وەزیری دارایی عێراق ڕایدەگەیەنێت، بەرزکردنەوەی بەهای دۆلار بەرامبەر بە دینار بەهۆی توێژینەوە و گفتوگۆکانمان بووە لەگەڵ بانکی ناوەندی و سندوقی نەختی نێودەوڵەتی و لایەنە عێراقییەکانی تر و فراکسیۆن و سەرۆکایەتی پەرلەمانیش رەزامەندبوونە لەسەری.
عەلی عەلاوی، لە چاوپێکەوتنێکیدا لەگەڵ تەلەفزیۆنی فەرمیی عێراقییە ڕایگەیاند:، "گۆڕینی بەهای دۆلار بەرامبەر بە دیناری عێراقی دوای چەند مانگێک لە توێژینەوە و گفتوگۆ بڕیاری لەسەر دراوە، لەگەڵ لایەنی ناوخۆیی و دەرەکی قسە کراوە، ئەو نرخە زۆر گرنگە و ناکرێت رۆژانە بەپێی خواستی و ئارەزووی خۆمان بگۆڕدرێت".
وەزیری دارایی ڕوونی کردەوە، ئێستا بازاڕ بەهای نوێی دۆلاری قبوڵ کردووە، ئەوەش دوای ساڵێکی تر هانی زیاتری کەرتی تایبەت دەدات و یەدەگی نەختینەیش زیاد دەکات.
هەروەها عەلاوی راشیگەیاندووە، "ئەو نرخە زۆر باشە و کاریگەرییەکی زۆر باشی هەبووە بۆ زیادکردنی داهاتی حکوومەت و کۆنتڕۆڵکردنی مەزادی دراو، یەدەگی بانکی ناوەندی زیادی کردووە دوای ئەوەى لە بەردەم داڕووخانی گەورەی ئابوورییدا بووین".