كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

تاقیگەیەکى پێشکەوتووی پلە بەرز لە هەولێر دروست دەکرێت

 بەمەبەستى گەشەپێدانى کەرتى تەندروستى لە هەولێری پایتەخت، بۆ یەکەمجار لە سەر ئاستى هەرێمى کوردستان تاقیگەى جۆری Aی کە پلە بەرزە دروست دەکرێت.

 لە ڕێوڕەسمێکدا ئەمڕۆ دووشەممە١٠/٥/٢٠٢١ لە گەڕەکى کوورانى عەنکاوە، بەردى بناغەى تاقیگەى پێشکەوتووى جۆری Aی دانرا.

ئومێد خۆشناو، پارێزگارى هەولێر لەمبارەوە گوتى: "لە سەروبەندى ئەم پڕۆسەیەى کە وەک گەشەپێدان دێتە ئەژمار، سێ قۆناغە کە لە یەکەم قۆناغدا بایی ٢٨ ملیار دینار بۆ پڕۆژە خزمەتگوزارییەکان خەرج دەکەین و لە قۆناغى دووەمدا ٢٦ ملیار دینار و لە قۆناغى سێیەمدا بایی نزیکەى٧٠ ملیار دیناری بۆ تەرخان دەکرێت و پڕۆژەکە لە هەولێر جێبەجێ دەکرێت.

پاریزگاری هەولێر باسی لەوەش کرد: "ئەو پڕۆژانە بۆ هەموو ناوچەکانى سنوورى پارێزگاى هەولێر دەبن و هەموو هاووڵاتییان بە یەکەوە سوودى لێ وەردەگرن".

ئومید خۆشناو ئاماژەی بەوەش کرد: "لەو پڕۆژانەى کە لە سنوورى پارێزگاى هەولێر جێبەجێ دەکرێن بەشێک لە خێرخوازانى هەولێر و هەرێمی کوردستان جێبەجێیان دەکەن و ئەوەش مایەى خۆشحاڵیى ئێمەیە کە هاوڵاتیان ئەو گیانى هاوکارییەیان هەبێت و ئێمەش لەلایەن خۆمانەوە لە کابینەى نۆیەمى حکوومەتى هەرێمى کوردستان ئاسانکارى بۆ کەرتى تایبەت دەکەین و ڕۆتین کەم دەکەینەوە و هەموو هەنگاوێکیش بۆ ئاوەدانى و خۆشگوزەرانى خەڵکى کوردستان هەڵدەگرین".

لەبارەى ئەو تاقیگەیەوە د. دلۆڤان محەمەد بەڕێوەبەرى گشتیی تەندروستیى هەولێر گوتى: "ئەو تاقیگەیە بۆ یەکەمجارە لەسەر ئاستى هەرێمی کوردستان لە شارى هەولێر دادەمەزرێت، چونکە جیاوازە لە تاقیگەکانى دیکەى کە لە کوردستان و هەولێر هەبووە، بەتایبەتى ئەم تاقیگەیە چەند بەشێک لە خۆی دەگرێت و زیاتر لەسەر شیوەى نەخۆشخانەیەک دروست دەکرێت و تێچووى پڕۆژەکەش بە گوژمەى دوو ملیار و ٥٠٠ ملیۆن دینارە لەسەر زەوییەک بە ڕووبەرى ٣٥٠٠ مەتر دووجا دروست دەکرێت کە  پڕۆژەکە وەک بەخششێک لەلایەن گرووپی کۆمپانیاکانى گەلیاوە پێشکەش بە شارى هەولێر دەکرێت".