پارێزگای دهۆك ڕاگەیاندنێكی بڵاو كردەوە و تێیدا ڕفاندن و شەهیدكردنی گەنجێكی دانیشتووی سنووری پارێزگاكەی شەرمەزار كرد.

بەپێی ڕاگەیاندراوێكی پارێزگای دهۆك كە ئەمڕۆ سێشەممە ٢٣ی شوباتی ٢٠٢١ بڵاو كراوەتەوە و وێنەیەكی بۆ (باسنیوز) نێردراوە، ئاماژە بەوە كراوە: ”ڕفاندن، دەستبەسەركردن، زیندانیكردن و شەهیدكردنی هاووڵاتی جۆتیار موحسین سیاری، رۆڵەی پارێزگای دهۆك لە لایەن چەكدارانی پەكەكەوە ڕیسوا و شەرمەزار دەكەین“.

جەختیشی لەوە كردووتەوە كە ”گرتن و زیندانیكردنی هاووڵاتییان تەنیا كاری دامودەزگا دادوەرییەكانە كە لە چوارچێوەی یاسادا دەكرێت و لە دەرەوەی ئەو دەزگایانە دەبێتە كارێكی نایاسایی و نامرۆڤانە و بە دەستدرێژیكردنە سەر خەڵكی هەژمار دەكرێت.

زیاتر لە ساڵێك لەمەوبەر پەكەكە جۆتیار موحسین سیاریی دەستگیر كرد و بەبێ هیچ بەڵگەیەكیش تۆمەتی سیخوڕیی دایە پاڵ، ئێوارەی دوێنێ تەرمەكەی جۆتیار دوای تیرۆركردنی لە لایەن پەكەكەوە، گەیەندرایەوە لای خێزانەكەی لە دهۆك.