روونکردنەوە لە بارەی خەرجکردنی شایستە داراییەکانی جووتیاران دەدرێ
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

روونکردنەوە لە بارەی خەرجکردنی شایستە داراییەکانی جووتیاران دەدرێ

 

بەڕێوەبەری سایلۆی هەولێر، زانیاری لەبارەی وردەکاری خەرکردنی پارەی گەنمی ساڵی 2016ی جووتیاران دەخاتەڕوو، ئاشکرای دەکات ئەو مانگە پارەی هەموو جووتیاران تەواو دەکرێ.

سەعید عومەر، بەڕێوەبەری سایلۆی هەولێر بە (باسنیوز)ی ڕاگەیاند: "دابەشکردنی نیوەی پارەی گەنمی ساڵی 2014 و 2015 کۆتایی هاتووە و هەفتەیەک زیاترە چەکی پارەی گەنمی سالی 2016 دەستی پێکردووە و بەردەوام دەبێ ئەویش بەپێی ئەو کاتەنەی گەنم ڕادەستکراوە".

ئاماژەی بەوەشدا پارەی 2016ی ئەو جووتیارانە دەستی پێکردووە کە گەنمیان ڕادەستی بنکەکانی ناو سایلۆی هەولێر و گردەڕەشه و شەمامک، کردووە، گوتیشی: "ئەو هەفتەیە پارەی ئەو جووتیارانەش دەدرێ کەوا ساڵی 2016 گەنمیان ڕادەستی بنکەی مەخموور کردبوو، دوای جەژنیش پارەی گەنمی ئەو جووتیارانە دەدرێ کە لە بنکەی کۆیە گەنمیان ڕادەستکردبوو".

سەعید عومەر ئاشکرای کرد زۆرترین چەکی جووتیاران هی ساڵی 2016یه گوتیشی: "زیاتر لە 16 هەزار جووتیار لە هەولێر پارەی گەنمی ساڵی 2016یان هەیە و چەکەکان و پارەکەش زۆرە و هەوڵدەدەین لەو مانگە کۆتایی بە دابەشکردنی بهێنین.

پارەی گەنمی جووتیاران بۆ ساڵی 2016، بڕەکەی 65 ملیار و 779 ملیار دینارە، زیاتر لە 30 ملیار دیناری هی جووتیارانی پارێزگای هەولێرە.

بەڕێوەبەری سایلۆی هەولێر ئاشکراشی کرد، ڕۆژانە جووتیاران ئاگادار دەکرێنەوە له چۆنیەتی وەرگرتنی پاراکانییان، گوتیشی: "چەکەکان بە ڕێکوپێکی ڕێکخراون، ئەگەر کێشەیەک هەبێت لە چەکەکان ئەوە چاک دەکرێتەوە و هەر ئەو ڕۆژە لە بانکەکان پارەکەیان پێدەدرێ، کە دەکاتە 50%ی شایستەی خۆیان".

دوای چەند ساڵێك له‌ ڕاگرتنی خەرجكردنی پارەی گەنمی ساڵانی 2014، 2015 و 2016ى جووتیارانی هەرێمی كوردستان له‌لایه‌ن حكوومه‌تی عێراقه‌وه‌، دوا جار حكوومه‌تی عێراق بڕیاری دا نیوەی پارەكە، كه‌ 268 ملیار دیناره‌، خەرج بكات.

پێشتر فارس عیسا، سەرۆكی نوێنەرایەتیی حكوومەتی هەرێمی كوردستان لە بەغدا بە (باسنیوز)ی ڕاگەیاندبوو، كه‌ لە هەوڵی ئەوەدان نیوەی پارەكەی تریش خەرج بكرێت.