی؟
ئایا عەرەبەكان، یان فەلەستینییەكان، دڵیان بە پشتگیریی كورد خۆشە؟

قسەیەكی ڕەق
- لەسەر هەموو كێشەیەكی جیهانی، شەڕی نێوان دوو دەوڵەت، پێكهەڵپڕژانێكی كۆمەڵایەتی، كولتووری، ئەگەر ڕەهەندێكی نەتەوەیی یان ئایینیی هەبێت، كوردی قوڕبەسەر كێچ دەكەوێتە كەوڵیەوە و شەو ناخەوێت و هاوار دەكات و ڕای خۆی بە هەموو كەس دەڵێت و بەسەر برایەكەیدا هاوار دەكات و دەست لە بینەقاقای هاوڕێكەی دەنێت و سینگی هاوسێكەیان ڕادەوەشێنێ و نامووسی هاوكارەكانی دەبات، لە تۆڕە كۆمەڵایەتییەكاندا ئاگر دەكاتەوە. دەبێ ڕای خۆی بەسەر هەمواندا بسەپێنێ و نەك تێیان بگەیەنێ، بەڵكوو هەموویان ملكەچی خۆی بكات.

- ئەو گرووپە زۆر و زەوەندانە بۆ هیچ كێشەیەكی ئیسنانی، كە ڕەگێكی ئایدۆلۆژیی نەبێت، با دنیاشی پێ كاول بێت، دەنگیان لێوە نایەت و بە كێشەی خۆیانی نازانن. كورد هەرگیز بیر لە كێشەی ژینگە و پیسبوونی هەوا و خاك و ئاو ناكاتەوە و شێرپەنجە با نیوەی ئینسان لەناو ببات، بە كێشەی خۆی نازانێت. با هەموو سامانی جیهان لە بەرهەمهێنانی ناپاڵم و تانك و چەكی كیمیایی خەرج بكرێت، كێشەی ئەو نییە. هەزاران منداڵی ئەفریقی لە برسان و لە بێئاوی بە ئازار و ژانەوە دەمرن، ئەو تەقەی سەری دێت.

- بۆ ئەوەی كورد هەڵوێستی هەبێت، دەبێ لە ناوخۆدا نەیار بدۆزێتەوە بەسەریدا هەڵشاخێ، كابرای ئیسلامی، سووتانی دەیان خانووی دووز و كەركووك و عەفرین و سنە و مهاباد نابینێت و لەسەر كوژرانی منداڵێكی موسڵمانی میانیمار ئاگری تێ بەردەبێت. كوژرانی گەنجێكی فەلەستینی مێشكی لەسەردا ناهێڵێ.

- كوردی دژە ئیسلامیش، كوژرانی قەشەیەكی فەڕەنسی بە مەسەلەی خۆی دەزانێ و دەست بە چاوی ئیسلامییەكانی كوردستاندا دەكات و دەیەوێ، تۆڵەی خوێنەكە لێرە بكاتەوە.

- دڵخۆشم، كە ئەوەندە ڕووحی ئینسانییت بەرزە، بە برینداربوونی منداڵێكی غەزە قوڕگت پڕ دەبێ لە گریان و فرمێسكت بۆ ناوەستێ و دەنگت دەلەرزێ.

- بەڵام كە دەبینم بوكو حەڕام هەشتا منداڵ لە قوتابخانەیەكدا دەكوژێ و تۆ گوێی خۆتی لێ كەڕ دەكەی، دڵنیا دەبمەوە، كە درۆ دەكەیت و هەرگیز كوژرانی منداڵ بەلاتەوە گرنگ نییە، تەنیا و تەنیا دەتەوێت هەڵوێستی سیاسی و حزبیی خۆت دەربڕی، دەنا ڕووحیەتی ئینسانی لای تۆ پوولێك ناهێنێ.

قسە ڕەقەكە
كوردی داماو، دەتوانی هاوڕێكەت بە هەڵوێستە توند و حزبییەكانت ئازار دەی، دەتوانی نەتەوەكەت سەدەیەكی دیكەش بە كێشمە كێشمی ناوخۆوە بخافڵێنی، بەڵام كوردی نەگبەت، هەر هەڵوێستێكت لەسەر كێشە جیهانی و نیودەوڵەتییەكان هەیە، هیچ كەس ئەوەندەت بایەخ پێ نادا گوێت لێ ڕاگبرێت و بە دەنگە سەیر و سەمەرەكەت سەری خۆی بێشێنێ.

كوردی ئازا و بەجەرگ، لەپێشەوە دەبێ تۆ ببی بە (شتێك)، دنیا ئەوەت پێ ڕەوا ببینێ، كە ئیسنانی، كە كوردی، كە موسڵمانی، ئەو كاتە دەتوانی هەڵوێستی دینی، یان نەتەوەیی، یان ئینسانییت هەبێت.