پەرلەمانی کوردستان لە دۆخی زیندانەکان دەکۆڵێتەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

پەرلەمانی کوردستان لە دۆخی زیندانەکان دەکۆڵێتەوە

ئەندامێکى لیژنەى مافى مرۆڤى پەرلەمانى کوردستان رایگەیاند بۆ تاوتوێکردنى دۆخى زیندانەکان و چارەسەرکردنى کێشەکانیان، میوانداریى بەڕێوەبەرانى سەرجەم گرتووخانەکانى هەرێمى کوردستان دەکەین.

حەسیبە گەردى، ئەندامى لیژنەى کاروبارى کۆمەڵایەتى و داکۆکى لە مافى مرۆڤ لە پەرلەمانى کوردستان بە (باسنیوز)ى راگەیاند: "بە ئامانجى تاوتوێکردنى دۆخى زیندانەکان و چارەسەرکردنى ئەو کێشانەى رووبەرووى زیندانیان و راگیراوان دەبنەوە، ئەمڕۆ سێشەممە 26/1/2021 لیژنەکەمان میواندارى بەڕێوەبەرانى سەرجەم گرتوخانەکانى هەرێمى کوردستان دەکات،گفتوگۆکان لەسەر بنەماى ئەو راپۆرتەن، کە لێژنە ئامادەى کردووە".

راشیگەیاند: "لە راپۆرتەکەدا ئێمە پێشنیازى ئەوەمان کردووە گرنگى زیاتر بە دۆخى گرتووخانەکانى هەرێمی کوردستان بدرێ، لە رێگەى هێنانى کەسانى پسپۆرى دەروونى و راهێنەران بۆ راهێنانى ئەو کەسانەى کە راگیراون، چونکە ئامانج لە راگرتن و بەندکردنى سزادراوان، چاکسازییە نەک سزادان".

ئاماژەى بە ئەوەش کرد" لیژنەکەمان پێداگرى لەوە دەکات پێویستە هەماهەنگى زیاتر لە نێوان وەزارەتى داد و کار و کاروبارى کۆمەڵایەتیدا هەبێ، بۆ ئەوەى ئەوکەسانەى دەچنە بەردەم دادەوەر ئەو ماوە زۆرە چاوەڕێ نەکەن، چونکە راگیراو هەبووە سزاکەى کەمتر بووە لەو ماوەیەى راگیراوە، جگە لەوەش راگرتنى ئەو کەسانە بارگرانییەکى زۆر لەسەر حکوومەت دروست دەکات بەهۆى زۆرى خەرجى رۆژانەیانەوە".

ئەوەشى خستەڕوو" رەوشى زیندانییەکان لە رووى شوێنى حەوانەوە و خزمەتگوزارییەوە وەکو پێویست نییە، بەڵام لە رووى پەیڕەوکردنى مافەکانى مرۆڤ لە قۆناغێکى باشدایە".