جگە لە لاهور جەنگی هیچ ئۆرگانێکی یەکێتی ئاگاداری رێککەوتن لەگەڵ گۆڕان نییە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

جگە لە لاهور جەنگی هیچ ئۆرگانێکی یەکێتی ئاگاداری رێککەوتن لەگەڵ گۆڕان نییە

دیارنەبوونی ناوەڕۆکی ڕێککەوتنەکە ئەنجوومەنی باڵای بەرژەوەندییەکانی یەکێتی نیگەران کردووە

لە پێکهێنانی لیستێکی هاوبەش هەموو باڵە جیاوازەکانی یەکێتی خۆیان بێئاگادەکەن لە ڕێککەوتنی حزبەکەیان لەگەڵ گۆڕان، کادیرێکی یەکێتیش ئاماژە بەوە دەدات کەوایە با سەرجەم ئۆرگانەکان دابخرێن.

بەپێی ئەو لێدوان و ڕاگەیەنراوانە بێت هیچ ئۆرگانێكی یەكێتیی نیشتمانیی کوردستان و هیچ كەسێكی سەركردایەتی و مەكتەبی سیاسی و مەڵبەندەكان، ئاگاداری رێكکەوتنی یەكێتی و گۆڕان نییە.

سەرچاوەیەکی ئاگادار بۆ (باسنیوز) رایگەیاند، ئەو رێککەوتنە تەنیا لە نێوان لاهور جەنگی و گۆڕان کراوە، هیچ باڵێکی یەکێتی و ئۆرگانێکی یەکێتی لە بەرزترین دەسەڵاتەوە تاوەکو مەڵبەندەکان ئاگاداری ئەو رێککەوتنە نین و نازانن رێککەوتنەکە لەسەر چ بنەمایەکە، تەنیا ئەوەیان لە میدیاکانەوە بیستوە کە لاهور جەنگی سەرۆکی لیستی هاوبەشی یەکێتی و گۆڕانە و رێکەوتنەکەش لە جڤاتی گۆڕان پەسەندکراوە کە نازانرێ ناوەڕۆکەکەی چییە؟.

سەرچاوەکە ئاماژەی بەوەش دا، دیارنەبوونی ناوەڕۆکی ڕێککەوتنەکە هێندەی دیکە ئەنجوومەنی باڵای سیاسی یەکێتی بەتایبەتی کۆسرەت رەسوڵ و مەلا بەختیاری نیگەران کردووە.

ژوان ئەحمەد، رۆژنامەنووس و کادیری یەکێتی، لەمبارەیەوە لە ئەکاونتی تایبەتی خۆی لە تۆڕی کۆمەڵایەتی فەیسبووک ، نوسیوویەتی "بەپێی ئەو دروشمە بێ كە بردمانە كۆنگرە و پێی هاتینە دەرەوە، پێویست بوو یەكێتی نوێ ببێتەوە، نوێبونەوە بە مانا فراوانەكەی نەك تەنیا كەسەكان لە سەركردایەتی بگۆڕی بە خواستی دڵ و دڵخوازی تەكەتول".

ئاماژەی بەوەش داوە کە "پێویست بوو لەو نوێبونەوەیەدا، نوێ بین لە رێزگرتن لە پەیڕەوی ناوخۆ، نوێ بین لە بەیەكسان سەیركردنی تەواوی كادیران بێ لەبەرچاوگرتنی دەستەگەری و تەكەتول، نوێ بین لە ڕێزگرتن لە بیرورای جیاواز لە سەركردایەتی بۆ خوارەوە، چونکە لەكاتێكدا دەستەی كارگێڕی مەكتەبی سیاسی بەرزترین دەسەڵاتی جێبەجێكردنە لە یەكێتی ، ئاگای لە دانانی كاندید و رێكەوتن نەبێ، ئەمە فاوڵێكی گەورەیە، هەروەها مەكتەبی سیاسی و سەركردایەتی ئاگایان لێ نەبێ، فاوڵێكی گەورەترە، چونكە كۆمیتەی سەركردایەتی بەرزترین ناوەندی بریاردانی یەكێتییە".

لەمبارەیەوە نووسیویەتی "ئەگەر گشت ئەو قسانەی شاناز ئیبراهیم و شاڵاو کۆسرەت رەسوڵ دەیکەن راست بن كەواتە، یەكێتی ئەنجوومەنی باڵای سیاسی بۆ چییە؟ بۆ هەڵیناوەشێنێن و ئەو بودجە و مووچەیەیان ببڕێت، دەستەی كارگێڕ زیادەیە و با هەڵوەشێتەوە، مەكتەبی سیاسی و ئەو هەموو مووچە و ئیمتیازات و ئوتۆمبێل و پاسەوانە هەڵوەشێنن زیادەیە، سەركردایەتی زیادەیە كە ئاگادار نەبووبێت و هەڵیوەشێننەوە، مەڵبەندەكان زیادەن بابڕۆنەوە ماڵەوە كە هیچكام لەو ئۆرگانانە ئاگاداری هیچ نەبن و هیچیش نەبن لە راوێژ و بریاردان، ئیدی پێویست نییە هەبن".