ڕاگری پەیمانگەی تەكنیكیی كۆیە: هەر خوێندكارێك گوڵێك بقرتێنێ سزای دەدەین
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ڕاگری پەیمانگەی تەكنیكیی كۆیە: هەر خوێندكارێك گوڵێك بقرتێنێ سزای دەدەین

"مایەی خۆشحاڵیمانە خوێندكاران بۆنی گوڵەكانی باخچەی پەیمانگە دەكەن"

ڕاگری پەیمانگەی تەكنیكیی كۆیەی سەر بە زانكۆی پۆلیتەكنیكی هەولێر لە ئاگادارییەكی سەرنجڕاكێشدا داوا لە قوتابییان دەكات بە خۆشی بەناو باخچەی پەیمانگەدا بسوڕێنەوە و بۆنی گوڵەكان بكەن، بەڵام گوڵ لێ نەكەنەوە.

لە ئاگادارییەكەی پەیمانگەی تەكنیكیی كۆیە كە ئیمزای د.محەمەد خزر قادر ڕاگری پەیمانگەی پێوەیە، هاتووە "خوێندكارانی خۆشەویست لاتان ئاشكرایە كە دیمەنی باخچە و گوڵ و گوڵزارەكانی ناو پەیمانگا جوانییەكی دڵڕفێنی داوە بە پەیمانگەكەمان و ئێوەی خۆشەویست لە دەوامی بەیانیان و ئێواران بەخۆشیەوە لە ناو باخچە و گوڵەكان دەسوڕێنەوە و وێنەی رەنگاورەنگ دەگرن و بۆنی گوڵەكان دەكەن، كە ئەوەش مایەی خۆشحاڵیمانە، بەڵام بە داخەوە دەبینین هەندێ لە خوێندكاران گوڵ لێ دەكەنەوە، ئەوەش دەبێتە مایەی لەدەستدانی جوانی باخچەكانمان و دیمەنە جوانەكەی".

د. محەمەد خزر قادر ڕاگری پەیمانگەكە هەروەها دەڵێ "داواتان لێ دەكەین بە هیچ شێوەیەك پەنا نەبەنە بەر قرتاندن و لێكردنەوەی گوڵ و ئەزیەتدانیان، ئازادن لەناو باخچەكان دادەنیشن و پیاسە دەكەن و وێنە دەگرن، تەنانەت بە بڕكەوە بۆنی گوڵەكانیش بكەن، هەرچەندە بۆ گواستنەوەی ڤایرۆسی كۆرۆنا رەنگە بۆنكردنیان تەندروست نەبێ، بەڵام لەوە ڕێگەیان لێ ناگرین، بەڵام بە لێكردنەوەی هەر گوڵێك، ئێمە ڕێككاری یاسایی دەگرینە بەر و بە لێكردنەوەی هەر گوڵێك دەبێ خوێندكارەكە سێ نەمام دابین بكات بۆ پەیمانگە، بە پێچەوانەوەش لیژنەی ڕێككاری لەسەر پێك دەهێندرێ. بە هیوا ئەوەی هەموومان پارێزگاری لەو دیمەنە جوانەی باخچەكانمان بكەین".