پەرلەمانتارێك: پەکەکە بە ئەجێندای دەرەکی دەجووڵێتەوە و خزمەت بە دوژمنانی کورد دەکات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

پەرلەمانتارێك: پەکەکە بە ئەجێندای دەرەکی دەجووڵێتەوە و خزمەت بە دوژمنانی کورد دەکات

ئێوارەی دوێنێ هەینی جارێكی تر فڕۆكە جەنگییەكانی توركیا بەهۆی بوونی گەریلاكانی پەكەكەوە چەند ناوچەیەكی سنوورییان بۆردومان كرد كە بووە هۆی برینداربوونی سێ هاووڵاتی و پەرلەمانتارێکیش لە لیژنەی ناوخۆ و ئاسایش و ئەنجوومەنە خۆجێیەکانی پەرلەمانی کوردستان دەڵێت سیاسەتی پەکەکە لە خزمەتی دوژمنانی کورد دایە.

لەبارەی بەردەوامی هێرشەكانی توركیا لە ناوچە سنوورییەکان کە بەهۆی بوونی پەکەکەوەیە رزگار عیسا، ئەندامی لیژنەی ناوخۆ و ئاسایش و ئەنجوومەن خۆجێیەکان لە پەرلەمانی كوردستان، بە (باسنیوز)ی ڕاگەیاند: "بابەتەكە لە بابەتی پەكەكە گەورەترە، چونكە ئەگەر پەكەكە پاڵپشتییەكی ماددی و لۆجستی و سەربازی لە پشت نەبێت، ناتوانێ ئەو پانتاییە زۆرەی خاكی هەرێمی کوردستان داگیر بكات، دیاریشە كە دەوڵەتی ئیقلیمی پشتگیرییان دەكەن و ئەوان بە ئەجێندای دەرەكی دەجووڵێنەوە و داگیركردنی شنگالیش لەلایەن پەكەكەوە دەرهاوێشتەی ئەو راستیەیە، بۆیە ئەو پاڵپشتیە ئیقلیمییە كە لە پەكەكە دەكرێت، بێگومان توركیاش هەست بە هەڕەشە دەكات و حەق بەخۆی دەدات كە هێرش بكات و كێشەی هەرە گەورە ئەو ڕەوشە بە هەرێمی كوردستان ڕاناگیرێت، چونكە ئەو توانایەی نییە، ئەوەش راستییەكە".

ئەو پەرلەمانتارە گوتیشی: "پەكەكە خاكی هەرێمی کوردستانیان داگیر كردووە و دوژمنانی كوردستانیان لەبیر كردووە و ئەوان بە هەڵدێردا براون، خاكی هەرێمی کوردستان خوێنێكی زۆری بۆ دراوە تا ئازاد كراوە و ئێستاش كە خاوەنی پێگەی خۆیەتی، بەڵام تاكوو پەكەكە لە سنوورەكان بمێنێتەوە، توركیاش بەردەوام دەبێت لە هێرشەكانی كە لە ئەنجامدا زیان بە خەڵكی ناوچە سنوورییەكان دەگات و كۆی گشتیی بابەتەكە ئەوەیە، كە سیاسەت و جموجۆڵی پەكەكە خزمەت بە دوژمنانی كورد دەكات، ئەوان بەدڵی ئێران و توركیا و عێراق دەجووڵێنەوە".

بەهۆی بوونی بنکە و بارەگاکانی پەکەکە لە ناوچە سنوورییەکانی هەرێمی کوردستان و بەتایبەتی لە ناوچەکانی قەندیل، برادۆست، ئامێدی و چەند ناوچەیەکی دیکەی سنووری پارێزگای دهۆک بە سەدان گوند چۆڵ کراون، چونکە لەلایەن فڕۆکەی جەنگیی تورکیاوە ناوچەکانیان بۆردومان دەکرێت و ساڵانە زیانی زۆری گیانی و مادی بە خەڵکی ئەو ناوچانە دەگات، جا لەوەی سروشت و ژینگەی هەرێمی کوردستان بەو بۆنەوە وێران کراوە.

جیا لەمەش لە دوای هێرشی داعش بۆ سنووری شنگال، چەکدارانی پەکەکە چەند ناوچەیەکی سنووری قەزای شنگال و بەتایبەتی چیای شنگالیان داگیر کردووە و ئامادەی نین چۆڵی بکەن و بوونەتە هۆکاری نائەمنی و ناسەقامگیریی ناوچەکە و بەم بۆنەوە ئاوارەکانی شنگال ناوێرن بگەڕێنەوە زێدی خۆیان.