نانبڕین و جاشكڕین لە شمشێرەوە تا ئەبرامز
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 06/02/2021

نانبڕین و جاشكڕین لە شمشێرەوە تا ئەبرامز

ئەگەر ئێوە بەڕاستی كوردن و كوردستانین، بۆ دەتانەوێ هەرێمی كوردستان بە هەموو بە زەوی و ئاسمانیەوە تەسلیمی بەغدا بێت؟ بۆچی هەوڵ دەدەن ئێمە ملكەچ و دەست پانكەرەوەی بەردەم ئەو بەغدایە بین كە ئێستا وێرانەشارە و بەپێی راپۆرتە نێودەوڵەتیەكان، خراپترین پایتەختی جیهانە لەڕووی خزمەتگوزاری و تەناهییەوە؟ بۆ دەخوازن هەرێمی كوردستان لات و لەت و لاواز بكەن؟ بۆ هەنگاو بۆ ئەوە دەنێن دوای كەركووك و شارە كوردستانیەكانی تر، سلێمانی و هەڵەبجەش بفرۆشن و تەسلیم كەن؟ بۆ دەتانەوێ خەڵكی كوردستان بێئومێد بكەن؟ بۆ بەردەوام مێژوو و زمان و كولتوور و شۆڕش و بەرخوان و سیمبولە باڵاكانی كوردستان لەبەر چاوی خەڵكی كوردستان و هەموو دونیادا سووك دەكەن؟ بۆ دەتانەوێ ئەو هەموو قوربانیدان و شەهید و جینۆساید و خوێن لێڕژانەی كورد بێ بەها بكەن؟

وەڵامی هەموو ئەو پرسیارانە یەك شتە، ئەویش ئەمەیە: چونكە ئێوە ناپاك و خۆفرۆشن، ئێ خۆ هەوڵدان بۆ تەسلیمبوونی هەرێمی كوردستان بە بەغدا و هەڵوەشاندنەوەی قەوارەكەی، ناچێتە قاڵبی سیاسەتی جیاواز و قەناعەت و ئایدۆلۆژیا و دین و مەزهەبی جیاوازەوە، ئەو هەوڵەتان جگە لە خۆفرۆشی و بێگانەپەرستی و جاشێتی هیچی تر نیە.

جا بۆ ئەوەی هەم داگیركەرانی كوردستان لە سیاسەتی نانبڕین و جاشكڕین بێئومێد بن و هەم كوردە ناپاكەكانیش بیرێك لە ئەنجامی خۆهەرزانكردن و خۆفرۆشتن و جاشێتیی خۆیان بكەنەوە، دەمەوێ مێژوویەكی دوور، وەبیر هەموو لایەك بهێنمەوە، ئاخر مێژووی داگیركاریی دوژمنان و خۆفرۆشیی ناپاكانی ناوخۆی كورد، لە سەردەمی شمشێرەوە دەست پێدەكات تا چەكی كیمیایی و سەردەمی دەبابەی ئەبرامز و نانبڕین، واتە لە هیچ بارودۆخێكدا نە هەموو كورد خۆی تەسلیم بە دوژمنان كردووە و ملكەچیان بووە، نە هیچ كاتێكیش كورد بێ جاش و خۆفرۆش و ناپاك بووە، لێ خۆشبەختی ئەوەیە هەمیشە ژمارەی خۆفرۆشان كەمی كەمینە بووە و كوردستانپەروەرانیش زۆری زۆرینە، گەر وا نەبوا، كورد و كوردستان نەدەمانەوە تا ئێستا.

یەكەمین قەوارەی دەوڵەتداری لەسەر خاكی كوردستان (دەوڵەتی ماد) بوو و ٧٠٠ ساڵ پێش زایین لەسەر دەستی شا دیاكۆی مەزن و بە هاوكاریی هۆزەیلی مادی كە باوانی كوردن لە رۆژی جەژنی نەورۆزدا دامەزرا، ئەم دەوڵەتە نزیكەی ١٥٠ ساڵ حوكمی كرد و پێشكەوتنی سیاسی و سەربازی و ئابووریی گەیشتە ئەوەی بەشێك لە مێژوونووسان بە (ئیمپراتۆریای ماد) ناودێری دەكەن، لێ مەخابن ساڵی ٥٥٠ی پێش زایین بە خیانەت و جاشێتی ڕووخا، هارپاكی سوپاسالاری دەوڵەتی ماد لە سەردەمی شا ئاستیاگی دوایین پاشای ماددا، خیانەتێكی گەورەی كرد و بووە جاشی كۆرشی هاخامەنشی پێكەوە ئاستیاك و ئەو دەوڵەتەی ماد (باوانی كورد)یان رووخاند و دەستیان بەسەر پایتەختی دەوڵەتی ماد شاری ئاگباتانە (هەمەدانی ئێستا)دا گرت.

جا لە سەروبەندی رووخانی دەوڵەتی ماد و ساڵانی دواتریش، دوو رووداو و دوو وتەی مێژوویی هەیە، كە خۆزگە دەخوازم خیانەتكارانی نێوخۆی كوردستان وەك دوو پەند و وتەی مێژوویی بیرێكی لێ بكەنەوە:

رووداوی یەكەم: دەمێ هێزەكانی كۆرشی حاخامانشی (بە باوك پارس و بە دایك ماد) بە هاوكاریی هارپاكی سوپاسالاری ناپاكی ماد، كۆشكی پاشا ئاستیاگ دەگرن، شا ئاستیاگ بە دیلی دەكەوێتە دەستیان، لەو دەمەدا كۆرشی حاخامەنشی بە زمانی سووكایەتی پێكردنەوە لەگەڵ شا ئاستیاگی دیل دەدەوێ، لێ شا ئاستیاگ وەڵامی كۆرش ناداتەوە و روو لە هارپاكی خائین دەكات و پێی دەڵێ: ”لە دنیادا كەسی وەك تۆ ناپاك و بێقیمەت نیە، باشە تۆ كە هەر نیازی ئەم ناپاكییەت بوو، بۆچی خۆت و هێزەكانی ماد كارێكی وەهاتان نەكرد تا دەوڵەتەكە لە دەستی مادەكاندا بمێنێتەوە، بۆچی دەوڵەتت رووخاند و داتە دەست ئەم بێگانانە كە حاخامەنشیەكانن؟!“

رووداوی دووەم: دوای رووخانی دەوڵەتی ماد و دامەزراندنی دەوڵەتی حاخامانشیی پارس (فارس)، كۆرشی پاشای حاخامەنشی، هارپاكی كردە سەركردەی باڵای سەربازی، ئەویش لەپای ئەو خیانەتەی لە مادەكانی كرد. هارپاك لە زۆربەی شەڕەكاندا سەركردەی سوپای حاخامەنشیەكان دەبێ و هەموو هێز و ئەزموونی سەربازیی خۆی دەخاتە خزمەت نەتەوەیەكی تری بێگانەوە، دواجار هێرش دەكاتە سەر لیدییەكان لە دەوروبەری سنووری ئێستای توركیا و یۆنان، بەسەر هێزی گەورەی ئەوانیشدا سەر دەكەوێ و دەبێتە فورمانڕەوا، بەڵام لە شەڕێكدا بریندار دەبێ و دەكەوێتە سەرەمەرگەوە، یاوەرانی لە دوایین ساتەكانی ژیانیدیا پێی دەڵێن: ”بتبەینەوە بۆ ناوچەی خۆمان واتە ئاگباتانەی (رۆهەڵاتی كوردستانی ئێستا) تا لەوێ بتنێژین؟“ هارپاكی ناپاك بەدەم ئازار و تلانەوەوە دەڵێ: ”نا... لێرە بمنێژن لەم خاكی غەریبیە، چونكە ئەگەر لە خاكی مادەكان بمنێژن، هەموان رۆژانە بەنەفرەتم دەكەن“

زۆربەی هەرە زۆری میرنشینە كوردیەكان پێش بەئیسلامبوونی كورد و دوای ئەویش، خیانەت هۆكارێك بووە لە رووخانیاندا، هەموو سەردەمێكیشی كە شۆڕش كورد دژی داگیركەران لەئارادا بووە، هاوزەمان جاشگەلێكی كورد هەبوون لە دژی شۆڕش و لە بەرەی دوژمناندا بوون،ئەمەی دەیڵێم تا ئێستاش بەردەوامە. جا بزانن، مێژووی كورد وەك چۆن بە یاخیبوون و راپەڕین و شۆڕش و بەرخۆدان و سەركەوتنی زۆر مەزن درەوشاوەتەوە، وەك چۆن بە ناوی گەورەی وەك سەركردە كاریزما و مەزنەكان خەمڵیوە، گەلێ جاریش بە ناپاكی و جاشێتی و خۆفرۆشی تووشی هەڵزنان و خاوبوونەوە لە كاروانی ئازادیخوازی بووە، بەڵام ئەنجام چی؟ كورد و كوردستان هەر ماونەتەوە، زمانی كوردی هەر وا لە گەشەدایە، كولتوور و ئەدەب وێڕای ئەو هەموو داگیركارییە بەردەوامە و لە برەودایە، ژمارەی كتێبە كوردیەكان هەزاران جار لە جاران زیاترن، خەڵكی هەر چوار پارچە لەڕووی رۆحی هاوخەمی و هاونەتەوەییەوە (ناڵێم لەڕووی حزبیەوە) ئێستا لەیەكتر نزیكترن لە جاران باشتر لەیەك تێدەگەن، ئاڵای كوردستان هەر وا دەشەكێتەوە، سەری خۆفرۆشانیش تا دێ زیاتر دەچەمێتەوە.

لە كۆتاییدا راستییەكی جێگیر بە دۆست و نەیارانی كورد و كوردستان و ناپاكانیش دەڵێم، دڵنیام بۆ كوردستانپەروەران قسەیەكی خۆش و جوان و ئومێدبەخشە، بەڵام بۆ كوردستانفرۆشان و خائینان و و داگیركەران و دوژمنان، هیوابڕ و كەمەرشكێنە، ئەویش ئەمەیە: لەسەر ئاستی هەموو مرۆڤایەتی، هیچ نەتەوەیەك نیە، وەكوو كورد بە درێژایی مێژوو تا ئێستا بچەوسێنرێتەوە و هەرچی جۆری چەكە لەدژی بەكار هاتبێت، بەڵام هیچ نەتەوەیەكیش لەسەر ئاستی هەموو دونیا نیە، هێندەی كورد شارەزا و لێزان و لێهاتوو بێت، لە هونەری مانەوە و بەرگری لەخۆكردندا، رەنگە زۆر قۆناغ لە مێژووی كورد و كوردستاندا هاتبێە پێش و كورد و كوردستان تیایدا لاواز بووبن، بەڵام كورد و كوردستان هەر ماون و هەر دەمێنن، نازانم من دەمێنم یان نا، لێ دڵنیام رۆژێك دێ، خەڵكی كوردستان دەگاتە ئەو ئاستەی، هەر كەس خیانەتی لێ كرد، دەیخاتە بەر نەفرەتی خۆی و ریسوای دەكات، هیوادارم ئەو رۆژە زوو بێت، ئەودەم نە نانبڕین و جاشكڕین بەكەڵكی داگیركەران دێ، نە خۆفرۆشتن و خیانەت شانازی دەبێ بۆ جاشەكان!

جاش و خۆفرۆش وەك چۆن دەستی خیانەتیان درێژە، ئاوهاش زمانیان درێژە، وەك چۆن خۆیان كەسانی پووچ و هەرزانن، ئاوهاش قسەكانیان پووچ و كەم و بێبەهان، وەك چۆن گیرفانیان پڕە سەد هێندەش مێژوویان بەتاڵە لە شانازی، رێگەی راست بۆ كوردستانیان، رێگەی یەكگرتن و بەرخۆدان و سەرفرازی و سەربەخۆیی و چاكسازی و خۆنەچەماندن و پێشكەوتنە، جگە لەمە، هەموو رێگەكانی تر هەڵەن. ئەگەر كوردیت یان كوردستانیت، شاناز بە و سەرت بەرز بێت، ئەوەی تۆی هێشتووەتەوە، خاكی كوردستان و زمانی كوردی و ئەو شانازییەیە، بۆیە مەهێڵە لەدەستت بچێت، سەیری ئەم خۆفرۆشانەی ئێستا مەكە، مێژووی تۆ بە فەرهەنگی تەسلیم نەبوون و خۆنەچەماندن درەوشاوەتەوە.