بۆچی هێشتتان خۆی بسووتێنێت؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 18/05/2021

بۆچی هێشتتان خۆی بسووتێنێت؟

شوێن: هەولێر بەردەم بارەگای نەتەوەیەكگرتووەكانە، كات: ئەمڕۆ سێشەممە لای نیوەڕۆ، رووداوەكە: گەنجێكی كوردی رۆژهەڵات بە قسەی خۆی هیچ رێوشوێنێكی نیە بۆ دەربازبوون لەڕێی نەتەوە یەكگرتووەكانەوە بەرەو وڵاتێكی رۆژئاوایی، بۆیە بتڵێك بەنزین و چەرخێكی بە دەستەوەیە و بانگەوازی بۆ میدیاكان كردووە كە بڕیاری داوە لەبەردەم بارەگای یوو ئێن لە هەولێر خۆی بسووتێنێت، پەیامنێری چوار دەزگای میدیایی كوردستان مایك و كامێرایان بۆ گەنجەكە راگرتووە، تا هەڕەشەكەی بێنێتە جێ و خۆی بسووتێنێت.

ناچارم لێرەدا ناوی هەر چوار دەزگا میدیاییەكە و خاوەنەكانیان بهێنم، چونكە قسەم لەسەر رەفتار و هەڵوێستی میدیاكاران و رۆژنامەوانانی ئەو دەزگایانەیە، كە وێنەگر و پەیامنێرەكانیان ناردووە بۆ گواستنەوەی رووداوی چۆنێتیی خۆسووتاندنی ئەو گەنجە كوردە بە شێوەیەكی راستەوخۆ لە كەناڵ و سایتەكانیانەوە.

پەیامنێرانی (سایتی ژیان)ی سەر بە لاهوور جەنگی، (كوردسات نیوز)ی سەر بە راگەیاندنی یەكێتیی نیشتمانیی كوردستان و نزیك لە شاناز ئیبراهیم ئەحمەد، (سایتی خەندان)ی سەر بە بەرهەم ساڵحی سەركۆمار، (كەناڵی ئێن ئاڕ تی)ی سەر بە شاسوار عەبدولواحید، هەر چواریان بە وێنەگرەكانیانەوە، لەبەردەم ئەو گەنجەدا وەستان تا قسەی خۆی كرد و بەنزینەكەی كرد بە خۆیدا و ئنجا بە چەرخەكەی دەستی، ئاگرەكەی لە خۆی بەردا و بووە تۆپەڵەئاگرێك و بە هاتوهاوار رای كرد تا خۆیدا بە زەویدا.

هەموو ئەم رووداوەی باسی دەكەم، دڵنیام ئێوەی بەڕێز زۆربەتان لە سۆشیال میدیاوە و لەو كەناڵ و سایتانەوە یان راستەوخۆ یان دوای رووداوەكە بینیتان، با واز لە نەتەوەیەكگرتووەكان بێنین، كە رەنگە رۆتینەكانیان یەكێك بێ لە هۆكارە سەرەكییەكانی ئەم رووداوە و ئەركی سەرشانیەتی لێی بكۆڵێتەوە و هەر فەرمانبەر و ئۆفیسێكی هەڵەیەكیان لە بەدەنگەوەنەچوونی ئەو گەنجە كوردەی رۆژهەڵاتدا هەیە سزای بدەن، ناشمەوێ باسی رەفتاری هەڵەی خودی ئەو گەنجە بكەم، كە بەدڵنیاییەوە خۆسووتاندنی یان خۆكوشتنی، هیچ چارەسەرێك نیە و دەكرا رێی عەقڵانیی دیكە هەڵبژێرێت و ئەو ئاگرە لە خۆی و لە جەرگی دایك و باوك و ئازیزانی بەرنەدا، بەڵام قسەم لەسەر هەڵوێست و رەفتاری ئەو پەیامنێر و وێنەگرانەیە كە خۆشیان گەنج و مرۆڤ و كوردن.

ئایا (پاڵەوانێتی)!ی گواستنەوەی رووداوی خۆسووتاندنی گەنجێكی كورد و هاونەتەوە و هاوزمانی خۆت، ئەوە دەهێنێت لێ گەڕێی تەنیا تەماشاكار بیت و هیچ ویژدانێكی مرۆیی نەتجووڵێنێت تا رێگە لەو گەنجە بگریت، لە كاتێكدا تۆ نیو مەتر لە رووداوەكەوە دووریت؟ ئایا دروستكردنی راپۆرتێك لەسەر خۆسووتاندنی گەنجێك بە بەرچاوی تۆی رۆژنامەوانەوە، ئەوە دەهێنێت پێ لە هەموو هەستی مرۆیی خۆت بنێیت و ببیتە تەنیا بینەر و پەخشكار و گوێزەرەوەی رووداوەكە؟
بۆچی لێگەڕان خۆی بسووتێنێت؟ تەنیا بۆ ئەوەی بە خەڵك بڵێن: ”لە هەولێر كە حزبێكی غەیرە حزبەكەی ئێوە، دەسەڵاتدارە، گەنجێك خۆی سووتاند؟“... ئای ئەمە چ كارەساتێكی كۆمەڵایەتی و مرۆییە، گەر میدیاكارانی وڵاتێك وەها بیر بكەنەوە.

ئەی هاوار ئەم كۆمەڵگەیەی ئێمە بە چی وای لێ هات؟ ئەم میدیاكار و رۆژنامەوانانە چ دڵێكیان هەیە؟ ئەی كوا هەست و رەفتاری مرۆڤدۆستانە و ژیاندۆستانە؟ كوا ئەركی ئەخلاقی و ئینسانیی رۆژنامەوان؟ بۆچی لێگەڕان ئەو گەنجە كوردە هەر وا بەئاسانی و لەبەردەم ئێوەدا خۆی بسووتێنێت؟ چ ئەهریمەنێك لەنێو مێشك و بیركردنەوەتاندایە؟ ئەوە كێ پێی گوتوون، كامێرا و مایكەكانتان لەسەر ئەو گەنجە لامەبەن تا بەنزینەكە بە خۆیدا دەكات و ئاگر لە خۆی بەردەدا؟

رۆژنامەوان و میدیاكار، دەبێ پێش هەر شتێك ئینسان بێت، ئیدی دوای ئەوە بەدوای خەسڵەت و ئاكارەكانی تری رۆژنامەوانی راستەقینەدا بگەڕێت و خۆی رابهێنێت لەسەریان، میدیاكاری و رۆژنامەوانی وەك زۆر پیشەی تر، بۆ خزمەتی مرۆڤایەتی داهێنراوە، بۆ پێشكەشكردنی خزمەتگوزاریی گەیاندنی هەواڵ و زانیاری ئەویش لەپێناو پێشخستنی ژیانی كۆمەڵگە و مرۆڤدا، رۆژنامەوانی دەبێ ژیانی كۆمەڵگەی ئێمە جوانتر بكات لە رێگەی هەوڵدان بۆ نەهێشتنی دیاردە ناشرینەكانی نێو كەرتە جیاوازەكانی كۆمەڵگە، رۆژنامەوانی و میدیاكاری كە هانی خەڵكیان دا بۆ خۆسووتاندن، خۆكوشتن، بڕوا بەخۆنەبوون و بێهیوابوون، ئیدی دەبێتە بەشێك لە تاوان دژ بە مرۆڤ.

ئەی پەیامنێران و وێنەگرانی ئەو دەزگایانەی ئەمڕۆ لەبەردەم بارەگای نەتەوەیەكگرتووەكاندا بەدیار ئەو گەنجە كوردەوە وەستان تا خۆی سووتاند، ئێوە ویستتان لەڕێی رووماڵی ئەو رووداوەوە ببنە پاڵەوانی سۆشیال میدیا، بەڵام ئێوە هەم نەبوونە پاڵەوان و هەم ئینسانیەتیشتان دۆڕاند، هەم ئەگەر ویژدانیشتان هەبووبێت بۆ ئەبەد لەدەستتان دا، هەر یەك لە ئێوە، لە ساتەوەختی بەنزین بەخوداكردنەكەی ئەو گەنجەدا، پەلامارتان بدایە و نەتانهێشتایە خۆی بسووتێنێت، ئەو دەبووە پاڵەوان.