پەكەكە كێ بە دوژمن دەزانێت؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

پەكەكە كێ بە دوژمن دەزانێت؟

لەناو ماڵی خۆت شەڕت پێدەفرۆشن و خەریكی كەڵەگایی و عەنتەریاتن بەسەر ھەرێمی كوردستانەوە، بەشێك لە ھەرێمی كوردستانیان بەناوی (ھەرێمی میدیا!) دابڕیوە و وەك بەدیلی داوودەزگا ئیداريیە شەرعیەكانی ھەرێمی كوردستان، ئیدارەیەكیان بۆ خۆیان لێ دامەزراندووە و بە ئارەزووی خۆیان بنكە و بارەگای سەربازیيان لێ داناوە، باج و سەرانە لە جووتیار و ڕەوەند و كاسبكارانی ئەو ناوچە سنوورییانەی ھەرێمی كوردستان دەستێنن.

ئەوەندەی پێیان كرابێت و دەستیان ڕۆییشتبێت، دارستان و ناو باخ و سەر ڕێگەی ھاووڵاتیانیان مینڕێژ كردووە، بەوەشەوە نەوەستاون، چەندین گرووپیان لەژێر چەندین ناوی وەك (ڕۆژنامەنووس و چالاكوان!) دروست كرد و گەیاندیانە ڕادەیەك كە پیلان بۆ كاری تیرۆریستی لە قووڵایی ناو شارەكانی ھەرێمی كوردستان دابنێن، ئەوەندەی پێیان كرابێت بە قسەی لووس و وەعدی درۆی ناو ئایدۆلۆژیا شموولی و دیكتاتۆرییانەكەی خۆیان، منداڵانی كوردستان ھەڵدەخەڵەتێنن و دەیانڕفێنن بۆ كاری سەربازی و ئەگەر كەسوكاریشیان بۆ سەروسۆراخی منداڵەكانیان بچنە ناوچەكانی ژێر دەسەڵاتیان، ئەوانیش بێسەروشوێن دەكەن.

بەبێ ھیچ ڕەزامەندی و ھیچ مۆڵەتێكی داوودەزگا دەستوورییەكانی ھەرێمی كوردستان، لە ناوچەكانی سەر سنووری نێوان توركیا و ھەرێمی كوردستان دایانكوتاوە، بۆ تێكدانی پەیوەندیی نێوان ھەرێمی كوردستان و توركیا - پەیوەندییەك كە لەسەر بنەمای مەنفەعەتی ھاوبەش و ڕێز لەیەكترگرتن بینا دەكرێت - ئەوەی پێیان كرابێت كردوویانە، كەچی موراد قەرەیەڵانی یەكێك لە فەرماندە باڵاكانی پەكەكە، سەبارەت بە شەڕی نێوان خۆیان و توركیا لەسەر خاكی ھەرێمی كوردستان، دەڵێت: ”هێزەکانی باشوور بوونەتە تەماشاکەری ئەم شەڕە، دەترسن لە بەرامبەر دوژمن دەنگی خۆیان هەڵبڕن، ئەمەش کێشە نییە، بەڵام با هاوکاریی دوژمن نەکەن، ئەمە بە تەنیا بەسە بۆ ئێمە“.

سەیرە، داوای یەكەمی پەكەكە لە ھێزەكانی باشووری كوردستان ئەوەیە كە لە شەڕی نێوان پەكەكە و توركیا ئەم ھێزانەی باشوور ببنە بەشێك لە پەكەكە و بچنە سەنگەری پەكەكەوە و ئەمە ئەركی یەكەمی ھێزەكانی باشووری كوردستانە، بەڵام كاتێك داوای یەكەمی ھێزەكانی هەرێمی كوردستان و بەتایبەتییش حكوومەتی ھەرێمی كوردستان لە پەكەكە ئەوەیە كە ھەرێمی كوردستان بۆ شەڕ و پەلامار دژی توركیا وەك وڵاتێكی دراوسێ و ھیچ وڵاتێكی دراوسێی تری ھەرێمی كوردستان بەكار نەھێنرێت، لێرەدا پەكەكە ئامادە نیە نەك ھەر ببێت بە بەشێك لە سیاسەتەكانی هەرێمی كوردستان، بەڵكوو ئامادەی ئەوەش نیە ھەرێمی كوردستان بەجێ بھێڵێت و بچێتەوە بۆ ئەو شوێنەی كە لێی دروست بوو!

ئینجا بەلای پەكەكەوە كە ھێزەكانی هەرێمی كوردستان نابنە بەشێك لە سیاسەتی پەكەكە، داوای دووەمی قەرەیەڵان لە ھێزەكانی هەرێمی كوردستان – وەك خۆی دەڵێت – ئەوەیە كە با ئەم ھێزانەی باشووری كوردستان ھاوكاریی دوژمن نەكەن كە مەبەستی قەرەیەڵان لەم دوژمنە تەنیا و تەنیا توركیایە، بەڵام:

1- قەرەیەڵان لە خۆی ناپرسێت، بۆچی پەكەكە چەكدارانی خۆی ناباتەوە سەر سنووری نێوان ئیدارە خۆسەرەكەی خۆیان و توركیا لە ڕۆژئاوای كوردستان و بەتەنیا گەڕی لە ھەرێمی كوردستان ئاڵاندووە و ئەم ھێزانەی لە ناوچە سنوورییەكانی نێوان ھەرێم و توركیا بڵاو كردووەتەوە؟

2- پرسیارێك لە پرسیاری یەكەم گرنگتر ئەوەیە، ئەی كاتێك ھێزەكانی توركیا لە عەفرین و گرێ سپی و سەرێ كانی پەلاماری دان، بۆچی ئەو كاتە پەكەكە بە پەیەدە و ئیدارەی خۆسەری نەگوت پەیەدە و ئیدارەی خۆسەر ھاوكاریی دوژمنیان كرد بۆیە پەكەكە لەو ناوچە سنوورییانەی نێوان ڕۆژئاوای كوردستان و توركیا زیانی گەورەیان بەر كەوت؟ خۆ ئەو كاتە و ئێستاش لەو ناوچە سنوورییانەی نێوان ڕۆژئاوای كوردستان و توركیا، ھیچ ھێزێكی باشووری كوردستانی لێ نەبوو و لێ نیە.

3- باشە ئەوە بۆچی قەرەیەڵان لە خۆی ناپرسێت، ھێزەكانی پەكەكە و سەر بە پەكەكە لە شنگال چی دەكەن و ئەوان لەوێ ھاوكاریی كێ و چ بەرنامەیەك جێبەجێ دەكەن؟ بۆچی قەرەیەلان لە خۆی ناپرسێت، بەڕاستی ئەوە چیە كە حەشدی شەعبی و پەكەكە لە شنگال بەیەكەوە كۆ دەكاتەوە؟ خۆ ئەوە ئاسیا سێڵ نیە! ئایا ئەمە دژایەتیكردنی دوژمنانی كوردستانە، یان ھاوكاریكردنی دەرەجە یەكی دوژمنانی كوردستانە؟ جا لەسەر ڕیتمی لێدوانەكەی موراد قەرەیەڵان لە بەرامبەر ھێزەكانی باشووری كوردستان، منیش وەك ھاووڵاتیەكی كوردستان دەڵێم: با پەكەكە لە شنگال تەنیا ھاوكاریی دوژمن نەكەن و ھەرێمی كوردستان تەنیا ئەمەی بەسە!