دیوانی شاهانەی سعودیە رای دەگەیەنێت، کە نەشتەرگەرییەک بۆ شازادەی جێنشینی سعودیە، کرا.
لە بەیاننامەیەکدا، دیوانی شاهانەی سعودیە رای گەیاندووە، سەرلەبەیانیی رۆژی چوارشەممە 24-2-2021 نەشتەرگەریی لابردنی ریخۆڵەکوێرە بۆ محەمەد بن سەلمان، شازادەی جێنشینی وڵات، کراوە.
هەروەک لە بەیاننامەکەدا هاتووە، نەشتەرگەرییەکە بە سەرکەوتوو لە نەخۆشخانەی شا فەیسەڵ لە ریازی پایتەختی سعودیە، کراوە و دوای نەشتەرگەرییەکە بن سەلمان نەخۆشخانەی بەجێ هێشتووە.
محەمەد بن سەلمان لە ساڵی 1985 لەدایک بووە، لە ساڵی 2017 بە فەرمانی شا سەلمانی باوکی، کرایە شازادەی جێنشینی سعودیە و لە چەند بۆنەیەکیشدا رای گەیاندووە، کە دوای باوکی، دەبێتە شای سعودیە.