تۆ جارێ بچۆ بە لای عێراقەكەی خۆتەوە!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

تۆ جارێ بچۆ بە لای عێراقەكەی خۆتەوە!


لە یادی ڕاپەڕینی گەلی كوردستاندا، بەرھەم ساڵحی سەركۆماری عێراق، گوڕی داوەتە خۆی و وەك ئەوەی بیەوێت ئامۆژگاریی گەلی كوردستان و داوودەزگا دەستوورییەكانی ھەرێمی كوردستان بكات، پەیامێكی ئاراستەی ھەرێمی كوردستان كردووە و دەڵێت: ”پێویسته‌ له‌م یاده‌دا به‌هاکانی راپه‌ڕین به‌رز رابگیرێن به‌ رێزگرتن له‌ داخوازی و مافه‌کانی خه‌ڵک، به‌ کۆتاییهێنان به‌ ناعه‌داله‌تی و گه‌نده‌ڵی، پێویسته‌ به‌ کرده‌وه‌ گه‌ل سه‌رچاوه‌ی هه‌موو ده‌سه‌ڵات و شه‌رعیەته‌کان بێت و خزمه‌تکردنی هاووڵاتیان و به‌رجه‌سته‌کردنی به‌ها نیشتمانییه‌ راسته‌قینه‌کان بکرێنه‌ پێوه‌ری کارکردن“. جا بەم بۆنەیەوە ئەم سەركۆمارە بێ كردەوە و قاڵەقاڵكەرە پێویستە پێی بگوترێت:

1- لەجیاتی ئامۆژگاریكردنی ھەرێمی كوردستان، جارێ تۆ بچۆ بەلای عێراقەكەی خۆتەوە و بڕۆ بزانە ئەگەر 6 ملیۆن دانیشتوانی ھەرێمی كوردستان لە دانیشتوانی عێراق دەربكەیت 34 ملیۆن ھاووڵاتیی عێراق دەمێنێتەوە، لەم 34 ملیۆنە بۆچی 11 ملیۆن گەنج بێكارن و 11 ملیۆنی تریشیان لە ھێڵی ھەژاریدا دەژین و داھاتی ڕۆژانەی ھەر یەكێكیان ناگاتە 2 دۆلار، تۆ جارێ بچۆ بەلای ئەو 11 ملیۆن گەنجە بێكار و ئەو 11 ملیۆنەی تر كە ڕۆژانە كەمتر لە 2 دۆلار داھاتیانە و خۆیشت باش دەزانیت داھاتی یەك مانگی تەنیا یەك كەس لەو ھەژارانەی عێراق، ناكاتە یەك ژەم تشریبی خۆت لە باخەكەی خۆت لە مێرگەپان!

2- تۆ جارێ بچۆ سەروسۆراخێكی ئەو 600 ملیار دۆلارە بكە كە لەدوای ساڵی 2003وە و بە گوێرەی لێدوانێكی ڕەحیم ئەلعگێلیی سەرۆكی پێشووتری دەستەی دەستپاكیی عێراق، لە عێراقدا خوراوە و دزراوە و بەفیڕۆ چووە.

3- تۆ جارێ بچۆ تەنیا شوێنی ئەو 170 چالاكوانە بدۆزەرەوە كە لە ماوەی خۆپێشاندانەكانی ساڵی 2019 ی شارەكانی عێراق ڕفێنراون. تۆ جارێ بچۆ ئەو تاوانبارانە بدۆزەرەوە و دادگایی بكەن كە لە ھەمان ئەو خۆپێشاندانانەدا زیاتر لە 500 خۆپێشاندەریان كوشت و زیاتر لە 21 ھەزار كەسیشیان بریندار كرد.

4- تۆ جارێ بچۆ وەڵامی ئەو پرسیارە بدەرەوە كە بۆچی تەنانەت پێش پەلاماردانی داعش بۆ سەر ناوچە جیاجیاكانی عێراق و كوردستان، مەسیحیەكانی عێراق شارەكانی عێراقیان بەجێ دەھێشت و بۆچی ژمارەی مەسیحیەكان لە عێراقدا لە ملیۆن و نیوێكەوە ئێستا بووەتە كەمتر لە نیو ملیۆن و وەڵامی ئەو پرسیارەش بدەرەوە كە بۆچی پێش داعش و دوای پەلاماردانی داعش، بەشی زۆری مەسیحییەكان ھاتنە ھەرێمی كوردستان؟

5- تۆ جارێ بچۆ مشووری ئەو فەزاحەتە ئابڕووبەرانەیە بخۆ كە چ مامەڵەیەك بە كچان و كوڕانی زیندانیكراوی ناو زیندانەكانی عێراق دەكرێت؟

6- تۆ جارێ بچۆ ئەو درۆ گەورەیەت ڕاست بكەرەوە و سەری تەعزیم بۆ پێشمەرگەی كوردستان دابنەوێنە كە دوای ڕزگاركردنی باشیك ھەر پێشمەرگە بوو خاچێكیان لەسەر كەنیسەیەكی مەسیحیەكان لە باشیك بەرز كردەوە، بەڵام تۆ لە فەرماییشتێكتدا و لەبەردەمی پاپای فاتیكان لەجیاتی ناوھێنانی پێشمەرگە ئەم كارە دەكەیت بە كاری سوپای عێراق، وەك ئەوەی پاپای فاتیكان ئاگاداری وردەكاریەكانی تایبەت بە ژیان و ئازاری مەسیحیەكان لە عێراقدا نەبێت و ئاگاداری ئەوە نەبێت كە كێ چی لە مەسیحیەكان دەكات و كێیش چی بۆ مەسیحیەكان دەكات؟

7- خۆ ئەگەر زۆر لە خەمی كوردیشدایت، جارێ لە جاران دوو قسەی خێر بكە بۆ ئەو هەموو گوندنشینە كوردانەی كەركووك و دەوروبەری و داقووق و پەلكانە، كە رۆژانە بە پشتیوانیی حەشدی شەعبی و پارێزگاری سەپێنراو، عەرەبی هاوردەیان تێ بەردەدەن و زەوی و ماڵ و موڵكی خۆیانیان لێ زەوت دەكەن، بڕۆ خەمێك لەو هەزاران كوردە كەركووكیە بخۆ كە دوكان و ماڵ و گەڕەكیان تێك دەدەن، بڕۆ جارێك لە جاران بپرسە، ئەرێ ئەو هەزاران ماڵە كوردەی خورماتوو كە دوای خیانەتی ١٦ی ئۆكتۆبەر ئاوارە بوون، چییان بۆ كرا و ئێستا چۆن و لە كوێ دەژین!