سەركردەیەكی پارتی: لاهوور جەنگی بە خیانەتی ١٦ی ئۆكتۆبەر زۆرترین زیانی بە دەستكەوتەكانی راپەڕین گەیاند
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

سەركردەیەكی پارتی: لاهوور جەنگی بە خیانەتی ١٦ی ئۆكتۆبەر زۆرترین زیانی بە دەستكەوتەكانی راپەڕین گەیاند

”دوایین كەسە مافی ئەوەی هەبێت قسە لەسەر راپەڕین بكات“

ئەندامێكی سەركردایەتیی پارتی دیموكراتی كوردستان رای دەگەیەنێت كە لاهوور جەنگی بە خیانەتی ١٦ی ئۆكتۆبەر، زۆرترین زیانی بە دەستكەوتەكانی راپەڕینی گەلی كوردستان گەیاندووە و دوایین كەسە مافی ئەوەی هەبێت قسە لەسەر راپەڕین بكات.

كرمانج عەبدوڵا، ئەندامی سەركردایەتیی پارتی بە (باسنیوز)ی راگەیاند: ”راپەڕین هی خه‌ڵكی كوردستانە بە گشتی و بە سەرجەم لایەنە سیاسییەكانیشەوە، ره‌تكردنه‌وه‌ی زوڵم و ژێر دەستەیی بوو، هه‌ر كه‌سێك ئه‌مانه‌ نادیده‌ بگرێت، دەچێتە خانه‌یه‌كی خراپه‌وه‌“.

باسیشی لە قسەكانی لاهوور جەنگی، سەردەستەی تاقمی خۆفرۆشی ١٦ی ئۆكتۆبەر كرد لەبارەی راپەڕینەوە و رای گەیاند: ”لاهوور هه‌ر نابێت باسی راپەڕین بكات، چونكە نە هیچ بوونێكی لە نێو ڕووداوەكانی راپەڕیندا هەبووە، نە بە تێكۆشان و ماندووبوون بە پۆستەكانی ئێستای گەیشتووە، بەڵكوو خۆی و خەڵكیش دەزانن چۆن پێی گەیشتووە كە دیارترین هۆكاریش، پاڵپشتیی وڵاتانی ئیقلیمی و پارەی خیانەت و خۆفرۆشی و قاچاخچێتی بووە، بۆیە خەڵكی قسە لە مرۆڤێكی وەك لاهوور وەرناگرێت“.

جەختیشی كردەوە كە لاهوور جەنگی دوایین كەسە مافی ئەوەی هەبێت قسە لەسەر راپەڕین بكات، بە تایبەتیش بەهۆی ئەوەی بە خیانەتی ١٦ی ئۆكتۆبەر زۆرترین زیانی بە دەستكەوتەكانی راپەڕین گەیاند كە ئەویش تەواوكردنی خەونی خەڵكی كوردستان و گەڕاندنەوەی هەموو سنووری باشوور بوو بۆ ژێر دەسەڵاتی حكوومەتی هەرێمی كوردستان. گوتیشی: ”تا هەتایە، ١٦ی ئۆكتۆبەر پەڵەیەكی ڕەشە بە ناوچەوانی ئەوانەی سوپای عێراق و میلیشیاكانی حەشدی شەعبییان گەڕاندەوە كەركووك و بۆیان نییە لە هیچ بۆنەیەكی نیشتمانیدا دەنگ هەڵبڕن“.

لە لایەن خۆشیەوە دکتۆر سابیر ئیسماعیل، ئەندامی پێشووی جڤاتی نیشتمانیی گۆڕان بە (باسنیوز)ی ڕاگەیاند، بەھۆی خایەنەتی ١٦ی ئۆکتۆبەرەوە خەڵکی شاری کەرکووک لەژێر چەپۆکی عەرەبی شۆڤێنیدا دەژین، ئەگەر سوپای عێراق و حەشدی شەعبی کەرکووک و بەشێکی زۆری ناوچە کوردستاییەکانیان داگیر نەكردایە، خەڵکی ئەو ناوچانە ڕووبەڕووی کارەساتی گەورەی وەك ئێستا نەدەبوونەوە و زێدی خۆیان لێ داگیر نەدەكرا.

گوتیشی، ١٦ی ئۆکتۆبەر پەڵەیەکی ڕەشە بە ناوچاوانی ئەو کەسانەی کە بەشدارییان تێدا كرد و ئەو كارەساتەیان بەسەر خەڵكی ناوچە كوردستانییەكان هێنا.

 

 

 

ب.س