ڕۆژنامەنووسێکی سلێمانی: تاقمێكی قاچاخچی ھانی خەڵکی سلێمانی دەدەن پابەندی قەدەغەی هاتوچۆ نەبن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ڕۆژنامەنووسێکی سلێمانی: تاقمێكی قاچاخچی ھانی خەڵکی سلێمانی دەدەن پابەندی قەدەغەی هاتوچۆ نەبن

“تاقمەكە لە پێناو مەرامە سیاسییەكانی خۆیان تەندروستی و ڕۆحی خەڵكیان بەلاوە گرنگ نییە”

رۆژنامەنووسێكی شاری سلێمانی ئاشكرای دەكات، تاقمێكی خۆفرۆش و قاچاخچیی دەسەڵاتدار لە سلێمانی، لە ڕێگەی ئەو میدیا و پەیجانەی بە پارەی داهاتی دزراوی سلێمانی خستوویانەتە گەڕ، دژایەتیی بڕیاری قەدەغەی هاتوچۆ دەكەن و هانی خەڵكی دەدەن بۆ پابەندنەبوون بە ڕێنماییەكانی تەندروستی.

كاتژمێر ٨ی ئەمشەوەوە، بڕیاری وەزارەتی ناوخۆی حكوومەتی هەرێمی كوردستان بۆ قەدەغەی هاتوچۆی ئۆتۆمبێل و پیادە كەوتە باری جێبەجێكردن و پارێزگاكانی هەولێر و دهۆك بە تەواوی یەكە كارگێڕییەكانیانەوە پێیەوە پابەند بوون، بەڵام هەر لەگەڵ دەست پێكردنی قەدەغەی هاتوچۆ، میدیای سەر بە تاقمی خۆفرۆشی ١٦ی ئۆكتۆبەر بە بڵاوكردنەوەی وێنە و ڤیدیۆی پابەندنەبوون بە بڕیارەكە و پیاسە و گەڕانی خەڵك لە شەقامەكانی سلێمانی و یەكە كارگێڕییەكانی سەر بە سلێمانی، هانی خەڵكیان دا بۆ ئەوەی پابەندی ڕێنماییە تەندروستییەكان و بڕیاری قەدەغەی هاتوچۆ نەبن.

لەمبارەیەوە ئامانج عەبدوڵا سوور، ڕۆژنامەنووس و شرۆڤەکاری سیاسی لە شاری سلێمانی بە (باسنیوز)ی ڕاگەیاند، بە گشتی لە سنووری پارێزگای سلێمانی، لایەنی ئیداریی شار پابەندی ڕێوشوێنەكانی ڕووبەڕووبونەوەی پەتای کۆرۆنا نەبوون، ئەمەش ئەو راستییە دەر دەخات کە لایەکەوە ئیدارەی شار تووشی شكستی ئیداری بووە و لە لایەکی دیكەشەوە باکیان بە سەلامەتیی تەندروستیی هاووڵاتییانی پارێزگاكە نییە و مردنی خەڵكیشیان بەلاوە گرنگ نییە.

ڕوونیشی كردەوە: “میدیا سێبەرەکانی تاقمی خۆفرۆش و خاكفرۆشی ١٦ی ئۆكتۆبەر، بە ئاشکرا ھانی خەڵكی دەدەن كە بڕیارەكان بشکێننو دژی کەلتووری خۆپارێزی دەوەستنەوە، ھەر ئەوەشیان لێ چاوەڕێ دەکرێت، تاقمێك نیوەی خەڵك و خاكی باشووری كوردستانیان فرۆشتبێت، چ باكیان بە ژیان و سەلامەتیی تەندروستیی خەڵك هەیە؟”.

ئەو رۆژنامەنووسەی سلێمانی دووپاتی كردەوە كە ئەو كارەی ئێستای میدیاكانی سەر بە تاقمە خۆفرۆشەكە دەیكەن، هەمان كاریان لە بەهاری ساڵی ڕابردووش كردووە و دەیانویست وا لە خەڵكی بگەیەنن كە داتاكانی كۆرۆنا راست نییە، سەرەنجامیش بوونە هۆی تووشبوونی دەیان هەزار كەس بە كۆرۆنا و گیان لەدەستدانی سەدان كەس. گوتیشی: “حەیف سلێمانی جارێکیتر باجی شكستی ئیداریی دەسەڵاتداران و تاقمێكی خۆفرۆش لە شارەكە دەدات”.

ئامانج عەبدوڵا سوور دووپاتی كردەوە، رۆژانە خەڵكی كوردستان بە گشتی مەرگی ئازیزانیان بە كۆرۆنا دەبینن، ویستێكی گشتیش هەیە بۆ پابەندبوون بە ڕێنماییەكانی تەندروستی، بەڵام لە لایەن میدیای تاقمێكی خۆفرۆشەوە هان دەدرێن و لەو پابەندبوونە سارد دەكرێنەوە، “هەموو ئەمانەش لە پێناو موزایەدەی سیاسی و سینگ دەرپەڕاندنی هەرزەكارانەی سەرانی تاقمەكەیە”.