پەکەکە گوشار دەخاتە سەر پەیەدە بۆ ئەوەی بۆ بەرژەوەندی ئەسەد بەشداری لە هەڵبژاردندا بکات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

پەکەکە گوشار دەخاتە سەر پەیەدە بۆ ئەوەی بۆ بەرژەوەندی ئەسەد بەشداری لە هەڵبژاردندا بکات

ئەنەکەسە: دانانی سندوق لە رۆژئاوای کوردستان شەرعیەتدانە بە کۆمەڵکوژی رژێمی سووریا

پارتی کرێکارانی کوردستان (پەکەکە) گوشار دەخاتە سەر پارتی یەکێتیی دیموکراتی (پەیەدە) بۆ ئەوەی لە هەڵبژاردنەوەی بەشار ئەسەد و شەرعیەتدان پێی، بەشداریی لە هەڵبژاردنی سووریادا بکات و سندوقەکانی دەنگدان لە ناوچەکانی خۆبەڕێوەبەری رۆژئاوای کوردستان دابنرێن، ئەندامێکی ئەنجوومەنی نیشمانیی کورد لە سووریا (ئەنەکەسە) جەخت لەسەر ئەوە دەکاتەوە، ئەوان بەشداری لەو هەڵبژاردنە ناکەن و داواش لە ئەندامان و لایەنگرانیان دەکەن ئەگەر سندوقەکانی هەڵبژاردن هێنرانە رۆژئاوای کوردستان بەهیچ شێوەیەک بەشداری لەو هەڵبژاردنەدا نەکەن، کە تەنیا ئامانج لێی شەرعیەتدانەوەیە بە بەشار ئەسەد وەکو سەرۆکی سووریا.

بەپێی زانیارییەکانی (باسنیوز)، قەندیل هەوڵەکانی بۆ دانانی سندوقی هەڵبژاردنی سەرۆکایەتی رژێمی سووریا لە ناوچەکانی خۆبەڕێوەبەریی رۆژئاوای کوردستان، کە لەلایەن پەیەدەوە بەڕێوە دەبرێن، چڕکردوەتەوە، بۆ ئەوەی کوردانی ئەو ناوچانەش بەشداری لە هەڵبژاردن و سیناریۆی شەرعیەتدانەوە بە بەشار ئەسەد وەکو سەرۆکی سووریا بکەن.

سەرچاوەیەكی نزیك لە ناوەندی بڕیاری ئیدارەی خۆسەری رۆژئاوای كوردستان رایگەیاندووە، هەوڵەکان لەلایەن دیمەشقەوە بە نێوەندگیری رووسیا بۆ بەشداریپێكردنی ناوچەكانی ئیدارەی خۆسەر لە هەڵبژاردنەكانی سەرۆكایەتی سووریادا، دەدرێن، بەڵام تاوەکو ئێستاش بڕیاری كۆتایی نەدراوە.

سەرچاوەكە بۆ كەناڵی (سكای نیوز) ئاماژەی بەوە داوە، کە  هەموو كارێك لە سیاسەتدا روو دەدات، بۆیە رەنگە رێككەوتن روو بدات و ئەو ناوچانە بەشداری لەم هەڵبژاردنەی سەرۆکایەتیی سووریادا بکەن، کە بڕیارە لە 26-5-2021 بەڕێوە بچێت، کە دووەم هەڵبژاردنە لە دوای شەڕی ناوخۆیی سووریادا دەكرێت، کە بەهۆی ئەو شەڕەوە نیو ملیۆن کەس بوون بە قوربانی و نزیكەی 13 ملیۆن کەسیش ئاوارە و دەربەدەربوون، کە تەنیا لە ناوچەکانی رۆژئاوای کوردستانەوە نزیکەی 300 هەزار کەس ئاوارەی هەرێمی کوردستان بوون.

عیماد برهۆ، ئەندامی ئەنەکەسە بە (باسنیوز)ی راگەیاند، رژێمی سووریا لە ساڵی (2014)ش بە هەمان شێوەو سیناریۆ هەڵبژاردنی کرد، بەڵام ئەوکات نەیتوانی سندوقەکانی دەنگدان لە ناوچەکانی رۆژئاوای کوردستان دابنێت، ”ئەگەر پەکەکە گوشار لە پەیەدە بکات بۆ بەشداریکردن لەو هەڵبژاردنە، ئەوە تەنیا بۆ پێدانەوەی شەرعیەتە بە بەشار ئەسەد وەکو سەرۆکی سووریا، وەکو سەرۆکێکی دیکتاتۆر، هەروەها ئەو ناوچە کوردییانە بەتەواوی دەچنەوە ژێر هەژموونی بەشار ئەسەد، چونکە ئەوکات لە رووی نێودەوڵەتییەوە دەڵێن خەڵکی ئەو ناوچانە دەنگیان بە رژێمی سووریا داوە“.

عیماد برهۆ ئاماژەی بەوەش دا، ئەوەی تاوەکو ئێستا هەیە پەیەدە بە شێوەی رەسمی ئەوەی قبوڵ نەکردووە، ”هیوادارین هەر لەسەر ئەو بڕیارە بمێننەوە و هەڵوێستی ئێمەش روونە، کە بە هیچ شێوەیەک نە بە بەشداریکردن نە بە دەنگدان. داواش لە ئەندام و لایەنگرانی خۆمان و هەموو کوردێکی نیشتمانپەروەر دەکەین بەشداری لەو هەڵبژاردنەدا نەکەن بۆ گەڕانەوەی رژێمی سووریا.

ئەو ئەندامەی ئەنەکەسە هەروەها رایگەیاند: ئەو رژێمە دکتاتۆرە و نیوەی کورد قوربانی و ئاوارەی دەستی ئەو رژێمەیە، هەر جۆرە بەشداریکردنێک دووبارە کۆمەڵکوژییە بەسەر ئەو خەڵکە کە بوون بە قوربانی و ئاوارەبوون”.