کتێبی (ئینسكلۆپیدیای قوتابخانەكانی پارێزگای هەولێر) چاپ و بڵاو کرایەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

کتێبی (ئینسكلۆپیدیای قوتابخانەكانی پارێزگای هەولێر) چاپ و بڵاو کرایەوە

بەرگی یەکەمی كتێبی ١٠ بەرگیی تایبەت بە ئەرشیف و مێژوو و زانیاری، بەناونیشانی (ئینسكلۆپیدیای قوتابخانەكانی پارێزگای هەولێر ١٩٢١ -٢٠٢٠) لە ئامادەكردنی (ئاری ئاغۆك)‌ و سەرپەشتی گشتیی (بەشدار عەبدولخالق خۆشناو) چاپ و بڵاو كرایەوە.

ئاری ئاغوك ئامادەكار و نووسەری كتێبەكە بە (باسنیوز)ی ڕاگەیاند: "ئەم كتێبە ساڵانێكە هەوڵی بۆ دەدەم و سەرەنجام توانیم لە چەند ڕۆژی ڕابردوودا چاپ و بڵاوی بكەمەوە کە بەرگی یەکەمی لە دووتوێی 270 لاپەرە و بە چاپی ڕەنگاڕەنگ لە نەخشەسازی و دیزاینی (هیوا عەباس) و لەسەر ئەركی خۆم چاپ کراوە".

 گوتیشی: "ناوەرۆكی ئەم كتێبە مێژووییە كە تایبەتە بە لایەنی پەروەردە، لەمێژ بوو بیرۆكەی ئەم كتێبەم لەلا گەڵاڵە ببوو، دوای زیاتر لە ساڵێك ئامادەكاری و خەریكبوون پێیەوە، توانیم ئەم كتێبە چاپ بکەم كە ناوەرۆكەکەی بریتییە لە مێژووی قوتابخانەكانی پەروەردەی ناوەندی هەولێر (ساڵی دامەزراندن، ناونیشان، ساڵی دەستبەكاربوون و دەست لەكار هەڵگرتنی یەكەم بەڕێوەبەر تا دوایین بەڕێوەبەر، لەگەڵ وێنەی كەسیی سەرجەم بەڕێوەبەرەكان)".

ئاماژەی بەوەش کرد: "دەسپێکی مێژووی قوتابخانەکانی هەولێر لە ساڵی 1921وە دەست پێ دەكات تا ساڵی 2020 و هەوڵم داوە زۆر بە وردی و وریایی مێژووی ساڵەكان ئاماژە پێ بكەم، چونكە ئەم كارە دەچێتە خانەی ئەرشیفەوە و لە داهاتوو ڕەنگە توێژینەوەی زانستی و ئەكادیمیی لەسەر بكرێت".

ئاری ئاغۆک ئەوەشی خستە ڕوو: "ئەم كتێبە بەرگی یەكەمی تایبەتە بە پەروەردەی ناوەندی شار، 10 بەرگی دیکەشی ماوە و ئێستا چەند پەروەردەیەكی تر لە دیزاین و ئامادەكردندان، چونكە سنووری بەڕێوەبەرایەتیی گشتی پەروەردەی هەولێر (11) بەڕێوەبەرایەتیی لە قەزاکان لەخۆ دەگرێت و ئێمەش كار لەسەر سەرجەم بەڕێوەبەرایەتییەکانی پەروەردەی پارێزگای هەولێر دەكەین".