ئەردۆغان بۆ مانەوە لە پۆستەکەی بەتەمایە هاوپەیمانیی میللەت تێك بدات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئەردۆغان بۆ مانەوە لە پۆستەکەی بەتەمایە هاوپەیمانیی میللەت تێك بدات

رەجەب تەیب ئەردۆغان سەركۆماری توركیا، ئامادەكاریی تەواو دەكات، تا بتوانێت هاوپەیمانیی (كۆماری) كە لە نێوان ئاكەپە و مەهەپەدا دروست بووە فراوان بكات، ئەویش بە تێكدانی هاوپەیمانیی (میللەت) كە لە نێوان جەهەپە و پارتی باش و پارتی سەعادەتدا دروست بووە و هەدەپەش لە دەرەوەی ئەو هاوپەیمانییە پاڵپشتییان دەكات.

بە گوێرەی ئەنجامی راپرسیی ئەو دەزگایانەی لە توركیا وەكوو بێلایەن راپرسییەكانیان ئاشكرا دەكەن، هاوپەیمانیی (كۆماری) لە هەڵبژاردنی دهاتووی تورکیا ناتوانێت ببێتەوە بە زۆرینە، چونكە بارودۆخی ئابووریی توركیا خراپە و رێژەی بێكاری گەیشتووەتە ئاستێكی مەترسیدار.

لە بەرامبەردا دەنگەكانی هاوپەیمانیی (میللەت) كە هاوپەیمانییەتێكی ئۆپۆزسیۆنە بەرز بووەتەوە و ئەنجامی راپرسییەكان پێمان دەڵێن، لە هەڵبژاردنی داهاتوودا٥٠+١ی دەنگەکان بۆ هاوپەیمانیی (میللەت)ە.

ئەردۆغان دەیەوێت بە تێكدانی هاوپەیمانیی (میللەت)، بردنەوەی خۆی و پارتەكەی لە هەڵبژاردنی داهاتوودا مسۆگەر بكات.

عەبدولقادر سەلفی رۆژنامەنووسی زۆر نزیك لە ئەردۆغان، لە وتارێكدا كە لە رۆژنامەی (حوریەت)ی توركی بڵاوی كردووەتەوە، ئاشكرای دەكات ئەردۆغان بە فەرمی داوای لە پارتی سەعادەت كردووە بێنە ناو هاوپەیمانیی (كۆماری)یەوە.

سەلفی گەشبینە بەوەی پارتی سەعادەت دێتە ناو هاوپەیمانییەتەكەی ئاكەپە و مەهەپە، بەمەش ٢٪ی دەنگەكانی تەواوی توركیا بۆ ئەو هاوپەیمانییە دەبێت.

جیا لەوەش، ئەردۆغان لەڕێگەی دەوڵەت باخچەلی سەرۆكی مەهەپەوە دەیەوێت پارتی باش رازی بكات لە هاوپەیمانیی (میللەت) بكشێتەوە و بێنە ناو هاوپەیمانیی (كۆماری)یەوە، بەڵام مەراڵ ئاكشەنەر سەرۆكی پارتی باش، بە روونی گوتی "ئەگەر دەمانچەش بخەنە سەر سەرم نایەمە ناو هاوپەیمانیی كۆمارییەوە، تا سیستەمی سیاسی لە تورکیا نەبێتەوە بە پەرلەمانی".

لەگەڵ ئەوەشدا ئەردۆغان كۆڵی نەداوە و بەردەوامە لە هەوڵەكانی بۆ نزیكبوونەوە لە پارتی باش، بەوەی ئەگەریش نەتوانێت بیهێنێتە ناو هاوپەیمانیی (كۆماری)یەوە، لانیکەم بتوانێت لە هاوپەیمانیی (میللەت) بیهێنێتەوە دەرەوە تا جەهەپە بە تەنیا بمێنێتەوە، بەمەش كورسیی سەرۆكایەتی بۆ ئەردۆغان مسۆگەر دەبێت.

لەبارەی هەدەپەشەوە، ئەردۆغان دەستی لە هەدەپە شووشتووەتەوە بۆ ئەوەی هاوپەیمانیی لەگەڵدا ببەستێت، چونكە ماوەی ٤ ساڵ دەبێت لەڕێگەی میدیاكان و میتینگەكانییەوە هەدەپە وەكوو تیرۆریست ناو دەبات، بۆیە هەدەپە خۆشی بیەوێت بێتە ناو هاوپەیمانیی (كۆماری)یەوە ئەردۆغان قبووڵی ناكات، ئەویش لەبەر بنكەی جەماوەریی ئاكەپە و مەهەپە.

بۆ ئەوەی هەدەپە نەبێتە مەترسی بۆ سەر هاوپەیمانیی (كۆماری)، دوو سیناریۆ بوونی هەیە:

یەكەم: داخستنی هەدەپە، كە ماوەیەكی زۆرە مەهەپەی هاوپەیمانی ئاکەپە داوای دەكات و میدیاكانی توركیاش دەڵێن لەم خولەی پەرلەماندا هەدەپە دادەخرێت.

دووەم: بەربەستی هەڵبژاردن بۆ ١٢٪ بەرز بكاتەوە، تا لەو ڕووەوە هەدەپە نەتوانێت بەربەست بشكێنێت و دەنگەكانی بۆ هاوپەیمانیی (كۆماری) بچێت.

كەواتە ئەردۆغان دەیەوێت لە هەڵبژاردنی داهاتوودا بە بەردێك ٣ چۆلەكە بكوژێت، ئەویش كوشتنی پارتی باش و سەعادەت و هەدەپەیە، بەمەش جەهەپە بە تەنیا دەمێنێتەوە.

دەمێنێتەوە پارتی (ئایندە و دەوا) كە ئەحمەد داودئۆغلۆ و عەلی باباجان سەرۆكایەتیی ئەو ٢ پارتە دەكەن. ئەوان لەڕووی جەماوەرییەوە سەنگێكی زۆریان نییە لە توركیا، بەڵام ئەردۆغان مەبەستیەتی هاوپەیمانیی سێیەم لە نێوان (پارتی دەوا و ئایندە و پارتی باش) دروست ببێت، تا دەنگی ئۆپۆزسیۆنی توركیا پەرت و بڵاو بێت و نەتوانن لە چوارچێوەی یەك هاوپەیمانیدا كۆ ببنەوە.

ئەگەر ئۆپۆزسیۆنی توركیا بە هەموو پارتەكانەوە توانیان لە چوارچێوەی هاوپەیمانیی (میللەت)دا كۆ ببنەوە، ئەوكات حاڵی ئەردۆغان زۆر خراپ دەبێت و ئەگەر زۆرە خەونی بوونەوە بە سەركۆماری توركیا نەیەتە دی.

ئەگەریش ئۆپۆزسیۆن یەكگرتوو نەبوو و نەیانتوانی بە یەكدەنگ رووبەڕووی هاوپەیمانیی (كۆماری) ببنەوە، ئەوكات بۆ خۆیان پۆستی سەرۆكایەتی و زۆرینەی پەرلەمان دەدەنەوە بە ئەردۆغان و هاوپەیمانیی (كۆماری).