سەرۆکی لیژنەی پارێزگاکان لە ئەنجوومەنی نوێنەرانی عێراق رای گەیاند ئەنجوومەنی پارێزگاکان لە دادگای فیدراڵی سکاڵایان لەدژی ئەو بڕیارەی پەرلەمان تۆمار کردووە کە ئەنجوومەنی پارێزگاکانی هەڵوەشاندووەتەوە و ئەمڕۆ دووشەممە وادەی بڕیاری دادگایە بۆ یەککلاکردنەوەی سکاڵاکەیان.
شێروان دووبەردانی، سەرۆکی لیژنەی پارێزگاکان لە ئەنجوومەنی نوێنەرانی عێراق بە (باسنیوز)ی ڕاگەیاند: "ئەنجوومەنی پارێزگاکان سکاڵایان لەسەر بڕیارێکی پەرلەمان بۆ ھەڵوەشاندنەوەی ئەنجوومەنی پارێزگاکان تۆمار کردووە و چاوەڕێ دەکرێت ئەمڕۆ دووشەممە دادگای فیدراڵی سکاڵای ئەنجوومەنی پارێزگاکان یەکلا بکاتەوە".
ئەو پەرلەمانتارە گوتیشی: "ئەگەر دادگا بڕیاری پەرلەمانی عێراق بە نایاسایی بزانێت و ھەڵیوەشاندەوە، ئەوا ئێمە لە پەرلەمان کار دەکەین بۆ ھەمواری یاسای سێیەمی ئەنجوومەنی پارێزگاکان".
شێروان دووبەردانی ئاماژەی بەوەش کرد: "ھەمواری یاسای ئەنجوومەنی پارێزگاکان ھاوشێوەی یاسای ھەڵبژاردنی پەرلەمان دەبێت و دەبێتە فرەبازنە".