وەڵامێك بۆ سایتی خەندان: جاش رەخنە لە باش دەگرێ!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

وەڵامێك بۆ سایتی خەندان: جاش رەخنە لە باش دەگرێ!

دوێنێ چوارشەممە لە كاردانەوەی لێدوانە روون و راشكاوەكانی سەرۆك وەزیرانی هەرێمی كوردستان لە پرێس كۆنفرانسەكەیدا، سایتی خەندانی سەر بە بەرهەم ساڵحی سەركۆماری عێراق، كەسێكی راسپاردووە بە ناوی (گۆران عەلی كەریم) كە بەشبەحاڵی خۆم ئەمە یەكەم جارمە ناوی ببیستم، تا ئینشایەك بنووسێت، من لێرەدا وەڵامی ئەو (گۆران) ناوە نادەمەوە، چونكە پرسیارم كرد گوتیان: ”ئەویش یەكێكە لە پیاوەكانی دكتۆر كۆمار! بەڵام فڕی بەسەر سیاسەتەوە نیە و زۆر غەریبحاڵ و بێئاگایە لەو بوارەدا، بۆیە رەنگە كەسێكی نزیكتر لە دكتۆر كۆمار سەرە قەڵەمەكانی بۆ نووسیبێت“.

جارێ بەر لە هەموو شت، ئەو برادەرە یاخود با بڵێم ئەو برادەرەی سەرەقەڵەمەكانی بۆ (گۆران) ناوەكە نووسیوە، زەختی لە خۆی كردووە و كۆمەڵێ درۆی شاخدار و قەبەی دروست كردووە بەڵام لە زاری خۆیەوە نا، بەڵكوو لە زاری رەحمەتی مام جەلالەوە (یادی بەخێر). بۆ ئەمەیان من وەڵامم نیە، تەنیا دەڵێم هەق وایە هەڤاڵان و خۆشەویستان و ئازیزانی مام جەلال، رێگە نەدەن خەڵكانی شەحتۆ و زەعتووت! ئەم جۆرە درۆیانە بەناوی مام جەلالی رەحمەتیەوە دروست بكەن، ئەی تا خۆی لە ژیاندا بوو، بۆچی نەتانوێرا لە هیچ بۆنەیەكدا ئەم قسانەی (گوایە هی مام جەلالن) لە شوێنێكدا بگێڕنەوە؟

سەیرترین شت لە كوردستانی خۆمان ئەوەیە، دۆخێك دروست بووە، جاش و خۆفرۆش و خائین، سەرباری ئەو هەموو ناپاكییەی دەرهەق بە خەڵكی كوردستانی دەكەن، سەرباری ئەو هەموو سەفەقات و دەستەوارانەی بە دەست تێكەڵكردنی لەگەڵ نەیاران دەیكەن، هێشتا ئەوان دەنگیان دلێرە و سنگ دەردەپەڕێنن و لە میدیاكانەوە كەشوفش دەكەن، ”تا خاوەن ماڵ دزی گرت، دز خاوەن ماڵی گرت!“. كارەسات ئەوەیە هێشتا گەندەڵكاران و خۆفرۆشان، خەڵكانی دڵسۆز و كوردستانپەروەر و داكۆكیكار لە مافە رەواكانی خەڵكی كوردستان، قەرزاربار دەكەن.

من باسی دەستەوارە ٧٠ ملیۆن دۆلاریەكە و گەندەڵیەكانی تری بەغدا و گرێبەستە مەشبووهەكانی كارەبا ناكەم، چونكە دڵنیام وەك چۆن سەدام حسێنمان بینی لە دادگاكاندا، ئاوهاش رۆژێك دادێ هەندێ لەو برادەرە سیاسییە كوردانەی بەغدا دەبینین هەر لەنێو دادگای بەغدا و لەسەر دەستی ئەوانەی خۆیان پێ فرۆشتوون، دەخرێنە قەفەزی دادگاوە و تووشی گەورەترین ئابڕووچوونی مێژووییان دەكەن، دڵنیام دەكەونە دۆخێكەوە كە هیوا بە لەسێدارەدانەكەی سەدام بخوازن، ئەوە باسی ئینتیقامی كوردستاپەروەران هەر ناكەم.

بەڵام سایتی خەندانی بەرهەم ساڵح، لەو ئینشایەدا بە جۆرێك باسی رۆڵی سەركۆمار و گرووپە ئەڵقەلەگوێكەی (مەبەستم گرووپی ١٥ی فراكسیۆنی هیوایە) دەكات، وەك ئەوەی باسی كۆمەڵێك فریشتەی دڵسۆز بە كوردستان و لە خەمی قووت و ژیانی خەڵكی كوردستاندا بكات، یەكێ نەزانێ ئەو ١٥ پەرلەمانتێرەی دكتۆر، شەو و رۆژ لە پەرلەمانی بەغدا شەڕە بۆكسیانە لەسەر مووچە و مافە نەتەوەییەكانی خەڵكی كوردستان و كێشەی ناوچە داگیركراوەكان، ئاخر خواتان بێت خەڵكی كوردستان هێندە نەخوێندەوار و ناڕۆشنبیر و بێئاگا نین، كە لێدوان و هەڵوێستەكانی سەركۆمار و گرووپی ١٥ی نەبینیبێت و لێكی نەدابێتنەوە.

رۆژانە عەرەبی هاوردە هەڵدەكوتنە سەر ناوچە كوردستانیە داگیركراوەكان، ئەرێ پێم بڵێن دكتۆر كۆماری كورد و گرووپەكەی چ هەڵوێستێكیان بووە؟! رۆژانە پارێزگاری سەپێندراوی كەركووك ماڵ و دوكان و زەوی كشتوكاڵیی كوردان تێك دەدات، ئەرێ دكتۆر و ١٥ برینپێچەكەی هیوا لە كوێن؟
زیاتر لە ٥٠ مادەی دەستووری عێراق دژی كورد و كوردستان پێشێل كراوە، ئەرێ سەركۆماری پارێزەری دەستوور، لە كام دۆڵە؟ بەغدا پارەی گەنمی جووتیارانی كوردستان نادات، دكتۆر كۆمار و جەماعەتی هیواكەی جگە لە بەڵێنی بێ هەنگاو، چییان پێ كراوە؟

لە ساڵی ٢٠٠٧ەوە پارەی پێشمەرگە نادرێ، پێم بڵێن دكتۆرەكەی ساحێبتان چ هەوڵێكی بۆ داوە؟ ئەی ئەو ١٥ فریشتە هیوابەخشە چییان لەمبارەیەوە گوتووە لە پەرلەمان؟ مووچە و بودجەی هەرێمی كوردستان نادرێ، سەركۆمار كەی جورئەتی كردووە باسی بكات؟ هەموو هەوڵەكانی ئەوە بووە لەڕێی ئەو دكتۆر رێبوار كەریمە عەقڵ كڵۆڵەوە، ئیمزای خەڵكی كوردستان كۆ بكاتەوە تا مووچەكانیان راستەوخۆ لە بەغداوە بدرێت...سایتی خەندان، توو ویژدانتان (پاڵەوانی درۆیینە) وەك لە ئینشاكەتاندا نووسیوتانە، خاوەنی سایتەكەتانە یان خەڵكی تر؟

چەند عەیب و نەنگیە كە سوور بزانیت شتێك (درۆ)یە و مۆزەفێكی بێئاگای قەڵەمبەدەستی خۆت راسپێریت لە سایتەكەی خۆتدا بینووسێت و بە (راستی) بە خەڵكی بفرۆشێت؟ سایتی خەندان لەو ئینشایەیدا زۆر لە خەمی ئەوەدایە كە لێدوانەكانی بەرپرسانی هەرێم دڵی بەغدا نیگەران بكات و ئەوانیش كاردانەوەی توندیان هەبێت! توخوا وەرە ئەوەندە نەزان بێت پێت وابێ كە بودجە و مووچەی خەڵكی كوردستان بەهۆی لێدوانی توندەوە بڕدراوە! جا من چیتان بۆ باس كەم كە خۆتان هێندە غەشیمحاڵ بن!