نێچیرڤان بارزانی لەگەڵ سەرکردایەتیی گۆڕان و یەکێتی کۆ بووەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

نێچیرڤان بارزانی لەگەڵ سەرکردایەتیی گۆڕان و یەکێتی کۆ بووەوە

سەرۆکی هەرێمی کوردستان لەگەڵ سەرکردایەتیی بزووتنەوەی گۆڕان و یەکێتیی نیشتمانیی کوردستان کۆ بووەوە.

ئەمڕۆ سێشەممە 4-5-2021، نێچیرڤان بارزانی، سەرۆکی هەرێمی کوردستان بە یاوەریی جەعفەر شێخ مستەفا و مستەفا سەید قادر، جێگرانی سەرۆکی هەرێمی کوردستان گەیشتە شاری سلێمانی.

دوای گەیشتنی بە سلێمانی، نێچیرڤان بارزانی لە گردی زەرگەتە لەگەڵ عومەر سەید عەلی، رێکخەری گۆڕان و سەرکردایەتیی ئەو حزبە کۆ بووەوە.

دوای کۆبوونەوەی لەگەڵ رێکخەر و سەرکردایەتیی گۆڕان، نێچیرڤان بارزانی لە دەباشان لەگەڵ سەرکردایەتیی یەکێتی کۆ بووەوە.

بەپێی زانیارییەکان، سەرۆکی هەرێمی کوردستان لەو کۆبوونەوانەیدا لەگەل لایەنە سیاسییەکان، باس لە هەڵبژاردنی پێشوەختەی پەرلەمانی عێراق (بڕیارە لە رۆژی 10-10-2021 بەڕێوە بچێت)، یەکگوتاریی کورد لە بەغدا، پەیوەندیی نێون لایەنە سیاسییە کوردستانییەکان و پرۆژەیاسای دەستووری هەرێمی کوردستان، دەکات.

بڕیارە دوای کۆبوونەوە لەگەڵ سەرکردایەتیی یەکێتی، نێچیرڤان بارزانی لەگەڵ محەمەدی حاجی مەحمود، سکرتێری حزبی سۆسیالیست دیموکراتی کوردستان، بۆ هەمان مەبەست کۆ ببێتەوە.

نێچیرڤان بارزانی بە رۆژنامەنووسانی راگەیاند: "دەمانەوێ لەگەڵ حزبەکان هەوڵی جددی بدەین بۆ ئەوەی ئەو کێشانەی لە هەرێم هەن کەمیان بکەینەوە. هەروەها هەوڵبدەین لەسەر پرسی دەستوور بیروبۆچوون ئاڵوگۆڕ بکەین".

سەرۆکی هەرێمی کوردستان جەختی لەوە کردەوە، کە بە یەکهەڵوێستیی لایەنە کوردستانییەکان لە بەغدا، ”دەتوانین دەستکەوتەکان لە بەغدا بەدەستبێنین، ئەگەر پەرتەوازەبین بێگومان هەرێمی کوردستان زەرەرمەندی یەکەم دەبێت، هەموو هەوڵەکانی سەرۆکایەتی هەرێم بۆ ئەوەیە یەکڕیزی لەنێوان لایەنەکان دروست بکەین".

لەبارەی پرۆژەیاسای دەستووری هەرێمی کوردستانەوە، سەرۆکی هەرێمی کوردستان رایگەیاند: ”خەریکی گفتوگۆین لەگەڵ هەموو هێزەکان، دواتر میکانزمێک دادەنێین، کە ئەمە ئیشی پەرلەمانی کوردستانە، بەڵام هەوڵی جددی هەیە بۆ ئەوەی پرسی دەستوور جێبەجێ بکرێت".

هەر بۆ ئە مەبەستانە، رۆژی دووشەممە 3-5-2021، نێچیرڤان بارزانی لە هەولێر لەگەڵ عەلی باپیری ئەمیری کۆمەڵی دادگەری و سەڵاحەدین محەمەد بەهائەدینی ئەمینداری گشتیی یەکگرتووی ئیسلامیی کوردستان کۆ بووەوە.