شانۆگەریی (دوای مەرگ) لە كەركووك نمایش كرا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

شانۆگەریی (دوای مەرگ) لە كەركووك نمایش كرا

دوێنێ سێشەممە 4/5/2021، لە هۆڵی پەیمانگەی هونەرە جوانەكانی كەركووك كە سەر بە وەزارەتی پەروەردەی حكوومەتی هەرێمی كوردستانە، شانۆگەریی (دوای مەرگ) نمایش كرا.

لەمبارەوە هۆزان شێرزاد، دەرهێنەری شانۆگەرییەكە، بە (باسنیوز)ی ڕاگەیاند: "لە هۆڵی پەیمانگەی هونەرە جوانەكانی كەركووك، سەر بە وەزارەتی پەروەردەی حكوومەتی هەرێمی كوردستان، شانۆگەریی (دوای مەرگ) نمایش كرا كە ئەو شانۆگەرییە نووسینی هیكتۆ هیۆ مۆنرۆ، نووسەری دیاری بواری كورتەچیرۆكی بەریتانییە، خۆشم بە دەستكاریی دەقەكەوە دەرهێنەری شانۆگەرییەكە بووم".

گوتیشی: "بە كورتی چیرۆكی شانۆگەرییەكە زیاتر باسی ململانێی دەسەڵات دەكات بە درێژایی مێژوو و باسی گەنجێك دەكات كە دەسەڵاتدارە و باوكی بە پیلانێك كوژراوە و ئێستا دەیانەوێت بە پیلانێك ئەمیش بكوژن و ئەو كەسانەی كە لە چوار دەوری ئەو گەنجە دەسەڵاتدارەن، لەناویشیاندا خائین هەیە".

باسی لەوەش کرد: "لە شانۆگەرییەكەدا كارەكتەرێكمان هەیە کە لە كۆتاییدا كەسێكی تر دێتە ژوورەوە بۆ كوشتنی ئەو و ستەیجی شانۆگەرییەكەش شەترەنجێكی گەورە بوو و ڕووداوەكانمان بەو شێوەیە بەرجەستە كرد و ئەكتەرەكانیش هەر یەكێكیان هی سەردەمێكی دوای خۆی بوو، واتە هەر ئەكتەرێك لە سەردەمێكدا دەژیا و ئیتر لە سەرەدەمی شەڕ بە شمشێرەوە بیگرە تاكوو شەڕكردن بە كەرەستە مۆدێڕەنکانی شەڕی ئەمڕۆ".