قوباد تاڵەبانی: بەشی راستەقینەی هەرێمی کوردستان لە بودجەی گشتی 5% تێناپەڕێ
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

قوباد تاڵەبانی: بەشی راستەقینەی هەرێمی کوردستان لە بودجەی گشتی 5% تێناپەڕێ

"هەوڵ دەدەین لەگەڵ حکوومەتی فیدڕاڵ بگەینە رێککەوتنێکی ریشەیی"

قوباد تاڵەبانی، جێگری سەرۆکی حکوومەتی هەرێمی کوردستان جەخت دەکاتەوە، هەرێم ئامادەیە لەگەڵ حکوومەتی فیدڕاڵ بچێتە ناو رێککەوتنێک، بۆ ئەوەی هەموو پابەندییەکان جێبەجێ بکرێن، بە مەرجێک ئەو رێککەوتنە دادپەروەرانە بێ و جێبەجێ بکرێ. روونیشی دەکاتەوە، بەشی راستەقینەی هەرێمی کوردستان لە بودجەی گشتی، دوای دەرکردنی خەرجییە سیادییەکان، 5% تێناپەڕێ. هەروەها داواش دەکات، کۆمپانیای (سۆمۆ) بە جۆرێک دابڕێژرێتەوە، کە هەناردەکردن و ئیدارەدان و فرۆشتن و بەبازاڕکردنی نەوت، بە نەوتی هەرێمیشەوە، شەفاف بکات.
تاڵەبانی رەتی کردەوە هەرێمی کوردستان رێککەوتنی فرۆشتنی نەوتی لەگەڵ تورکیا بۆ 50 ساڵ کردبێ، بەڵکو ئەو رێککەوتنەیە دەربارەی ناردنی نەوتە لە رێی بۆری بەناو خاکی تورکیادا و گەیاندنی بە بازاڕەکانی جیهان.

ئەمەی خوارەوە دەقی چاوپێکەوتنی قوباد تاڵەبانی، جێگری سەرۆکی حکوومەتی هەرێمی کوردستانە لەگەڵ رۆژنامەی (ئەلسەباح)ی عێراقی.

یاسای بودجە

ئەلسەباح: ئاشکراتان کردووە، کە رێککەوتنێک لەنێوان بەغدا و هەولێر سەبارەت بە بودجەی 2021 كراوە، گرنگترین خاڵەکانی رێککەوتنەکە چیین؟
قوباد تاڵەبانی: کاتێ تەماشای یاسای بودجە دەکەین، ئەوا ئێمە بەتەنیا تەماشای ئەو بەشە ناکەین، کە پەیوەستە بە هەرێمی کوردستان، چونکە ئەو بودجەیە بۆ هەموو بەشەکانی عێراقە، کە بە تەنگژەیەکی ئابووری و داراییدا تێدەپەڕێ. ئەم بودجەیە هەنگاوی یەکەمە بەرەو گەڕاندنەوەی عێراق بۆ رێڕەوە راستەکەی ئابووری و دارایی. راستە بەشێکی پەیوەستە بە هەرێمی کوردستان، بەڵام بە رای ئێمە چەندین بابەتی دیکەی گرنگی تێدایە، بۆ نموونە، قەبارەی بودجە و قەبارەی کورتهێنان و رێوشوێنی دابینکردنی بەشی پارێزگاکان- نەک تەنیا هەرێمی کوردستان- بەڵکو پارێزگاکانی دیکەی عێراق. عێراقێکی بەهێز لە رووی ئابوورییەوە، بۆ هەرێمیش هێزە، هەمان شت سەبارەت بە بابەتەکانی دیکەی وەک ئاسایش و ئەوانی دیکە، باوەڕیشم وایە مەترسیی گەورە کە رووبەڕووی وڵات دەبێتەوە پەیوەستە بە ئابووری. لە گفتوگۆکانی ئەم دواییانەماندا لە بەغدا، جەختمان لە دوو بابەت کردەوە، کە ئێمە چارەسەرێکی دادپەروەرانەمان بۆ هەموو لایەک دەوێ، لە هەمان کاتدا مایەی جێبەجێکردن بێ. پێویستە بابەتە بچووکەکان تێپەڕێنین و گرنگیی بە چۆنیەتیی سەرلەنوێ بنیاتنانەوەی وڵات بە دیدێکی ستراتیژیانەوە بدەین.

ئەلسەباح: دیارترین مەرجەکانی بەغدا بۆ دیارکردنی بەشی هەرێم لە بودجەدا چیین؟
قوباد تاڵەبانی: ئەوەی پەیوەستە بە هەرێم، لە گفتوگۆکاندا دوو مەرج هەیە سەبارەت بە پابەندبوون و شایستەییەکان، زۆر جاریش بۆ بچووکردنەوەی کێشەی هەرێم و سووربوونە لەسەر مووچەی فەرمانبەران، کە پێچەوانەی هەقیقەتە، ئەمەش تاکە شایستەی هەرێم نییە، بەڵکو چەندین شایستەی دیکەی دەستووریی هەن، لەبەرامبەریشدا هەرێمیش پابەندبوونی لەسەرە، بەگوێرەی دەقی پرۆژەی بودجەی حکوومەت هاتووە، هەرێم لەسەریەتی رۆژانە 250 هەزار بەرميل رادەستی کۆمپانیای (سۆمۆ) بکات، ئێمەش رازین و ئامادەین بۆ جێبەجێکردنی ئەو رێککەوتنە.

بەشی راستەقینە

ئەلسەباح: چۆن دڵنیایی دەدەنە شەقامی عێراقی، کە هەرێم لە عێراق جیانابێتەوە، بەتایبەتی لەوەی پەیوەندیی بە بەشی هەرێمدا هەیە لە بودجە؟
قوباد تاڵەبانی: ستەم و خراپ وێناکردنێک لە شەقامی عێراقی سەبارەت بە پەیوەندیی لەگەڵ هەرێمدا هەیە، پێشتر رێککەوتنێک هەبوو، کە هەرێم بەشی 17%ی لە بودجەی عێراقدا هەبوو، ئێستا بووەتە 12.67%، بەڵام ئەگەر تەماشای ئەو بەشە بکەین، ئەوا لەناو بودجەی گشتیدا نییە، چونکە لەدوای ئەوەی کە بودجەی سیادی لە بودجەی گشتی و خەرجییە سیادییەکان دەردەچێ، بۆیە ئەگەر تەماشای ژمارەی راستەقینە بۆ بەشی هەرێم بکەین، دەبینین لە 5%ی بودجەی گشتیی دەوڵەت تێناپەڕێ، جا ئەگەر ئەم رێژەیە کە بۆ هەرێم دەچێ، هۆکاری خراپیی خزمەتگوزارییەکانی پارێزگاکانی باشوور و ئاوەدان نەکردنەوەیان بێ، ئەوا ئێمە دەستبەرداری دەبین. ئێمە دەپرسین، ئایا 95%ی دیکەی بودجەی گشتیی عێراق بۆ کوێ دەڕوا؟ ئێمە لەگەڵ دابەشکردنێکی دادپەروەرانەداین بۆ بودجەی گشتی لە هەموو پارێزگاکان، داواش دەکەین خاڵە سنوورییەکان و داهاتەکانیان کۆنتڕۆڵ بکرێن، کە ئەگەر بەشێوەیەکی دروست بەڕێوە بچن، ئەوا یارمەتیدەر دەبێ بۆ ئاوەدانی و پێشکەوتنی تەواوی پارێزگاکان.

ئەلسەباح: هی وا هەیە وێنایەکی ناشیرنی هەرێم پیشانی شەقامی عێراقی دەدا، بەلای ئێوە هۆکارەکەی چییە؟
قوباد تاڵەبانی: بۆ ئەم وێنە شێوێندراوە زیاتر لە هۆکارێک هەیە، یەکێکیان شێواندنی سیاسییە لەلایەن هەندێ لایەنەوە بۆ هەرێم، ئەوەی دیکەیش بۆ کەمتەرخەمیی سیاسییەکان و حکوومەتی هەرێمە، بەوەی توانای گفتوگۆ و تێگەیاندنیان بۆ شەقامی عێراقیی (غەیرە کورد) نەبووە، نەمانتوانیوە پەیامی خۆمان بەشێوەیەکی راست و ئاشکرا و بێ شێواندن بگەیەنین، دڵنیاشین زۆر لە براکانمان لە سەرانسەری وڵات نازانن کە بەشی هەرێم لە بودجەی گشتی، لەناویشیاندا خەرجییە سیادییەکان تەنیا 5%ە.

چاودێریی دارایی

ئەلسەباح: دەگوترێ هەرێم رەتی دەکاتەوە بخرێتە ناو دیوانی چاودێریی دارایی فیدڕاڵی؟
قوباد تاڵەبانی: ئەو قسانە راست نیین، یاداشتی لێکتێگەیشتن لەنێوان چاودێریی دارایی فیدڕاڵی و چاودێریی دارایی هەرێم هەیە، هەندێ جار بەهۆی ماوەی نێوان سەردان و سەردانێکی دیکەی دیوانی چاودێریی دارایی فیدڕاڵی بۆ هەرێم، هەڵە تێگەیشتن لەنێوانی هەردوولا دروست دەکا، پێویستیش نییە هەموو فەرمانبەرێک لە حکوومەتی فیدڕاڵی و حکوومەتی هەرێم هەمان نییەتی باشی هەبێ، کە لای سەرکردایەتییدا هەیە، بەباوەڕی من پڕۆژەی بودجە بڕیار لە گەڕانەوەی باوەڕ و دڵنیایی لەنێوان پێکهاتە سیاسییەکاندا دەدات، ئێمە دڵنیاشین دەتوانین هەنگاو دوای هەنگاو ئەو دڵنیاییە دروست بکەین.

ژمارەی فەرمانبەران

ئەلسەباح: سەبارەت بە بڕوانەبوونی بەغدا بە سەرژمێری و ژمارەی فەرمانبەرانی هەرێم، دەتوانن هەندێک وردەکارییمان لەوبارەوە پێ بڵێن؟
قوباد تاڵەبانی: بەڵێ ئەمە راستە، کە یەکێکیشە لە هۆکارەکانی نەبوونی دڵنیایی و بڕوا. کاتێک ئێمە لە هەرێم لە 2014 رووبەڕووی تەنگژەی دارایی بووینەوە، بەشێوەیەکی ورد ژمارەی فەرمانبەرانمان نەدەزانی، بۆیە ناچار بووین پەنامان بردە بەر سەرژمێریی بایۆمەتری، بە تۆمارکردنی هەموو ئەو کەسانەی وەک فەرمانبەر لە هەرێم کار دەکەن و بە بەرنامەیەکی ئەلیکترۆنیی تایبەت مووچە وەردەگرن، بەمەش ژمارەیەکی ورد و راستەقینەی فەرمانبەران و ئەوانی دیکەمان بۆ روون بووەوە، کە مووچە وەردەگرن. بەپێی تۆماری بایۆمەتری، ژمارەی فەرمانبەران بە مەدەنی و سەربازی لە هەرێم دەگاتە 751 هەزار کەس، هەروەها 242 هەزار خانەنشینمان هەیە، لەگەڵ 98 هەزار لە کەسوکاری شەهیدان و بەندکراوە سیاسییەکان، لەهەمان کاتدا 159 هەزار کەسیشمان وەک سوودمەند هەیە لە چاودێریی کۆمەڵایەتی، ئەگەر ئەم ژمارانە هەموویان کۆ بکەینەوە، ئەوا زیاتر لە (1 ملیۆن و 250 هەزار) کەس مووچە لە هەرێم وەردەگرن، بۆیە ئەمەمان لەگەڵ ئەوەی حکوومەتی فیدڕاڵ بەراورد کرد، دیتمان لەوەی دووەمدا نزیکەی (10 ملیۆن) مووچەخۆر هەیە، پێشمان وایە ئەو ژمارە مووچەخۆرانەی هەردوو لا زۆرن، بەلام ئەمە واقیعەکەیە.
لە دیدارەکانی دواییماندا لەگەڵ بەغدا، لیژنەی دارایی لە ئەنجومەنی نوێنەران 13 پرسیاریان سەبارەت بە بەرهەمهێنانی نەوت و هەناردەکردن و بەکارهێنانی ناوەخۆ و ژمارەی دیکە لێ کردین، ئێمە بە شێوەی فەرمی وەڵاممان دانەوە و پێشکەشی پەرلەمان و حکوومەتی فیدڕاڵیمان کردن، بۆ رەواندنەوەی هەر شک و گومانێک، کە هەبێ و ئێمە لای خۆمان هیچی نهێنیمان نییە.

ئەلسەباح: ئەو رێوشوێنە چییە، کە ئێوە بۆ پێدانی مووچە بە فەرمانبەرانتان لە هەرێم لەو تەنگژە ئابوورییەی ئێستا دەیگرنە بەر؟
قوباد تاڵەبانی: داهاتەکانمان بۆ پێدانی مووچەی فەرمانبەران بەکار دێنین، لە پێنج مانگی رابردوودا ئێمە هیچ بڕەپارەیەکمان لە حکوومەتی فیدڕاڵ وەرنەگرتووە، لە ساڵی 2020 حکوومەتی فیدڕاڵ تەنیا 6 مانگ تەمویلی کردووین، سێ مانگ لەو شەش مانگەی تەمویل پچڕپچڕ بوو، ئێمە توانیمان مووچەی 8 مانگ بدەین، بۆیە ناچار بووین هاوسەنگییەک لەنێوان خەرجیییەکان و داهاتەکانمان رابگرین، بەڵێ لە پێدانی مووچەکان دوا کەتین و ناچار بووین تەقەشوفێکی گەورە بکەین، زەرەرمەندیش بە پلەی یەکەم مووچەخۆرانی هەرێمی کوردستان بوون.

مامەڵەی راستەوخۆ

ئەلسەباح: لەم ماوەی دواییدا هەندێ داوا هەیە لە پارێزگای سلێمانی، کە راستەوخۆ مامەڵە لەگەڵ بەغدا بکەن، بەرامبەر بە رادەستکردنی نەوت، حکوومەتی هەرێم چۆن دەڕوانێتە ئەو داواکارییە؟
قوباد تاڵەبانی: ئەم بابەتە لەلایەن هەندێ کەسی پارێزگاکان وروژێنرا، بەڵام من دەپرسم (ئایا حکوومەتی فیدڕاڵ ئامادەیە راستەوخۆ تەمویلی پارێزگایەک بکات لە هەرێم؟) بۆ نموونە، پارێزگای سلێمانی لە بودجەی تەشغیلی، مووچەی مووچەخۆرانی لە مانگێکدا دەگاتە زیاتر لە 400 ملیۆن دۆلار، پرسیارەکە ئەوەیە (ئایا حکوومەتی فیدڕاڵ ئامادەیە تەمویلی بکات؟)، لەکاتێکدا سلێمانی تەنیا نزیکەی 11%ی بڕی لە کۆی نەوتی بەرهەمهێنراوی هەرێمدا هەیە، پرسیارەکە بۆ حکوومەتی فیدڕاڵ دووبارە دەکەینەوە (ئایا دەتوانێ مامەڵە لەگەڵ یەک پارێزگادا بکات؟). ئەوەی دەمانەوێ پێی بگەین، وەک باسمان کرد، رێککەوتنێکە توانای جێبەجێکردنی هەبێ، لە بەرژەوەندیی عێراق بەگشتی و هەرێم بێ بەتایبەتی، بە چارەسەرێکی مەنتقیی دادپەروەرانەوە.

کۆمپانیای نوێی (سۆمۆ)

ئەلسەباح: وەزیری نەوت پێشنیاری دامەزراندنی کۆمپانیای ئیدارەدانی کاروباری بەرهەمهێنان و هەناردەکردنی نەوتی کرد بۆ هەرێم، رای ئێوە لەو بارەوە چییە؟
قوباد تاڵەبانی: ئێمە لە هەرێمی کوردستان یاسای نەوت و غازمان هەیە، بەپێی ئەو یاساەی، ئێمە پابەندین بە دروستکردنی چەند دامەزراوەیەک، دوو لەو دامەزراوانە بەپێی یاسا هەن و لەوەی وەزیر نزیکن، کە پێشنیاری کردووە، یەکێک لەو دامەزراوانە بریتییە لە (سندووقی داهاتە نەوتییەکان)، یاسای تایبەتی بۆ دەرچووە و ماوەتەوە سندووقەکە بەشێوەی کردەیی و راستەوخۆ دەست بەکار بێ، دامەزراوەی دووەم بریتییە لە پرۆژەی دروستکردنی (کۆمپانیای نەوتی هەرێمی کوردستان)، بەڵام رەنگە لەگەڵ بیرۆکەی وەزیری نەوتی عێراق جیا بێ، لێرەدا خاڵێکی گرنگ هەیە دەبێ بیزانین، پێکهاتەی کەرتی نەوت لە هەرێم جیاوازە لەگەڵ پێکهاتەی کەرتی نەوت لە عێراق، چونکە کەرتی تایبەت لە هەرێم کۆنتڕۆڵی کەرتی نەوت دەکات، بەڵام لە ناوچەکانی دیکەی عێراق ئەو کەرتە موڵکی دەوڵەتە، ئەو بەڵێننامە نەوتییانەی لە سەرانسەری عێراق هەن بەڵێننامەی خزمەتگوزاریین لەگەڵ کۆمپانیاکانی نەوت، بەڵام لە هەرێم بەڵێننامەکان خزمەتگوزاری نیین، بەڵکو بەڵێننامەی هاوبەشی بەرهەمن، بۆیە ئەو شێوەی لە ناوچەکانی عێراق جێبەجێ دەکرێ زەحمەتە لە هەرێم جێبەجێ بکرێ، هەروەها بەستنەوەی گشت نەوتی هەرێم بە یەک ئیدارەی سەر بە حکوومەتی فیدڕاڵی داوایەکی نادەستوورییە، ئەوە لەکاتێکدا کە سەرچاوەی داهات لە هەرێمی کوردستان نەوتە و لەو رێگەیەوە چەندین جۆری خەرجییەکانی هەرێم دابین دەکرێ، جا ئەگەر ئەو تاکە سەرچاوەیەمان نەبێ، مانای وایە هیچ گرەنتییەک نییە، کە دەستمان بە خەرجییەکانمان رابگا ، کە بەهۆیەوە ئەو قەرزانە ئەدەینەوە کە ئەکەونە سەر هەرێم.

ئەلسەباح: وەزیری نەوتی عێراق، هەرێم بەوە تۆمەتبار دەکا کە پابەند نییە بە رێککەوتنی ئۆپکی تایبەت بە کەمکردنەوەی بەرهەمهێنانی نەوت؟
قوباد تاڵەبانی: ئێمە بەرهەممان کەم کردووەتەوە، بەڵام ئەو رێژەی کەمکردنەوەیەی وەزیری نەوت نادادپەروەرانەیە، هەرێم 9%ی کۆی گشتیی بەرهەمی نەوتی عێراق بەرهەم دێنێ، وەزیریش داوا دەکات ئەم بەرهەمە بۆ 23% دابەزێنێ، جا ئەگەر ئەو رێژەیە وەک ئەوە دابەزێنرا، کە وەزیر دەیەوێ، ئەوا کاریگەرییەکانی بەسەر هەرێم زۆر دەکەون و زیانی گەورە بە هەرێم دەگات، ئێمە لەگەڵ کەمکردنەوەیەکی دادپەروەرانەداین، کە هەرێم رۆژانە 50 هەزار بەرمیل کەم بکاتەوە، ئەمەش رێژەیەکی زۆرە بەراورد بە قەبارەی بەرهەمی نەوتی هەرێم. توانای هەرێم بۆ بەرهەمهێنانی نەوت 480 هەزار بەرمیلی رۆژانەیە، ئێستا نزیکەی 50 هەزار بەرمیل کەمتر بەرهەم دێنێ، لەکاتێکدا پێویستمان بە 20 هەزار بەرمیلی دیکەیە بۆ پڕکردنەوەی ناوخۆ، هەرێم بەگوێرەی تواناکانی خۆی بەرهەمی کەم کردووەتەوە.

نرخەکانی نەوت

ئەلسەباح: راستیی ئەو دەنگۆیانە چییە، کە دەڵێن هەرێم نەوتی خۆی بە کەمتر لە نرخی جیهان دەفرۆشێ؟
قوباد تاڵەبانی: لەم بارەوە ژمارەی زۆر ورد لە پێگەی حکوومەتی هەرێمی کوردستاندا هەن، دەتوانن دەستیان بخەن، کە لە کۆمپانیای (دیلویت)ەوە دەرچوون، کە کۆمپانیایەکی جیهانییە بۆ وردبینی و راپۆرتەکانی خۆی سەبارەت بە نەوتی هەرێم بڵاو دەکاتەوە. ئەمەوێ ئاماژە بەوەش بکەم، تێچووی هەڵکۆڵین و دەرهێنان و بەرهەمهێنان و هەناردەکردنی نەوتی هەرێم بە رێی بۆرییەوە بۆ تورکیا جیاوازە لەگەڵ تێچوو لە ناوچەکانی دیکەی عێراق، هەروەها کوالێتی و جۆری نەوتەکەیش جیاوازە، هەروەها ئاسانی و سەختیی هەڵکۆڵین و دەرهێنانی نەوت لەنێوان هەرێم و ناوچەکانی دیکەی عێراق، جگە لە بوارە تەکنییکییەکانی دیکە، ئەمە هەمووی وا دەکا ژمارە و نرخی فرۆشتنی نەوت لە هەرێم جیاواز بێت.

ئەلسەباح: باستان لە کۆمپانیایەکی نوێی یەکگرتووی سۆمۆ کرد؟
قوباد تاڵەبانی: ئەگەر هەیکەلی کۆمپانیای سۆمۆ سەرلەنوێ دابڕێژرێتەوە و ئەندامانی کوردیش لە ئەنجومەنیدا هەبن، کە کێشەی نرخی نەوت بەشێوەیەکی گونجاو دیار دەکەن، خزمەت بە وڵات و لەناویشیاندا بە هەرێمی کوردستان دەکات، ئەمە شتێکی باشە و لە بەرژەوەندیی هەمووانە، بەڵام ئەمە هەر بیرۆکەیە و هێشتا بەشێوەی پێویست دیار نەکراوە، ئەم بیرۆکەیەش نوێ نییە، بەڵکو لە ساڵی 2010ەوە ناوە ناوە باسی لێوە دەکەین، لە ساڵی 2014 حکوومەتی عێراقی فیدڕاڵ داوای لێ کردین نەوتی هەرێم لە رێی کۆمپانیای (سۆمۆ) بنێرینە دەرەوە، بەڵام ئێمە گوتمان پێویستە کۆمپانیایەکە سەرلەنوێ دابمەزرێنینەوە، بۆ بەبازڕکردنی نەوت، بۆ ئەوەی بتوانین شەفافانە ئیدارەی داهاتەکانی نەوت بکەین، بەڵام مەسەلەکە ئاڵۆز کرا و خرایە ناو حساباتی سیاسی و ئەوانی تر، ئێمە لەگەڵ گێڕانەوەی ئەو بیرۆکەیەین و هیچ رێگریمان نییە بۆ جێبەجێکردنی.

ئەلسەباح: جا هەرێم بەرامبەر بە پابەندییەکانی لەگەڵ حکوومەتی فیدڕاڵی وەفادار دەبێ؟
قوباد تاڵەبانی: هەرێمی کوردستان ئامادەیە تێکڕای پابەندییەکانی لەگەڵ حکوومەتی فیدڕاڵ جێبەجێ بکات، چ ئەوانەی دەربارەی نەوت، کە رۆژانە رادەستکردنی 250 هەزار بەرمیل نەوتە، چ داهاتە نانەوتییەکان، کە لە خاڵە سنوورییەکانی هەرێم دێنە دەست، بەپێی ئەو یاسایەی لە دەستووردا هاتووە، بەڵام لەبەرامبەردا پێویستە شایستەییەکانی هەرێم دابین بکرێن.

ئەلسەباح: قسە هەیە کە هەرێم بۆ ماوەی 50 ساڵ نەوتی بە تورکیا فرۆشتبێ، ئەمە چەندی راستە؟
قوباد تاڵەبانی: ئەم قسانە راست نیین، ئێمە نەوتمان بۆ 50 ساڵ نەفرۆشتووە، بەڵکو لەناو رێککەوتننامەی عێراقی فیدڕاڵ لەگەڵ تورکیا کارمان بۆ گواستنەوەی نەوت کردووە بەناو خاکی تورکیادا، بۆ ئەوەی بگاتە بازاڕەکانی جیهان، نەک فرۆشتنی نەوت.

خاڵە سنوورییەکان

ئەلسەباح: حکوومەتی فیدڕاڵی، هەرێم بەوە تۆمەتبار دەکات، کە کەلوپەل و پێداویستییەکان بەشێوەی نایاسایی لە دەروازەکانییەوە دێنێتە ژوورەوە، وەڵامتان بۆ ئەمە چییە؟
قوباد تاڵەبانی: ئێمە رێککەوتنێکمان لەگەڵ وەزارەتی کشتوکاڵی فیدڕاڵیدا هەیە، بۆ هێنانی کەلوپەلی رێپێدراو بۆ هێنانە ناو وڵات، هەروەها ئێمە لە 2017ەوە رێککەوتنی پابەندبوونمان بە پێناسەی گومرگییەوە هەیە، بەڵام دیاردەی قاچاغ و هێنانی کەلوپەل بە نایاسایی، ئەوە هەر پیوەست نییە بە خاڵە سنوورییەکانی هەرێم، بەڵکو ئەوە دیاردەیەکە لە تەواوی خاڵە سنوورییەکانی عێراقدا هەیە، پێویستیشە لەسەرمان هەوڵ بدەین چارەسەرێکی ریشەیی بۆ نەهێشتنی ئەو دیاردەیە بدۆزینەوە.