لە كەركووك یەكەمین ژمارەی بڵاوكراوەی كارێز چاپ كرا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

لە كەركووك یەكەمین ژمارەی بڵاوكراوەی كارێز چاپ كرا

كتێبخانەی كارێز لە شاری كەركووك، یەكەمین ژمارەی بڵاوكراوەی (كارێز)ی چاپ کرد و خاوەنی كتێبخانەی كارێز ناوەڕۆكی بڵاوكراوەەکە ئاشكرا دەكات.

لەمبارەوە ئەمڕۆ چوارشەممە 19/5/2021، تاریق كارێزی، نووسەری دیاری كورد و خاوەنی كتێبخانەی كارێز لە شاری كەركووك، بە (باسنیوز)ی ڕاگەیاند: "كتێبخانەی كارێز ماوەی شەش ساڵە لە كەركووك دامەزراوە، دوای 16ی ئۆكتۆبەری 2017ەش گۆڕانكارییەكی گەورە بەسەر كەركووكدا هات كە لە زۆر بواردا كورد پاشەكشێی كرد، یەكێك لەو بوارانە بواری ڕاگەیاندن و رۆشنبیری بوو، قورسایی كولتووریش لە شاری كەركووك، كولتوری كوردییە، واتە كولتووری نەتەوەكانی تر نە بەو شێوەیە بەربڵاوە و نە قووڵە و نەش فراوانە، ئەگەر كولتووری كوردی لە كەركووك ئامادە نەبێت، واتە شارەكە بێ كولتوورە، چونكە ژێرخانی كولتووری كەركووك كوردی و كوردستانییانەیە".

گوتیشی، كتێبخانەی كارێز هەرچەندە بایەخ بەوە دەدات كە سەرچاوەیەكی باش بێت بۆ نووسەران و خوێنەران بە گشتی، بەڵام ماوەی دوو ساڵە بەکۆمەڵ دەستمان بە چالاكیی رۆشنبیری كردووە و ئەو رۆشنیبرانەی كە ڕوو لە كارێز دەكەن، داوای ئەوەیان دەكرد كە بڵاوكراوەیەك دەربكەین، ئیتر رۆژنامە بێ یاخود گۆڤار".

تاریق كارێزی، ئاماژەی بەوەش دا: "بەهۆی ئەوەی توانا داراییەكە لەبەردەستدا نەبوو، تۆزێ بەلامانەوە ئەستەم بوو، بەڵام دواجار كە داواكارییەكان زۆر دووربارە بوونەوە ئیتر بڕیار درا كە بڵاوكراوەیەك دەربكەین ئەگەر سادە و ساكاریش بێ و نە ناومان ناوە رۆژنامە و نەش گۆڤار، بەڵكوو بڵاوكراوەیەكە بەناوی كارێز، ئەو بڵاوكراوەیە كۆمەڵێك بابەتی تێدایە كە پەیوەندییان بە كولتوور شارستانییەتی كەركووكەوە هەیە، یەكەمین ژمارە كۆمەڵێك بابەتی بەپێزی لەخۆ گرتووە كە لە شێوەی كۆڤارە، بەڵام وەك گوتم ناویشی نانێینە گۆڤار، بەڵكوو بڵاوكراوەیەكە، چونكە بواری كولتوور لە شاری كەركووك زۆر لەوە گەورەترە كە بڵاوكراوەی كارێز بتوانێ بیگەیەنێت و ئەمەیان سەرەتایە و هیوادارین دواتر گەشە بكات، بۆ شارەكانی تری كوردستان ببێتە دەروازەیەك بۆ ناسینی رۆشنبیری و كولتووری كەركووك لە زۆربەی ڕووەكانەوە".