سێ ڕۆژە میلیشیاكانی عێراق هێرش دەكەنە سەر بنكە سەربازییە ئەمریكییەكان
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

سێ ڕۆژە میلیشیاكانی عێراق هێرش دەكەنە سەر بنكە سەربازییە ئەمریكییەكان

ماوەی سێ ڕۆژە بە دوای یەكەوە هێرشی مووشەكیی میلیشیا شیعییەكانی نزیك لە ئێران بۆ سەر ئەو بنكە سەربازییانەی عێراق بەردەوامە كە هێزی سەربازی، بەڵێندەر یان كارمەندی ئەمریكییان لەخۆ گرتووە.

ماڵپەڕی ڕۆژنامەی (ئیندیپێندێنت)ی عەرەبی لە راپۆرتێكدا بڵاوی كردووەتەوە كە ئەمڕۆ بۆ سێیەم ڕۆژ هێرش بۆ سەر ئەمریكییەكان لە عێراق ئەنجام درا، ئەمەش لە ڕێگەی هێرشێكی مووشەكیەوە بووە بۆ سەر بنكەی سەربازیی ئاسمانیی عەین ئەسەد لە سنووری پارێزگای ئەنباری رۆژئاوای عێراق.

دوێنێ دووشەممەش هێرشی مووشەكی كرایە سەر بنكەی سەربازیی ئاسمانیی بەلەد لە پارێزگای سەڵاحەدین، كە جگە لە هێزەكانی سوپای عێراق، ژمارەیەك بەڵێندەری ئەمریكی و كارمەندانی فڕۆكەی F16ی ئەمریكی لەخۆ گرتووە.

هەروەها ڕۆژی یەكشەممەی رابردووش دوو مووشەك ئاراستەی فڕۆكەخانەی نێودەوڵەتیی بەغدا كران، كە بنكەیەكی سەربازیی ئاسمانیی هێزەكانی هاوپەیمانانی لێیە بە سەركردایەتیی ئەمریكا.

لەمبارەیەوە ئێوارەی ئەمڕۆ واینێ مۆرۆتۆ گوتەبێژی هاوپەیمانی نێودەوڵەتیی دژ بە داعش لە هەژماری خۆیدا لە تۆڕی كۆمەڵایەتیی (تویتەر) نووسیبووی "دوو مووشەکی کاتیوشا لە گۆڕەپانێکی بەتاڵی بنکەی ئاسمانیی عەین ئەلئەسەد لە پارێزگای ئەنبار کەوتوونەتە خوارەوە، هیچ زیانێکی گیانی و ماددیان نەبووە".

ئەوەشی نووسیبوو كە هەر هێرشێک بۆ سەر حکوومەتی عێراق و حکوومەتی هەرێمی کوردستان و هاوپەیمانان، لێدانە لە دەسەڵاتی دامەزراوە عێراقییەکان و هێزی یاسا و سەروەریی نیشتیمانیی عێراق.

جێی باسە دوێنێ شەوی دووشەممە جارێكی تر هێرشی مووشەكی كرایە سەر بنكەی ئاسمانیی (بەلەد) لە پارێزگای سەڵاحەدین، كە بنكەیەكی سەربازیی هاوبەشی ئەمریكی و عێراقییە.

بنكه‌ی ئاسمانیی به‌له‌د گه‌وره‌ترین بنكه‌ی ئاسمانییه‌ له‌ عێراق و پێشتر هێزەكانی سوپای ئەمریكای تێدا جێگیر بوو، بەڵام ئێستا هێزە عێراقییەكان و تیمێكی كارمەندانی سەرپەرشتی و چاككردنەوەی فڕۆكەی F16ی ئەمریكی لێیە.

جێی باسە دوابەدوای هێرشە مووشەکییەکەی دوێنێ شەو، کەناڵە تێلیگرامییەکانی سەر بە میلیشیاکانی سابیڕینی نزیک لە سوپای قودسی ئێران، چەند وێنەیەكی سەكۆی هەڵدانی مووشەكەكانیان بڵاو كردەوە، كە وێنەی قاسم سولەیمانی و ئەبو مەهدی موهەندیسیان لەسەرە.