دوو پەرلەمانتاری گۆڕان بۆ بەرپرسانی یەکێتی: بکوژی کاوە گەرمیانی ئاشکرا بکەن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

دوو پەرلەمانتاری گۆڕان بۆ بەرپرسانی یەکێتی: بکوژی کاوە گەرمیانی ئاشکرا بکەن

"زۆر تێنەپەڕیوە بەسەر شەهیدکردنی دە گەنجی خێرلەخۆنەدیو لە سنووری دەسەڵاتی یەکێتی"


هەریەک لە عەلی حەمە ساڵح، سەرۆکی فراکسیۆنی گۆڕان و شیرن ئەمین پەرلەمانتاری فراکسیۆنەکە لە پەرلەمانی کوردستان لە چوارچێوەی گوتارێکیاندا کە ئاراستەی بەرپرسانی یەکێتیی نیشتمانی کوردستانیان کردووە دەڵێن ئەگەر دژی پێشێلکارییەکانی ئازادی ڕادەربڕینن فەرموون بکوژی راستەقینە و ئەوەی لە پشت تیرۆرکردنی کاوە گەرمیانی بوو ئاشکرای بکەن و بیدەنە دادگا.

ئەو دوو پەرلەمانتارە لە گوتارەکەیاندا بە بەرپرسانی یەکێتی رادەگەیەنن: "دەبینین وا دەردەکەون کە دژی پێشێلکارییەکانی ئازادی ڕادەربڕینن بەڵام ئەگەر ئەوە بەکارهێنانی ئازادیخوازانە بۆ ململانێی سیاسی بێ کارێکی خراپە و زیانگەیاندنە بە پرۆسەکە".

دەشڵێن ئەگەر گۆڕانکاری بەسەر باوەڕتاندا هاتووە و پشتیوانی ئازادیی دەکەن پێویستە بکوژی راستەقینەی شەهید کاوە گەرمیانی ئاشکرا بکرێت و دادگایی بکرێت "‎ئەگەر دەڵێن بکوژی شەھید کاوە گەرمیانی ئێستا لە زیندانە، نەخێر ئەو تاوانبارە تەنیا بەکرێگیراوی دەستڵاتدارانە، نەک بکەری شەھیدی قەڵەم".

لە باسی دۆسیەی تیرۆرکردنی ڕۆژنامەنووس کاوە گەرمیانیدا کە هاوکات شیرن ئەمین هاوسەری ئەو ڕۆژنامەنووسە تیرۆرکراوەیە، ئەو دوو پەرلەمانتارەی گۆڕان بە بەپرسانی یەکێتی دەشڵێن: "ھەمووان دەزانن کاوە گەرمیانی لە ئەنجامی ئاشکراکردنی دۆسیەی گەندەڵی بەرپرسە باڵاکانی یەکێتی تیرۆرکرا بفەرموون بکوژی راستەقینە و ئەوەی لە پشتییەتی ئاشکرای بکەن و بدرێتە دادگا".

ئاماژە بە ئەوەش دەدەن کە ئەگەر بەرپرسانی یەکێتی بکوژی راستەقینە و ئەوەی لە پشت تیرۆرکردنی کاوە گەرمیانییە نەدەنە دادگا ئەوە ناتوانن پەڵەی خوێنی شەهیدانی ١٧ی شوبات و شەهیدانی نان و ئازادی و کاوە گەرمیانی لێبکەنەوە.

لە درێژەی پەیامەکەیاندا بە بەرپرسانی یەکێتیی نیشتمانی کردستان دەڵێن: "زۆر تێنەپەڕیوە بەسەر شەھیدکردنی دە گەنجی خێر لەخۆنەدیو، کە لەسەر نان و ئازادی ھاتنە شەقام و لە سنووری دەسەڵاتداری ئێوەدا شەھیدکران".