كەناڵێكی توركی گۆرانییەكی كوردی دەدزێت و پاشان لێی ئاشكرا دەبێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كەناڵێكی توركی گۆرانییەكی كوردی دەدزێت و پاشان لێی ئاشكرا دەبێت

گۆرانییەكی بەناوبانگی كوردی کە بە شێوەزاری (زازاكی) گوتراوە، لە لایەن كەناڵێكی توركییەوە دزراوە و لە كاتی پارشێواندا وەكوو گۆرانییەكی ئایینیی تورکی پێشكەشی گەلی توركیای دەكەن، بەڵام هەر زوو راستیی خاوەنی سەرەکیی گۆرانییەكە ئاشكرا كرا.

گۆرانی (ئەلقاژیێ) لە لایەن (میكایل ئەسڵان)ەوە گوتراوە كە خەڵكی باكووری كوردستانە، بە گوتەی ئەسڵان، ئەو گۆرانییە فۆلكلۆری كوردییە و موڵكی هیچ نەتەوەیەكی تر نییە.

لە كەناڵی (ATV)ی توركی، لە بەرنامەی ئایینی (نیهاد خەتیبئۆغلۆ)، گۆرانی (ئەلقاژیێ) پەخش دەكرێت و وەكوو یەكێك لە ئاوازە خۆشەكان لە توركیا ناوی دەركردووە، بەڵام ئەو كەناڵە ئاوازی گۆرانییەكەی گەڕاندووەتەوە بۆ فۆلكلۆری توركی.

ئەسڵان لەبارەی ئەو گۆرانییەوە ڕای گەیاندووە: "ئەگەر گۆرانییەك ئاوازەكەی فۆلكلۆر بوو، بەو مانایە نییە خاوەنی گۆرانییەكە نادیارە، نەخێر گۆرانییەكە پەیوەستە بە زمان و كولتوور و ئەو جوگرافیایەی لێی هاتووە، بۆیە واز لە دزینی گۆرانی كوردی بهێنن".

ئەسڵان قسەی بۆ ماڵپەڕی (T24)ی توركی كردووە و ئاماژەی بەوە داوە: "وەكوو گۆرانیبێژێك و گوتنی گۆرانی (ئەلقاژیێ) بەرپرساریەتیم بەرانبەر بە گۆرانییەكە هەیە، چونکە ناكرێ بدزرێت و ناوی گۆرانییەكەش بخرێتە سەر موڵکی نەتەوەیەكی تر".

ئەو هونەرمەندە ئاماژەی بەوەش كرد: "پێویستە گۆرانییەكە بە زمانە ئۆرجیناڵەكەی بوترێت، لە سویسرا و فەڕەنسا و ژاپۆنیش ئەو گۆرانییە بە زمانە ئۆرجیناڵەكەی گوتوراوەتەوە، كە هەموو دەزانن گۆرانییەكە زازاكییە و لە دەرسیم بەرهەم هاتووە. راستە میوزیك نێونەتەوەییە، بەڵام ناكرێت گۆرانییەكە بە توركی بڵێیت و خاوەنە راستەقینەكە ون بكەیت".

گۆرانیبێژانی توركیا چەندین گۆرانی كوردییان دزیوە و ناوی خۆیان لەسەری نووسیووە، بەتایبەت ئەو گۆرانییانەی فۆلكلۆری كوردین و تورك وەكوو فۆلكلۆری توركی بڵاویان كردووەتەوە. هەر بۆ نموونە گۆرانی (قەرەزیندان)ی ئیبراهیم تاتڵیساس، لە بنەڕەتدا گۆرانییەكی كوردی رەسەنە و بە دەنگی (عەلی مەردان) لە ساڵانی سەشتەكانەوە گوتراوە بە ناوی (مامە گیانی مامە).

هەروەها گۆرانی (شیرین بەهارە)ی تایر تۆفیقیش هەر كوردییە و تورك خۆی كردووە بە خاوەنی و دەیان نموونەی تر بەردەستن ئەگەر باسی بكرێت.