ئۆپۆزسیۆنی توركیا لەبارەی هەدەپەوە بەسەر دوو بەرەدا دابەش دەبن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئۆپۆزسیۆنی توركیا لەبارەی هەدەپەوە بەسەر دوو بەرەدا دابەش دەبن

هاوپەیمانیی (میللەت) لە نێوان پارتی گەلی کۆماری (CHP) و پارتی باش (IYI PARTY) وای كردووە لە هەڵبژاردنی شارەوانییەكانی توركیا گورزێكی گەورە لە هاوپەیمانیی (كۆماری) بدەن كە لە نێوان پارتی داد و گەشەپیدان (AKP) و پارتی بزووتنەوەی ناسیۆنالیستی (MHP) دروست ببوو. پارتی دیموکراتی گەلان (HDP) كە لەناو هاوپەیمانیی (میللەت)دا نەبوو، بەڵام لە دەرەوەی ئەو هاوپەیمانییە لە رۆژئاوای توركیا پشتگیری لە كاندیدی ئەوان كرد، بۆیە دەكرێت بڵێین ئۆپۆزسیۆنی توركیا لە سێ پارتی سەرەكی پێكهاتووە (جەهەپە، هەدەپە، پارتی باش).

پارتی باش هەر لە سەرەتاوە بەو مەرجە لەگەڵ جەهەپەدا چووە ناو هاوپەیمانییەوە كە هەدەپەی تێدا نەبێت، چونكە مەرال ئاكشەنەر سەرۆكی پارتی باش لە میتینگەكاندا دەیگوت بە لای ئێمەوە هەدەپە و پەكەكە هیچ جیاوازییەكیان نییە. بۆیە هەدەپە لەسەر داوای پارتی باش نەهێڵدرا بێتە ناو هاوپەیمانیی (میللەت)ەوە.

بە گوێرەی ئەو زانیارییانەی لە چەند میدیایەكی توركیا بڵاو كراونەتەوە، جەهەپە بە نهێنی لەگەڵ هەدەپەدا دانیشتووە و بەنیازە بیهێنێتە ناو هاوپەیمانیی (میللەت)ەوە تا لە هەڵبژاردنی سەرۆكایەتیی توركیا بە نەفەسی هەڵبژاردنی شارەوانییەكان رووبەڕووی ئاكەپە و مەهەپە ببنەوە.

بەڵام پارتی باش بە توندی دژی ئەو هەنگاوەی جەهەپەیە و دەڵێت ئەگەر هەدەپە بێتە ناو ئەو هاوپەیمانییەوە پارتی باش لێی دێتە دەرەوە.

عەبدولقادر سەلفی رۆژنامەنووسی نزیك لە رەجەب تەیب ئەردۆغان، بە پشتبەستن بە چەند سەرچاوەیەك، باسی لە پەیوەندیی نێوان پارتی باش و ئاكەپە کردووە كە دوای تەوقەكردنێكی نێوان ئەردۆغان و مەرال ئاكشەنەر لە 30ی8ی2019 دەستی پێ كردووە.

چەند سەركردەیەكی ناو پارتی باش بە سەلفییان گوتووە، بەستەڵەكی نێوان ئاكەپە و پارتی باش تا ئاستێك تواوەتەوە، بەڵام پێویستی بە چەند كۆبوونەوەیەكی تر هەیە تا بتوانن زیاتر لە یەكتری نزیك ببنەوە.

هەروەك ئاشكرایە ئەحمەد داودئۆغلۆ و عەلی باباجان كە دوو سەركردەی دیاری ناو ئاكەپە بوون و دەستیان لەكار كێشایەوە و هەریەكە و بە جیا پارتێكی سیاسی دامەزراند، ئەمەش بۆشاییەكی گەورەی لەناو ئاكەپەدا دروست كرد، بۆیە ئاكەپە بۆ پڕكردنەوەی ئەو بۆشاییە پێویستی بەوە هەیە هاوپەیمانی (كۆماری) فراوان بكات.

ئاكەپە دەیەوێت پارتی باش لە خۆی نزیك بكاتەوە، تا بتوانێت لە هەڵبژاردنی سەرۆكایەتیی كۆماریی توركیا دەنگی ئەو پارتە بۆ هاوپەیمانییەتەكەی مسۆگەر بكات، كە ئاشكرایە پارتی باش رێژەی دەنگەكانی 10٪ دەبێت.

سەلفی لە وتارەكەیدا كە لە رۆژنامەی (حوریەت)ی توركی بڵاوی كردووەتەوە ئاماژەی داوە، بەرپرسانی پارتی باش بە هاتنە ناوەوەی هەدەپە بۆ هاوپەیمانیی (میللەت) لە هاوپەیمانییەتەكە دەكشێنەوە و ئەگەر زۆرە بچنە ناو هاوپەیمانی (كۆماری)یەوە.

هەروەک چەند میدیایەكی توركیا باسی لێوە دەكەن، ناكۆكیی نێوان جەهەپە و پارتی باش لەسەر هەدەپە تۆخ بووەتەوە، چونكە پارتی باش پێی باش نییە جەهەپە ئەوەندە خۆی لە هەدەپە نزیك بكاتەوە، بەڵكوو مەرال ئاكشەنەر سەرۆكی پارتی باش، پێی باشە وەكوو پارتی دەسەڵات هەدەپە وەكوو تیرۆریست بناسێنن.

ئەگەر هەڵبژاردە بخەنە بەردەم جەهەپە كە گەورەترین پارتی ئۆپۆزسیۆنی توركیایە، بەوەی ئاخۆ پارتی باش هەڵدەبژێریت یان هەدەپە؟ جەهەپە روو لە هەدەپە دەكات، چونكە رێژەی دەنگەكانی هەدەپە زۆر لە پارتی باش زیاترە، جگە لەوەی بۆ هەڵبژاردنی سەرۆكایەتیی كۆماری توركیا، بەبێ دەنگی كورد هیچ كاندیدێك ناتوانێت سەركەوتن بەدەست بهێنێت.

ئەگەر پارتی باش بچێتە ناو هاوپەیمانیی (كۆماری)یەوە، رێژەی دەنگەكانی كەم دەبێتەوە، چونكە دەنگدەری ئەو پارتە دەپرسن بۆچی لەگەڵ پارتێكدا دەبیتە هاوپەیمانی كە دەیان جار گوتووتە سەرۆكەكەی كە ئەردۆغانە تاكڕەوە و گەندەڵە، ئەی بۆچی لەگەڵ تاكڕەو و گەندەڵدا دەست دەخەیتە ناو دەست.