جلی كوردی لە پۆشاكی بازاڕی سەرمایەداری و پۆشاكی حزب و گرووپە سیاسییەكان جوانترە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

جلی كوردی لە پۆشاكی بازاڕی سەرمایەداری و پۆشاكی حزب و گرووپە سیاسییەكان جوانترە

 

بڕوا بەخۆبوون و باڵاکردنی ناخی مرۆڤانە، زۆر گرنگترن لەو پۆشاك و جلوبەرگانەی دەکرێنە بەر ئافرەتان، جا ئەو پۆشاكە چ بە مەبەستی خۆنماییشکردن و خۆڕووتکردنەوە بێت لە بازاڕی سەرمایەدارییدا، چ پۆشاكێك بێت كە هەندێ گرووپی سیاسیی ئایینی بازرگانیی پێوە بكەن! پێش هەموو شت پێویستە ئافرەت وەک مرۆڤ سەیری خۆی و چواردەورەکەی بکات، ئەوکات بە لەبەرچاوگرتنی پرەنسیپەکانی رەوشتی باڵای مرۆڤانە و دونیابینیی خۆی، ئارەزووی خۆیەتی چی دەپۆشێت یا چ کارێک دەکات، بوون بە کاڵا لەنێوان دوو بەرداشی بازاڕی بێڕەحمی سەرمایەداری و ئامانج و بەرژەوەندیی سیاسیی ئیسلامی سیاسیدا، مەترسیدارترین قۆناغ و حاڵەتە کە بەشێك لە ئافرەتانی ئەمڕۆ تێی کەوتوون.

مەخابن ئەوان بێئاگان لەوەی بوونەتە كاڵا و نێچیری کۆمەڵە کەسانێک بۆ قازانجی درارایی یان بەرژەوەندیی تایبەتی خۆیان یا گرووپێک بەکار دەهێنرێن، دیقەت بدەنە ئەو کارەساتەی بەسەر کۆمەڵگەی ئەورووپیدا هاتووە، بە هەڵوەشاندنەوەی خێزان و لەبەریەک دەرچوونی پەیوەندی و بەها کۆمەڵایەتیەکان، بە رادەیەک کاری کردووەتە سەر کۆمەڵگەکانی تری رۆژهەڵاتی ناوەڕاستیش، هۆکارەکەشی بەکاڵاکردنی مرۆڤە بەتایبەت ئافرەتان لە بازاڕی سەرمایەداریدا.

بە هەمان ئەنجام و لەژێر پەردە و مەرامی تردا، کارەساتی گەورە و بەکۆیلەکردنی مرۆڤ و ئافرەتان لە زۆر لەو وڵاتانەدا كە ئیسلامی سیاسی بەڕێوەیان دەبات، ئەوان هێدی هێدی توانا و هزر و باڵابوونی مرۆڤ و بەتایبەت ئافرەتانیان لە ڕەگەوە دەرهێناوە، جا بۆ چارەسەرکردنی ئەم حاڵەتانەی باسمان کرد، دەبێ سەرەتا گوێ لەو دەنگە بگرین کە لە ناخماندایە وەك مرۆڤ و وەك هاووڵاتی، دەبێ ئەو دەنگە دەرەکییانە کپ بکەین کە دەیانەوێ شێوازی ژیان و کەسایەتی و بیركردنەوەمان كۆنترۆڵ بکەن و سوود لە توانا و بوونمان وەرگرن بۆ بنیاتنانی خۆیان و وەدیهێنانی ئامانجە سیاسی و ئابوورییەكانیان.

بۆ ئافرەتی كورد، جلی رەسەنی کوردی، جوانترین پۆشاك و مۆدیلە، هەم لەڕووی جوانی و قەشەنگیەوە، هەم لەڕووی داپۆشراوییەكی خانمانە و كوردانەوە، ئاخر ئەو جلانە دایک و داپیرمان پۆشیویانە و شانازیشیان پێوە کردووە، پێویستە ئەوە بزانین جلی کوردی یەکێکە لە جوانترین جلکە رەسەن و میللییەكانی گەلانی دونیا، بە ڕای من بۆ فەرمانگەکان و دەرەوش بیپۆشین هیچ کێشەیەکی نابێت و بگرە زۆر جوانتریشە لەڕووی جووڵە و هەڵسوکەوتکردنیشەوە خانمان ئاسوودەتر دەكات، جلی كوردی یەكێكە لە خاڵەكانی جیاكردنەوەی ئێمە و گەلانی تر، هیوادارم ئیدی پۆشینی جلوبەرگی کوردی تەنیا بۆ ماڵ و ئاهەنگ و بۆنەكان نەبێت و زۆرتر بپۆشرێت و مەودای لەبەرکردنی فراوانتر بکرێت، ئاخر جلی كوردی شوناسێكی نەتەوەییە، نە پێناسەی ئەخلاقە و نە پێناسەی رەفتاری كۆمەڵایەتی.

لە کۆتاییدا دەڵێم: گەر دایکیت و ماڵەکەت بەڕێوە دەبەیت، یا فەرمانبەرێکی و کاری فەرمانگە لەژێر دەستتدایە، یان قوتابیت و یان هەر كارێكی خزمەتگوزاری دەكەیت، سەرەتا مرۆڤ بە و هەموو ئەو رەوشتە جوانانە لە خۆتدا بچێنە کە ئایینی خۆت و یاسا و مرۆڤایەتی و بەها باڵاكانی مرۆڤبوون لەسەری کۆکن، بە عیشقەوە بژی لە سەروویانەوە عیشقی خودا، چونکە عیشقی خودا دەتگەیەنێتە ئاستێكی باڵای مرۆڤبوون و رەوشتی بەرزی ئینسانی، ئەوەش ناخت ئاسوودە دەکات و دەوروبەریش ئاسوودە دەبن لەگەڵت.