ئۆپۆزسیۆن و ئاشتەوایی کۆمەڵایەتی
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئۆپۆزسیۆن و ئاشتەوایی کۆمەڵایەتی

بەشێک لە خەڵک، کە گوێیان لە ناوی ئۆپۆزسیۆن دەبێ، وا دەزانن بە مانای دژایەتیکردن و دوژمنایەتیکردنی حکوومەتە، ئەوەش لە دەرەنجامی ئەوەوە نییە، کە ئۆپۆزسیۆن لە هەرێمی کوردستان تەمەنێکی کورت و ئەزموونێکی کەمی هەیە، بە مانایەکی تر، وانەبێ ئۆپۆزسیۆن ئەدای ڕاستەقینەی خۆی نەزانێ، بەڵکو ئەوان لە ڕێگەی کۆمەڵێک میکانیزمی ناشەرعی و نادەستووری، هەوڵی بەلاڕێدابردنی ڕای گشتی و بەتایبەت دەنگدەرانی خۆیان ئەدەن، چونکە خودی ئۆپۆزسیۆن لە هەرێمی کوردستان، وەکو کاردانەوە لە هەناوی حزبێکی دەسەڵاتدار و لەپێناو بەرژەوەندیی تایبەتی خۆیان دروست بوو، لەگەڵ ئەوەش، تا ئێستا لە هەرێمی کوردستان هیچ حزبێک لەبەر بەرژەوەندیی گشتیی وڵات و هاونشتمانییان، ئۆپۆزسیۆنبوونی هەڵنەبژاردووە، واتە یان تاوەکو هەڵبژاردنی داهاتوو چاوەڕوانی کردووە، بۆ ئەوەی لە ڕێگەی کۆمەڵێک چەواشە و دروستکردنی دڕدۆنگی و هەوڵی تێکدانی ئاشتەوایی کۆمەڵایەتی، ئەوەش تەنیا لەپێناو زیادکردنی کورسییان لە پەرلەماندا، یانیش ئەو پۆستانەی لە حکوومەت بەریان دەکەوێت، لە تمووحی ئەوان کەمتر بووە.

 ئەوەی ئێستاش لەلایەن ئۆپۆزسیۆنەوە لە پەرلەمانی کوردستان دەگوزەرێت، تەواو پێچەوانەی هەموو بنەما ئەخلاقییە سیاسی و کۆمەڵایەتییەکانە، چونکە ئەوان لە ڕێگەی کۆمەڵێک دەزگا و کەناڵی ئاسمانی و تەنانەت کەسانی بەناو ئەکادیمی و بەشێک لە مامۆستایانی زانکۆ، دەیانەوێت ئاشتەوایی کۆمەڵایەتی لە هەرێمی کوردستان بخەنە مەترسییەوە، هەروەها ئەوان لە ڕێگەی کۆمەڵێک ڕێوشوێنی ناعەقڵانی و نامەنتقی، هەوڵی دروستکردنی پشێوی لە ڕای گشتیدا دەدەن، بۆ نموونە، زۆر جار هەرێمی کوردستان بە وڵاتێکی ئەوروپیی دیاریکراو بەراورد دەکەن، کە گوایە هەرێمی کوردستان نەیتوانیوە وەکو وڵاتانی ئەوروپی لە هەموو بوارەکاندا خزمەتگوزاری پێشکەش بە هاووڵاتییان بکات، بەڵام ئەوان ئەوە ناخەنە ڕوو، کە هەرێمی کوردستان ئەو دەستکەوت و ئارامی و ئاسایش و ئاوەدانییەی بە دەستی هێناوە، تەنیا لە ماوەی سی ساڵی ئەزموونی حوکمڕانیدا بووە، لەکاتێکدا وڵاتانی ئەوروپا دوای چەندین سەدە لە حوکمڕانی، لەگەڵ هەڵگیرسانی چەندین شەڕی ناوەخۆیی و مەزهەبی و ئیقلیمی و نێودەوڵەتی، نزیکەی پەنجا ساڵێکە ژیانی هاووڵاتییانیان بە کەنارێکی ئارام گەیشتووە، بۆیە لەم قۆناغەدا، دەبوو ئۆپۆزسیۆن بۆ هەماهەنگی و یارمەتیدانی حکوومەت، داوای دروستکردنی حکوومەتی سێبەریان بکردایە، نەک دژایەتیی حکوومەت و ئەزموونی کوردی، چونکە هەرێمی کوردستان لە  قۆناغێکی ڕاگوزەردایە، لەم قۆناغەشدا زیاتر لە هەموو کاتێک پێوستیمان بە یەکدەنگی و یەکهەڵوێستی هەیە.

لە لایەکی ترەوە، ئەوەی جێی سەرسوڕمانە ئەوەیە، کە حزب هەیە بەشدارە لە حکوومەت، کەچی بەشێک لە پەرلەمانتارانی بە پاڵپشتیی نەیارانی کورد، دەیانەوێت ئاشتەوایی کۆمەڵایەتی تێک بدەن و ئەزموونی هەرێمی کوردستان بشێوێنن، چونکە ئەوان بەئاشکرا ئەدای ئۆپۆزسیۆنێکی ناشرین دەکەن، بەڵام هاونیشتمانییانی هەرێمی کوردستان، ھیوا و متمانەی تەواویان ھەیە، کە پارتی دیموکراتی کوردستان، بەو قەبارە و پێگەیەی لە پەرلەمانی کوردستان و عێرقدا هەیەتی، بە پاڵپشتی و حیکمەتی جەنابی سەرۆک بارزانی، ڕێگە لە هەموو هەوڵێکی نەزۆک دەگیرێت، کە بیانەوێت ئاشتەوایی کۆمەڵایەتیی هەرێمی کوردستان تێکدەن و بشێوێنن، هەربۆیەش، پاراستنی قەوارەی هەرێمی کوردستان بە هەموو دەستکەوتەکانییەوە، لە سەرووی هەمووشیان ئاشتەوایی کۆمەڵایەتی، لە کارە هەرە لەپێش و گرنگەکانی ئەو کابینەیەی حکوومەتی هەرێمی کوردستاندایە.

 

* توێژەر.