كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

وەزارەتی کارەبا: کارەبای هەرێمی کوردستان کاتژمێرێکی دیكه‌ زیاد دەبێ

 وەزارەتی كارەبای هه‌رێمی كوردستان، ئاشكرای دەكا، بەهۆی به‌ستنه‌وه‌ی وێستگه‌ی 165 مێگاواتیی گه‌رمیان به‌ تۆڕی كاره‌بای كوردستانه‌وه‌، کاتژمێرێکی تر کارەبای نیشتمانی زیاد دەکات.

ئه‌مڕۆ یەکشه‌ممه‌ 2/5/2021، ئومێد ئەحمەد، گوتەبێژی وەزارەتی کارەبای حکوومەتی ھەرێمی کوردستان، بە (باسنیوز)ی راگەیاند :"لە دوێنێوە  دەست کراوە بە بەستنەوەی وێستگەی 165 مێگاواتی گەرمیان بە تۆڕی نیشتمانی کارەبای ھەرێمی کوردستان و لە 15ی مانگەوە بەرھەمھێنانی کارەبا لە وێستگەکە دەست پێدەکات، کە لە غازی سروشتیی بیرە نەوتەکانی حەسیرە کارەبا بەرھەم دەھێنێت".

ڕوونیشی کردەوە ئەو پڕۆژەیە بۆ ژێرخانی کارەبا گرنگە و دەبێتە هۆی زیادبوونی کاتژمێرەکانی کارەبا، "بەم پڕۆژەیە کاتژمێرێکی تر کارەبای نیشتمانیی لەسەرتاسەری کوردستان دەدرێتە هەموو هاووڵاتییان".

ئومێد ئەحمەد جەختی کردەوە، هەموو پڕۆژەکانی وەزارەتی کارەبا بۆ زیادکردنی بەرهەم و بارسووكکردنی تۆڕەکانی  کارەبایه، "ژێرخانی هەرێمی کوردستان بۆ بەرهەمهێنانی کارەبا لە سەرووی 6 هەزار و 700 مێگاواتە، بەڵام ئەوەی ئێستا لە ئیشدایە سێ هەزار و 400 مێگاواتە و هەوڵی زیاترکردنی دەدرێ".

گوتەبێژی وەزارەتی کارەبا ئاشکراشی کرد" ئێستا بە تێکڕا 22کاتژمێر کارەبای نشتیمانی دەدرێ".