دەمیرتاش داوا لە ئۆپۆزیسیۆن دەکات هاوپەیمانییەکی دیموکراتی پێک بهێنن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

دەمیرتاش داوا لە ئۆپۆزیسیۆن دەکات هاوپەیمانییەکی دیموکراتی پێک بهێنن

”ئەردۆغان تورکیا دەباتە ناو هەڵبژاردنی پێشوەختە“

هاوسەرۆكی پێشووی پارتی دیموكراتی گەلان (هەدەپە) داوا لە پارتە ئۆپۆزسیۆنەكانی توركیا دەكات، هاوپەیمانییەكی دیموكراتی پێكبهێنن.

سەڵاحەدین دەمیرتاش، هاوسەرۆکی پێشووی هەدەپە، کە لە 2016ـەوە زیندانی کراوە، لە گرتووخانەی ئێدیرنە وەڵامی پرسیارەكانی ئاژانسی (رۆیتەرز)ی داوەتەوە.

سەڵاحەدین دەمیرتاش رایگەیاندووە، بزووتنەوەی نەتەوەپەرستی تورکیا (مەهەپە) هەوڵ دەدات سوود لە پارتی داد و گەشەپێدان (ئاکەپە)ی دەسەڵاتدار وەربگرێت، بۆ ئەوەی دەست بەسەر دەسەڵاتی تورکیادا بگرێت، ”بەڵام لەو هەوڵەی سەرکەوتوو نابێت“.

هاوسەرۆکی پێشووی هەدەپە ئامۆژگاریی پارتە ئۆپۆزیسیۆنەکانی تورکیا دەکات و داوایان لێدەکات هاوپەیمانییەکی دیموکراتی دروست بکەن و بە یەکگرتوویی رووبەڕووی ئاکەپەی دەسەڵاتدار ببنەوە.

لەبارەی هەوڵەکانی داخستنی هەدەپە، کە حکوومەت لەڕێی داواکاری گشتییەوە هەوڵی بۆ دا و دادگای دەستووری رەتی کردەوە، دەمیرتاش رایگەیاندووە، هەوڵەکانی ئاکەپە و مەهەپەی هاوپەیمانی بۆ داخستنی هەدەپە ”پیلان“ێک بوون بۆ پەرتوبڵاوکردنی ئۆپۆزیسیۆن.

هاوسەرۆکی پێشووی هەدەپە پێشیوایە رەجەب تەییب ئەردۆغانی سەرکۆماری تورکیا و حزبەکەی (ئاکەپە)، هیچ شتێک نەماوە نەیکەن بۆ مانەوەیان لە دەسەڵات، داخستنی هەدەپەش لە چوارچێوەی هەوڵەکانیانەبۆ مانەوە لە دەسەڵات، لەڕێگای داخستن و پەرتکردنی ئۆپۆزیسیۆن.

سەڵاحەدی دەمیرتاش هەروەها داوا لە حزبە ئۆپۆزیسیۆنەکان دەکات ئامادەکاریی بۆ بەشداریکردن لە هەڵبژاردنی پێشوەختە بکەن، چونکە ”بارودۆخی ئابووریی توركیا لەوپەڕی خراپیدایە و بەرلەوەی بە تەواوی تووشی داڕووخان بێت، ئەردۆغان توركیا دەباتە ناو قۆناغی هەڵبژاردنی پێشوەختەوە“.