وەزیری تەندروستی: 280 هەزار ژەمە پێکوتەی کۆرۆنا دەگاتە هەرێمی کوردستان
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

وەزیری تەندروستی: 280 هەزار ژەمە پێکوتەی کۆرۆنا دەگاتە هەرێمی کوردستان

وەزیری تەندروستیی حكوومه‌تی هه‌رێمی كوردستان ڕای گەیاند بڕیارە سەرەتای مانگی داهاتوو 280 هەزار ژەمە پێکوتەی کۆرۆنا لە جۆری ئەسترا زێنیکا ئۆکسفۆرد بگاتە هەرێمی کوردستان.

د. سامان بەرزنجی، وەزیری تەندروستی حكوومەتی هەرێمی کوردستان به‌ (باسنیوز)ی ڕاگه‌یاند: "ئەگەر هیچ کێشەیەک نەیەتە پێشەوە، پێشبینی دەکرێت بۆ سەرەتای مانگی داهاتوو یەکەمین قۆناغی هاتنی پێکوتەی کۆرۆنا کە 280هەزار ژەمە، بگاتە هەرێمی کوردستان".

 سەبارەت بە وردەکاریی زیاتر وەزیری تەندروستی گوتیشی: "جۆری ڤاکسینەکە ئەسترا زێنیکا ئۆکسفۆردە و مەرج نییە هەمووی پێکەوە بێت".

د. سامان بەرزنجی ئاماژەی بەوەش دا: "لە هەشت سەنتەر لە هەرێمی کوردستان ڤاکسینەکە دابەش دەکرێت، لێژنەی باڵای وەزارەتمان پلان و ڕێوشوێنی ئامادە کردووە بۆ دابەشکردن بەسەر ئەو کەسانەی کە بەپێی ئەولەویەت بە گرووپی مەترسیدار دادەندرێن".

سامان بەرزنجی جەختیشی کردەوە: "ئەو 280هەزار ڤاکسینەی دێت جیاوازە لەو پێنج هەزار ژەمە ڤاکسینەی کۆرۆنا کە چین پێشکەش بە هەرێمی کوردستان دەکات".

دووپاتی کردەوه: "حکوومەتی هەرێمی کوردستان هەموو هەوڵێک بۆ دەستخستی پێکوتەی کۆرۆنا و پاراستنی تەندروستیی هاووڵاتییان دەدات".