ئەمڕۆ هەینی میلیشیاكانی ئەهلی حەق سەر بە حەشدی شەعبی لەناو شاری كەركووك، ئاڵای ئەمریكا و ئیسرائیلیان سووتاند.
لەمبارەیەوە رەسول رەئوف ئەندامی سەركردایەتی و بەرپرسی مەڵبەندی كەركووكی حزبی سۆسیالیست دیموكراتی كوردستان بە (باسنیوز)ی راگەیاند ئەمڕۆ میلیشیاكانی حەشدی شەعبی ئاڵای ئەمریكا و ئیسرائیلیان لە شاری كەركووك لەژێر پێ نا و سووتاندیانن، ئەمەش لەگەڵ كولتووری پێكەوەژیان لە شاری كەركووك یەك ناگرێتەوە.
هەروەها گوتی ئامانج لەم كارە خۆسەپاندنی زیاتری حەشدە لە شاری كەركووك، بە تایبەتی میلیشیای ئەهلی حەق هێزێكی داگیركەرن لە كەركووك و نوێنەرایەتی خەڵكی كەركووك ناكەن.
ئەو بەرپرسەی سۆسیالیست ئەوەشی راگەیاند كە ئەم جۆرە رەفتارەی میلیشیاكان بەرامبەر دوو وڵاتی وەك ئەمریكا و ئیسرائیل لە بەرژەوەندیی شاری كەركووكدا نییە.