كتێبی (قووڵایی ستراتیژی)ی ئەحمەد داودئۆغلۆ كرایە كوردی
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كتێبی (قووڵایی ستراتیژی)ی ئەحمەد داودئۆغلۆ كرایە كوردی

کتێبی "قووڵایی ستراتیژی، پێگەی تورکیا و ڕۆڵی لە گۆڕەپانی نێودەوڵەتیدا" لە نووسینی ئەحمەد داودئۆغلۆ سەرۆکوەزیرانی پێشووی تورکیا، لەلایەن "نەریمان تاڵیب"وە لە تورکییەوە وەرگێڕدراوەتە سەر زمانی کوردی و لە هەرێمی کوردستان چاپ و بڵاو کراوەتەوە.

ئەحمەد داودئۆغلۆ لەم کتێبەیدا ھەوڵی داوە رۆڵێكی نوێ بۆ توركیا تێوریزە بكات و تێیدا كەڵكی زۆری لە جوگرافیا و جێۆپۆلیتیك و مێژووی توركیا و ناوچەكە وەرگرتووە، ھەوڵی داوە رووداوەكانی مێژوو، بەتایبەتی مێژووی دەوڵەتی عوسمانی، كە 600 ساڵ تەمەنی ھەبووە و حوكمی ناوچەیەكی بەرفراوانی كردووە- وەك میراتێك و كەڵەكەبوویەك، بیكاتە سەرچاوەی توانست و ھێزی مەعنەوی بۆ توركیای نوێ.

بەشێک لەم كتێبە بریتییە لە خستننەڕووی دیدی نوێی داودئۆغلۆ بۆ پێگە و رۆڵی تورکیایەکی نوێ، کە بە گوتەی زۆربەی چاودێران و کارناسان، ئەم کتێبە زەمینەی سەرەکیی داڕشتنی سیاسەتی نوێی تورکیا بووە لەو كاتەوەی پارتی داد و گەشەپێدان توانی خۆی بسەپێنێ، ھەربەو ھۆیەوە بوو، کە تێڕوانینی تورکیا بۆ یەکێتیی ئەورووپا و بۆ وڵاتانی خۆرھەڵاتی ناوەڕاستیش، گۆڕانی ریشەیی بەسەردا ھات. بێگومان سیاسەتی کرانەوە بەسەر دۆزی کورد لە تورکیا و لە بەرانبەر ھەرێمی کوردستانی عێراقیش ھەر لەم سۆنگەیەوە بوو.

لە بەشی سێیەمی ئەم کتێبەدا داوودئۆغلۆ بە گرنگییەوە هەڵوەستە لەسەر پرسەكانی رۆژهەڵاتی ناوەڕاست و هەرێمی كوردستان و سەركردەكانی دەكات، کە ناتوانێ نكۆڵی بكات كە هەرێمی کوردستان پەیدابوویەكی جیۆسیاسی گرنگە، ئاماژە بە رۆڵی گرنگی سەرکردایەتیی سیاسیی هەرێمی کوردستان دەکات كە لەگەڵ هەریەك لە عێراق، توركیا، ئێران و سووریا، سیاسەتێکی زیرەکانەیان بەكار هێناوە.

لە كتێبەكەیدا داودئۆغلۆ بە گرنگییەوە باسی لێوەشاوەیی سەکردایەتیی سیاسیی کورد و هەندێک لە  بنەماڵە سیاسییەکانی لوبنانیش دەكات، هەروەهاهێنانی ناوی سەرۆک بارزانی، مەلیك حوسین، یاسر عەرەفات و بنەماڵەكانی دیكە پێكەوە ئاماژەیەكی ڕوونە كە لە دیدی ئەوەوە، كوردستان توانیویەتی دیپلۆماسییەتێكی نەرم و كاریگەر بەڕێوە بەرێت، هەڵوەستەی لەسەر ڕێبەرایەتی و كاراكتەری سەرۆک بارزانی کردووە كە توانیوێتی لە نەبوونی دەوڵەتدا، پەیڕەوی لە دیپلۆماسی و سیاسەتی نەرم بكات.