لە نزیك دەریاچەی حەمرین چەند کەلوپەلێکی شوێنەواری دۆزرانەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

لە نزیك دەریاچەی حەمرین چەند کەلوپەلێکی شوێنەواری دۆزرانەوە

لە نزیك دەریاچەی حەمرین لە سنوری شارۆچكەی سەعدیەی سەر بە شاری خانەقین، كۆمەڵێک كەرەستەی شوێنەواری دێرین دۆزرانەوە، هاوكات لە ناوەندی پارێزگای دیالەش كۆمەڵێک كەرەستەی شوێنەواری دێرین لە ماڵێكدا دەستیان بەسەردا گیراوە.

عەلی محەمەدئەمین یەكێك لە ئەنجوومەنەكانی ناوچەی حەمرینی نزیك شارۆچكەی سەعدیە، بە (باسنیوز)ی راگەیاند: "دوینێ پێنجشەممە 18ی2ی2021 لەلایەن چەند هاووڵاتییەكەوە كۆمەڵێک گۆزە و دەفری شوێنەواری لە نزیك دەریاچەی حەمرین دۆزراونەتەوە."

گوتیشی: "بەهۆی نەبوونی بنكەی شوێنەوار لە سنووری خانەقین و سەعدیە، ئەو کەرەستانە رادەستی شوێنەواری دیالە كراون."

لەلایەكی ترەوە ئەمڕۆ هەینی19ی 2ی2021، لە شاری باقووبەی ناوەندی پارێزگای دیالە چەند پارچە شوێنەوارێكی دێرین لە ماڵێكدا دەستیان بەسەردا گیراوە.

نیهاد محەمەد، گوتەبێژی پۆلیسی دیالە، بە (باسنیوز)ی رگەیاند: "لە مالێکدا لە باقووبە پەیكەری بەردین و چەند کەلوپەلی دیکە دۆزراونەتەوە كە مێژوویەكی كۆنیان هەیە و بۆ دوو  هەزار ساڵ پێش زایین دەگەڕێتەوە، کە رادەستی شوێنەواری دیالە دەكرێت."