گەر راستگۆ بوونایە كەمێك بۆ منداڵانی شەهیدیش دەگریان
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

گەر راستگۆ بوونایە كەمێك بۆ منداڵانی شەهیدیش دەگریان

 

زۆربەمان بڕگە بە بڕگە و خاڵ بە خاڵی كارنامەكەی مەسرور بارزانی، سەرۆك وەزیرانی كابینەی نۆیەمی حكوومەتی هەرێمی كوردستانمان گوێ لێ گرت كە بە ڕا و رەزامەندیی هەموو لایەنە بەشدارەكانی نێو حكوومەت داڕێژرابوو، هەمووشمان هەستمان بەوە كرد كە كارنامەیەكی ورد و گرنگ و لەجێیە و دەستی خستبووە سەر هەموو كەموكوڕییەكانی سێكتەرە جیاوازەكان و دید و چارەسەر و پرۆژەی گونجاوی بۆیان هەبوو، هەمووشمان لە ماوەی ئەم ساڵ و نیو و زیاترەدا، بینیمان كە وێڕای ئەو هەموو قەیرانە سەختەی هاتە پێش ئەم حكوومەتە، حكوومەت بەڕژدی و پراكتیكی هەنگاوی هاویشت و لە بواری پرۆژە جیاوازەكان و پیادەكردنی بڕگەكانی یاسای چاكسازییشدا، كاری باشی كرد و هێشتاش كار و پرۆژەی گرنگی لە پلاندایە ئەگەر قەیرانە یەك لەدوای یەكەكان رێگە بدەن!

بەڵام پرسیار ئەوەیە بۆچی لە یەكەم رۆژی دەستبەكاربوونی ئەم كابینەیەوە، هەندێ لا و لایەن و بەشێك لە سیاسییەكان و میدیاكانیان، پێشوەختە دژایەتیی خۆیان بۆ ئەم كابینەیە و خودی سەرۆك وەزیران و هەر بڕیار و هەنگاوێكی، راگەیاندووە؟ ئەم پرسیارە وەڵامی زۆر هەڵدەگرێت، بەڵام من لێرەدا بەپێی توانا بەشێكی روون دەكەمەوە.

فۆبیای چاكسازی
بۆمان ئاشكرا و ڕوون بووەتەوە‌ كه‌ داینه‌مۆی چاكسازی و به‌ره‌و پێشبردنی ئه‌و پرۆسه‌یه‌ له‌ كابینه‌ی نۆیه‌می حكوومه‌تی هه‌رێمدا، رژد و كارایە، رەنگە هەندێ جار داینەمۆكە بەهۆی چەند قەیرانێكی سیاسی و ئابووری و تەندروستییەوە، خاو بسووڕێت، بەڵام گرنگ ئەوەیە نەوەستاوە، ئێستا لە هەموو كاتێك زیاتر ئەم پرۆسەیە پێداگریی لێ دەكرێت، هیچ دەركەوتن و لێدوانێكی سەرۆك وەزیران نیە، پێداگریی خۆی بۆ پرۆسەی چاكسازی دووپات نەكاتەوە، دڵنیام گەر دەوروبەر و قەیرانە یەك لەدوای یەكەكان و لایەنە نێوخۆییەكان، رێگری نەكەن و هاوكار بن، لە ئایندەیەكی نزیكدا، بەرئەنجامی ئەم پرۆسەیە دەبینین كە زۆر ئەرێنییانە لەسەر ژیانی خەڵكی كوردستان رەنگ دەداتەوە و رێژەیەك لە دادپەروەری بەرقەرار دەبێ، بەڵام هەمبەر بەم رژدی و ئه‌م هه‌وڵه‌ دروستانه‌ی سه‌رۆك وەزیران و ستافەكەی لە ئەنجوومەنی وەزیران، ده‌بینین هاژوهووژ و هەوڵەكانی دژایه‌تیكردنی هەنگاوەكانی حكوومەتیش گەیشتووەتە لوتكە.

چه‌ند ڕۆژیكه‌ باس و خواسی هەرە گەرمی نێو میدیا و سۆشیال میدیا و شه‌قامی كوردستان، كراوەتە كەیسی ئەو تۆمەتبارانەی بادینان كە دادگا حوكمی داون لەپای بوونی كۆمەڵێك بەڵگە و زانیاری. هه‌ڵبه‌ته‌ من ناچمه‌ ناو ئەو كەیسە و دەخوازم دوای بڕیاری دادگای تێهەڵچوونەوە قسەی زیاتری لەبارەوە بكەم، بەڵام ئەوەی جێی پرسیارە، ئه‌و هه‌ڵمه‌ته‌ فراوانه‌یە كە لە دژی ئەو بڕیارەی دادگا بەرپا كراوە.

ئەگەرچی لای خودی خۆم هیچ جێی بایەخ و سه‌رسوڕمان نیه، چونكە ئه‌وانه‌ی له‌پشت هاندان و وروژاندنی ئه‌م بابه‌تەوە‌ن، وەك شەوقی مانگەشەو دیار و ناسراون، دیارە كە سەر بە چ ئەجیندایەكن، كەمپینی لەم شێوەیەمان زۆر دیوە و دیاریشە كێی لەپشت وەستاوە، ئاخر هەر ئەمانەی گوایە بە حسابی خۆیان بەرگری لە مافی ئەو حوكمدراوانە دەكەن، ئەمانە بوون كە كەمپینیان دژی بوونی دەستووری هەرێمی كوردستان دەكرد، دژی سەربەخۆیی و ریفراندۆم وەستانەوە، هاوڕای خیانەتكارانی ١٦ی ئۆكتۆبەر بوون، بە پێشمەرگە و شەهیدانیان دەگوت (كۆیلە!) و لە بەغدا دژی كوردستان شەڕ دەكەن، ئێستاش بانگەشەی دوولەتبوونی كوردستان دەكەن و كەمپین دەكەن بۆ ئەوەی حكوومەتی هەرێم ملكەچی بەغدا بێت بێ هیچ مەرجێك!

ئه‌و وته‌ عه‌رەبیه‌ زۆر شیاو و گونجاوە لەگەڵ ئەم حاڵەتەی هەرێمی كوردستان كه‌ ده‌ڵێت: (ليس حبا بعلي ولكن كرها لعمر) ئه‌و شیوه‌ن و ده‌ستهێنانەش بە سەری منداڵی ئه‌و حوكمدراوانەی بادیناندا، كە هەندێك تەمسیلی پێوە دەكەن،‌ نە لەڕووی ئینساندۆستیەوەیە و نە لە خەمی ئەو منداڵ و خێزانانەدایە و نە خەمخۆرییە بۆ بوونی عەدالەت لە دادگادا، چونكه‌‌ پێشتر بینیمان دەیان هەزار منداڵ هەن، كە باوكیان لەڕێی بەرگری لە نیشتماندا، شەهید بوون، نەمانبینی رۆژێك لە رۆژان ئەوانەی ئێستا هاوسۆزی و فرمێسكی درۆیینە بۆ منداڵەكانی حوكمدراوەكان دەڕێژن، سەردانێكی ئەو منداڵە شەهیدانە بكەن و دوو دڵۆپ فرمێسك بۆ ئەوانەش بڕێژن، ئای كە لێهاتوون لە رشتنی فرمێسكی درۆدا! سەدان تاوان و كوشتوبڕ و تیرۆر، لەو زۆنەی خۆیان ئەنجام دران، كوا رۆژێك لە خەمی عەدالەتدا بوون؟

هەموومان لە سۆشیال میدیای كوردیدا دەبینین، خەڵكانێكی زۆر، بە ناوی خۆیان و وێنەی خۆیانەوە، لە هەولێر و دهۆكەوە، رۆژانە نەك هەر رەخنە، بەڵكوو بەردەوام قسەی ناشرین و ناشیاو و زبر هەمبەر بەو حكوومەتە و سەرۆكەكەی و حزبەكەشی بڵاو دەكەنەوە، ئەی بۆ كەس لەوانە ناگیرێت و حوكم نادرێت؟! بۆیە بڕوای ته‌واوم هه‌یه‌ كه حكوومه‌تی هەرێم ره‌خنه‌ و گازنده‌ی هاونیشتمانیه‌كانی لا قبووڵه‌، به‌ڵام دڵنیام ئه‌وانه‌ی كه‌ ده‌ستیان كردووه‌ به‌م هه‌ڵمه‌ته‌ ناته‌ندروسته‌ له‌و خه‌ڵكه‌ خه‌مخۆرانه نین كه‌ ده‌یانه‌وێت مافی مرۆڤ و عه‌داله‌ت بچه‌سپێنن.

كۆمیدیترین قسه‌ ئه‌وه‌یه‌ كه‌ ده‌گوترێ لە هەرێمی كوردستان ئازادیی ڕاده‌ڕبڕین نیه، گه‌لۆ گه‌ر ئازادیی راده‌ڕبرین نیه، ئەدی چۆن‌ له‌ رووبەرێكی بچووكی وه‌ك هەرێمی كوردستاندا سه‌رووی 900 كه‌ناڵی راگه‌یاندن، زیاتر لە 500 ڕۆژنامه ‌و گۆڤار و 138 ڕادیۆ و 109 کەناڵی تەلەڤزیۆنی بە دەنگ و رەنگ و ئایدیای جیاوازەوە، مۆڵەتیان پێ دراوە و بە كەیفی دڵی خۆیان دەدوێن و دەنووسن‌!

گەلۆ گەندەڵییش تەنیا لە دەزگاكانی حكوومەتدا نیە، لە هەگبەی هەموو حزبەكان و كۆمپانیاكانیان، زۆربەی رێكخراوەكان و لەنێو دوكان و بازاڕەكانیشدا گەندەڵی هەیە، بۆیە چاكسازی هەم پرۆسەیەكی فراوانە و هەم گشتگیرە و هەمیش ورد و هێدییە، دەبێ هەموان لەم پرۆسەیەدا هاوكار بن و پێش گەندەڵیی حكوومەت، هەوڵ بدەن گەندەڵییەكانی خۆیان نەهێڵن.

كورد گوته‌نی: ”چه‌پڵه‌ به‌ ده‌ستێک لێ نادرێ“، چاكسازی هاوكاری و یەك ئیرادەیی دەوێ، كە تۆ خۆت دەستت بەسەر چەندین مەرزی سنووریدا گرتووە و مانگانە زیاتر لە ١٥٠ مليۆن دۆلار لەو مەرزانە بۆ خۆت دەدزیت، ئیدی باسی گەندەڵیی چیم بۆ دەكەیت؟ چۆن لەڕووت دێ باسی مافی منداڵانی حوكمدراو بكەیت؟ چۆن رووقایمیی ئەوەت بۆ پەیدا بووە، باس لە ناعەدالەتی بكەیت؟

لە كۆتاییدا دەڵێم: ”خودا قوەتی خەمخۆرانی نیشتمان بدات“.