كە لە شانازیی مێیینەبوون تێنەگەیشتوویت، چۆن كرایتە پەرلەمانتار؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كە لە شانازیی مێیینەبوون تێنەگەیشتوویت، چۆن كرایتە پەرلەمانتار؟

 

ئاكامی سەرهەڵدانی وتاری پۆپۆلیستی و زمانی زبر و توتدوتیژ له‌ سیاسه‌تكردندا، كه‌سانی وه‌ك ئه‌و په‌رله‌مانتاره‌ی لێ دێتە به‌رهه‌م كه‌ له‌ مینبه‌ری په‌رله‌مانه‌وه‌ سووكایەتی بە ژن و مێینە دەكات و پێی وایه‌ ئه‌وه‌ی له ‌زاری بێته‌ ده‌ره‌وه‌، ئازایه‌تی و بوێریه،‌ برا تۆ شه‌رمه‌زارییت نه‌ك بۆ خۆت، بەڵكوو بۆ حزبه‌كه‌شت دروست كرد كه‌ بەحساب (حزبێكی سۆشیال دیموكراته)، كاتی ئەوە هاتووە خەڵك له‌وه‌ تێبگه‌ن ئاستی بیركردنەوە و عه‌قڵیه‌تی تۆ له‌ كوێ و، سۆشیال دیموكرات له‌ كوێ!

دەبێ بڵێم داخه‌كه‌م به‌ ناوی دیموكراسی و ئازادییەوە چیتان له‌ كوردستانه‌كه‌مان كرد! گرنگترین و باڵاترین دامه‌زراوەی یاسادانان و چاودێریكردن كە پەرلەمانە، خەریكە لەلایەن ئێوەوە هەیبەتی بشكێنرێت چونكە خۆتان بێهەیبەتن، ئێوە زۆرتان لە پێگەی پۆستی پەرلەمانتاری هێنایە خوارەوە، ئێستا لەبری ئەوەی ئێوەی پەرلەمانتار پێشڕەوی خەڵك بن، خەڵك گاڵتە بە رەفتار و گوفتاری هەندێكتان دەكات كە پێتان وایە كاری پەرلەمانتاری، وێڕای ئیمتیازی دارایی جۆراوجۆر، خۆ بەپاڵەوانكردن و خۆدەرخستنی درۆیینەیە لە میدیا رەسمیەكان و سۆشیال میدیاوە.

له ‌هه‌موو دنیادا په‌رله‌مان كۆڵه‌كه ‌و پایه‌یه‌كی پته‌وه،‌ په‌رله‌مانتاره‌كان كار بۆ هه‌یبه‌ت و شكۆی ئه‌و دامه‌زراوه‌ گرنگه‌ ده‌كه‌ن و ده‌یپارێزن، چونكە پاراستنی پێگە و هەیبەتی پەرلەمان، دواجار پاراستنی پێگەی گەل و وڵات و نەتەوە و خۆشتانە، كەچی به‌پێچه‌وانه‌وە بەشێك لە حزبه‌ كوردستانیه‌كان له‌ڕێگه‌ی په‌رله‌مانتارە بێئاستەكانیانەوە، به‌ها و سه‌نگی ئەو دەزگا گرنگە ئه‌تك ده‌كه‌ن.

هه‌ڵبه‌ته‌ ده‌بێ بڵێم لەنێوان ئەم رەخنە و قسانەی من دەیانووسم، په‌رژینێكی قایمم داناوە بۆ ئه‌و په‌رله‌مان و فراكسیۆنانه‌ی تر كه زۆربەی ‌ئه‌ندام په‌رله‌مانەكانیان رێز له‌ خۆیان و حزبه‌كه‌یان و دەزگاكە و پێگەكەی دەگرن، پێوه‌ری په‌رله‌مانتاری بە زماندرێژی و هەڵا و هەڵپە و فیك و وڕ نییە، بەڵكوو بە شارەزایی لە بوارەكە و ئەدای سەركەوتووی پەرلەمانتاری و دڵسۆزی بۆ دەنگدەران و هەڵنەخەڵەتاندنیانە، ئنجا سەد دكتۆر بیت و چه‌ندیش یاساناس بیت، پوولێكی قه‌ڵب ناهێنیت، ئەگەر نەزانی پێگەی پەرلەمان و كەسایەتی و رۆڵ و ئەدای پەرلەمان چییە و دەبێ چۆن بێت.

ئه‌م مۆدیله‌ كۆمیدیە ماڵوێرانكەرەی كه‌ پەرلەمانتاران پێیان وایه‌ په‌رله‌مان به‌فرگره ‌و بتڵه‌ ئاوی تێدا هه‌ڵگیرێ، یان پێیان وایە دوكانی باته‌یه‌ پێڵاوی تیدا نماییش دەكرێ، یان پێیان وایە پەرلەمان شانۆی خۆنماییشكردنە و هەرچی درۆ و چەواشەكاری هەیە بیكە تا لای خەڵك دەبیە پاڵەوان، دەبێ كۆتایی پێ بێت. بۆ خاتری خودا ئیتر لەوە تێبگەن كە خەڵك بڕوا بە نماییش ناكات.

ئه‌گه‌ر لەنێو پەرلەماندا شەڕ بۆ قووتی خه‌ڵكی ده‌كه‌ن، ئه‌وا كاره‌كه‌تان زۆر ئاسانه و هیچ ئەم خۆسەغڵەتكردنەی ناوێ،‌ برای پەرلەمانتاری فراكسیۆنی سه‌وز، به‌ هاوسه‌رۆكه‌كەتان بڵێ ئیتر با (حكوومه‌تی مێینه)‌ بایكۆت بكەین، هیچ پۆست و پاره‌ و ئیمتیازێكتان لێی نه‌وێت، با ئێمه‌ش نه‌ڵێین ئێوە له‌سایه‌ی ئه‌م حكوومه‌ته‌ مێینەیەدا بوونه‌ته‌ خاوه‌نی پلە و پۆست و ئیمتیاز و دەتانەوێ حكوومەت ناشرین پیشان بدەن و خۆشتان جوان، تا ئێوە بەشێك بن لە حكوومەتی مێینە (بە قەولی خۆتان)، بە هیچ شێوەیەك بۆتان نیە، رەخنەی لێ بگرن، چونكە بەردەوام حكوومەت لە ئێوە جوانتر بووە.

له‌وه‌ته‌ی كابینه‌ی نۆیه‌م متمانه‌ی پێ به‌خشراوه،‌ من له ‌به‌رەی‌ ئه‌و كابینه‌یه‌دام و شانازی به‌ هه‌موو كار و هه‌نگاوه‌كانیەوە ده‌كه‌م، ئێستاش كە ئێوە بە (حكوومەتی مێینە) ناودێری دەكەن، سەد هێنده‌ شانازترم، ئای ئه‌و ناوه‌ چەند جوانە به‌ به‌ری حكوومه‌ته‌كه‌ماندا ببڕدرێت، چونكه‌ مێیینه‌ واتای دایك، حكوومه‌تیش دایكه،‌ مێیینه‌ واتا ژن، چونكه‌ بەرهەمهێنەری وه‌چه‌ی نوێیە‌ بۆ نیشتمان، ئای كه‌ جوانه‌ ناونانی حكوومه‌تی مێیینه،‌ چونكه‌ ئه‌و كچانه‌ ده‌گرێته‌وه‌ كە له‌ بواری ڕۆشنبیری و زانست و به‌رجه‌سته‌كردنی یاسا و یه‌كسانیدا خوێندوویانه تا نیشتمان جوانتر بكه‌ن به‌ مێیینەیی‌ خۆیان.

به‌ڵێ راسته،‌ فه‌لسه‌فه‌ی مێیینه‌بوون زۆر قووڵه،‌ كاڵفامێكی وه‌ك ئێوه‌ چۆن لێی تێده‌گات، له‌ هه‌گبه‌ی هه‌موو مێیینه‌یه‌كدا مێژوویه‌كی تاڵ و شیرین هه‌یه،‌ هه‌ر وه‌ك چۆن رەحمی حكوومه‌ته‌كه‌مان پڕه‌ له‌ سه‌روه‌ری و ده‌ستكەوت و پڕیشە لە تەحەدا و لەمپەری لابەلا، ‌وەك چۆن بەهای زێڕ لای زێڕینگه‌ره، بەهای ناونانی حكوومەتیش بە (حكوومەتی مێینە) لای مێینه‌یه‌.

پاشان برای پەرلەمانتاری (نه‌وه‌ی نوێ)، خۆ من هه‌ر كه‌ ده‌ڵێم (نه‌وه‌ی نوێ) بستێك باڵام كورت ئه‌بێ له‌ شه‌رما، ئاخر بۆ خاتری خوا (نه‌وه‌ی نوێ) لە كوێ و ئه‌م ڕه‌فتارانه و پێڵاو هاویشتن‌ لە كوێ؟ نەوەی نوێ واتە هزر و توانای نوێ، واتە بەرهەمی بیركردنەوەی نوێ، نەك هەرزەرەفتاری! ئەرێ بیرت نایە سه‌رۆكی جووڵانه‌وه‌‌كه‌تان لە سلێمانی كە ویستی بچێتە نێو خۆپیشاندەرانەوە و بە ناوی خەڵكی رەشوورووتەوە قسە بكات، چۆن پێڵاوبارانیان كرد؟!