ئەنجوومەنی باڵای دادوەری: نزیكەی نیوەی گەنجانی عێراق هۆگری مادە هۆشبەرەكانن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئەنجوومەنی باڵای دادوەری: نزیكەی نیوەی گەنجانی عێراق هۆگری مادە هۆشبەرەكانن

ئەمڕۆ سێشەممە ئەنجوومەنی باڵای دادوەری لە عێراق لە بەیاننامەیەكدا ڕای گەیاندووە كە نزیكەی نیوەی گەنجانی عێراق هۆگری مادە هۆشبەرەكانن، بەڵام ئەم ڕێژەیە بە نادیاری ماوەتەوە و ئاشكرا نەكراوە.

بەیاننامەكەی ئەنجوومەنی باڵای دادوەری لە زاری نەبیل تائی دادوەری دادگای لێكۆڵینەوە لە شاری بابلی گواستووەتەوە كە ڕێژەی هۆگربوون بە مادە هۆشبەرەكان لە ناو گەنجانی عێراقدا، دەگاتە نزیكەی ٥٠٪ی كۆی گەنجانی وڵاتەكە، ئەمەشی بۆ هۆكاری خراپیی دۆخی ئابووریی عێراق گەڕاندووەتەوە.

دادوەر نەبیل تائی گوتوویەتی ڕێژەی بەرزی هۆگربوونی گەنجان بە مادە هۆشبەرەكان بە شاراوەیی ماوەتەوە و تا ئێستا بە شێوەیەكی فەرمی باسی لێوە نەكراوە.

دەشڵێ ئەوانەی بازرگانی بە مادە هۆشبەرەكانەوە دەكەن و بازاڕی بۆ پەیدا دەكەن لە هەموو ناوچەكانی عێراقدا چالاكن، بەڵام لەگەڵ ئەوەشدا ڕێژەی ٧٠٪یان لە ناوچە هەژارنشینەكانن، ئەو ناوچانەی بەدەست بێكارییەوە دەناڵێنن و كێشەی كۆمەڵایەتیی زۆریان هەیە.

دادوەرەكە ئەوەشی راگەیاندووە كە دۆخی خراپی ئابووریی عێراق و ڕێژەی بەرزی بێكاری بوونەتە هۆی ئەوەی مادەی هۆشبەر لەناو گەنجاندا بە شێوەیەكی بەرفرەوان بڵاوبێتەوە.

هەروەها ئەوەشی ڕوون كردووەتەوە كە مادە هۆشبەرەكان تەنها لەلایەن پیاوانەوە بەكار ناهێندرێت، بەڵكو ژنانی عێراقیش ڕووبەڕووی ئەو كارەساتە بوونەتەوە.

ئاماژەشی بە بەرزبوونەوەی ڕێژەی بەرهەمهێنانی مادە هۆشبەرەكان كردووە لە جیهاندا، كە هۆكارێكی تری هۆگربوونی زیاتری گەنجانە لە جیهاندا بە گشتی، هەروەها تەكنەلۆژیای گەیاندن و تۆڕە كۆمەڵایەتییەكانیش كارئاسانیی زیاتریان بۆ بڵاوبوونەوە و پەرەسەندنی مادە هۆشبەرەكان كردووە.

دادوەرە عێراقییەكە دەڵێ لە دادگاكاندا بەردەوام ژمارەی سكاڵا یاساییەكانی پەیوەندیدار بە مادە هۆشبەرەكان بەرەو زیادبوون دەچێت، لە كاتێكدا لە دەیەكانی رابردوودا عێراق یەكێك بووە لە پاكترین وڵاتەكانی جیهان لە ڕووی كەمی ڕێژەی هۆگربوونی هاووڵاتییانی بە مادە هۆشبەرەكان.

هەروەها ئاماژەی بەوە داوە كە ئەگەر جاران عێراق شوێنی تێپەڕینی مادە هۆشبەرەكان بووبێت لە نێوان ئێران و ئەفغانستان بەرەو وڵاتانی ئەورووپا، ئەوا ئێستا بووەتە مۆڵگەیەكی سەرەكیی بەكارهێنانی مادە هۆشبەرەكان.